Nyimbo 141 - Libuka Lya Kuyela

Lilombelo lya ku mazolo

Lwimbo lwa Ndavita

¹ Obe Nyambi ya Ngula, nikwihana kukwobe, haya nyavwe. Tengeka litu lyobe kukwami oho nikukwihana.

² Tambula lilombelo lyami ngonehe incence iya yikututwisha livumba lyaliwahe kukwobe, maboko wami nikukatula enge ngo ntupu ya mazolo.

³ Obe Nyambi ya Ngula, fwika kanwa kami, nkanishe kwamba byabibi.

⁴ Hinga uleha mutima wami ngayi utende byabibi, na kulikabakanisha na ntendelo ya kuluwa. Na kwinga shikonzi na bantu batendanga byabibi. Hinga witabila ngayi nilyenga ku mayambwayambwa wabo.

⁵ Mwanga muntu wakulunga ankame, ndaba ukunyuvwila nceshe, mwanga ankalihile, ndaba akenga mazi akuwaba ku mutwe wami. Nalombelelanga kukanisha ntendelo ya bantu bababi ya kuluwa.

⁶ Oho batulela twabo bakayumbiwa hanci ku nobo bakabayatisha, niho baketabile ngayi mazu ami akupwisha.

⁷ Ngonehe mamanya apabozokanga ha kulima, nohobene bifupa byabo kami bikapanzanina kunkumo ya shinzimbi.

⁸ Obe Nyambi ya Ngula, Mwene yami, meho ami anapenze hahobe. Mumwobe nimo nikuholama, hinga witabila ngayi nilifwile.

⁹ Nkoweze ku tunyimbwa banamanyiki, naku tuntamba twa bakakutenda byabibi.

¹⁰ Baka wubi mwanga bafwe mu tunyimbwa twabo nibo bamwine, ngoboni ami nikapanze.