Nyimbo 140 - Libuka Lya Kuyela

Lilombelo lya kushinga kulamiwa

Ku mukakwimbilisha. Lwimbo lwa Ndavita

¹ Obe Nyambi ya Ngula, ndamwine ku bantu bababi, nkoweze ku bantu ba mishunga,

² bayongolanga byabibi mu mitima yabo, kami baka kutumeza zinzita shikati nimwasho.

³ Zindimi zabo za kufwana ngonehe za mayoka, pe kami mazu abo ali na wuhungu ngonehe wa bampili.

⁴ Obe Nyambi ya Ngula, ndame ku maboko a bakawubi, nkoweze ku bantu ba mishunga, aba bali na bifungo bya kumanyika mawulu wami.

⁵ Bakakuliyemeza banamanyiki kanyimbwa kakuholekela, banatandubulu kanyanzi kabo mu nzila yami ngayi bankwate.

⁶ Nikwamba kukwobe Nyambi ya Ngula ngayi, “Uli Nyambi yami.” Obe Nyambi ya Ngula, yuvwilila kulambilila kwami kwakushinga kuyavwiwa.

⁷ Obe nyala za kupuluka kwami, wafwikile mutwe wami ha mutena wa nzita.

⁸ Hinga witabila kulishoza kwa bakawubi, hinga witabila ngayi bifungo byabo bitwesheke.

⁹ Obo bananzinguluku banakatulu mitwe yabo, letesha mafumbila abo ku babokela.

¹⁰ Mwanga mashanga a mundilo abayitikile, mwanga bayumbiwe mu liteke lya ku nonka, omu bakabula kukatwesha kufuma.

¹¹ Mwanga bakakukupeka hinga bekala mu litunga, mwanga byabibi bikonke bantu ba mishunga na kubalobesha.

¹² Obe Nyambi ya Ngula, nalimuku ngayi obe wemaninanga shambo sha muntu wakuyanda, na kuyata shiwahe shambo sha ncepwe.

¹³ Mwa shikuma bantu bakulunga ba kuyemeza lizina lyobe, bakwoloka bakekala ku meho obe.