Nyimbo 14 - Libuka Lya Kuyela

Wubi wa bantu

Ku mukakwimbilisha. Lwimbo lwa Ndavita.

¹ Bakuyeba ba kulyambashana mu mitima yabo ngayi, “Nyambi kowa.” Nimwabo banengi bababi, kami ba kutenda byuma bya wunyengwe. Kowa bakutenda byabiwahe.

² Nyambi ya Ngula kuyilu ukushengezela hanci ku bantu nimwabo, ngayi amone ndi ku bali bamo ba ku yuvwishisha, ba kushingashinga Nyambi.

³ Ngoboni bantu nimwabo banashanuku, nimwabo banabipi. Kowa hinge umo ukutenda byabiwahe.

⁴ Kati bafwako kulimuka ndi? Kati baka wubi bali mu wulube ndi? Bali na ku yoyela ha ku yibila bantu bami, kami kaliha balombanga kukwami.

⁵ Ngoboni haya bakekala na bowa wawunene. Nyambi uli na mukoka wakulunga.

⁶ Enu bakakutenda byabibi, mwavulanganyanga bifungo bya ba kushepwa, ngoboni Nyambi ya Ngula niye shiholamino shabo.

⁷ Ku puluka kwa Ishalela kukafuma ku Ziyoni. Nyambi ya Ngula ukatangamisha Baishalela kami, Yakobo ukatangala na Ishalela ukawahilila.