Nyimbo 139 - Libuka Lya Kuyela

Nyambi walimuka kulama nimwabyo

Ku mukakwimbilisha. Lwimbo lwa Ndavita

¹ Obe Nyambi ya Ngula, unahengolo, pe unandimuku.

² Ukundimuka oho nikwikala na noho nikukatuka, walimuka bihanganiko byami nimwabyo oho nili kwakutali.

³ Wafwatulanga nzila yami na noku nalalanga, walimuka zinzila zami nimwazo.

⁴ Obe Nyambi ya Ngula, hinge shilolo nibalike kwamba, ukulimuka shilumweza ebye ni kushinga kwamba.

⁵ Wambibizile kunyima yami na kumbili, pe wakambikile liboko lyobe hahami.

⁶ Ngana zobe zinengi zaku komokesha kukwami, zinapitakana ku yuvwishisha kwami.

⁷ Obe Nyambi ya Ngula, kati nikutwesha kuya kuti ngayi nipanze kukwobe? Hinge nikutwesha kutinina kuti ngayi nifume ku meho wobe?

⁸ Ndi nikuya kuyilu, obe niko wekala, hinge ndi nikuyala wulili wami mu kalunga ka bafu, obe nimo wekala.

⁹ Hinge ndi ni kutuka lumenemene, na kuya mu nciza ku mushamuko, hinge nikwikala ku mwanya wa kwakutali mu nciza ya liwate,

¹⁰ hinge kuyo bene liboko lyobe likantwaminina, pe liboko lyobe lya shilyo likanyavwa.

¹¹ Ndi nikwamba ngayi, “Haya mincimpwe yimfwike, hinge mwaana ou nili nawo winge wushiku,”

¹² hinge noho mincimpwe kaliha yashipanga kukwobe, ndaba wushiku kukwobe wukutwa ntee ngo mwaana. Mincimpwe na mwaana kukwobe byenga shuma shimo.

¹³ Obe walengele bimamo byami nimwabyo, obe wangungezekele hamo, mu livumo lya bamawa.

¹⁴ Nikukukambilila ha kuntenda shiwahe. Milimo yobe yenga ya kukomokesha nayilimuku shiwahe.

¹⁵ Lutu lwami kaliha lwaholamine ku kwobe, oho walutendelenga kuwi, oho navumbiwilenga mu livumo lya bamawa.

¹⁶ Meho obe amonene oho shilolo nihemuwe. Matena awa apanikiwile kukwami, atikitiwile mu libuka lyobe, oho shilolo kwikale umo.

¹⁷ Obe Nyambi, eshe bya waha bihanganiko byobe kukwami, byenga byabingi shikuma.

¹⁸ Kutwesheka kulabiwa bifwako, byabingi shikuma kupitakana lihekelela. Oho nikupinduka ha tulo, nikwikala hamo na nobe.

¹⁹ Obe Nyambi, shinga ukuziha bakuluwa, pe bakakuyita mukeza bakafuma kukwami.

²⁰ Bakwamba byuma bya kutengama hahobe, bakwamba byabibi ha lizina lyobe.

²¹ Obe Nyambi ya Ngula, eshe na zimba aba ba kuzimba, kami na limbwilisha aba ba ku kulimbwilisha.

²² Na banzimbi na nzimbo yayinene shikuma, na ba wana ngayi banengi bamalamo bami.

²³ Obe Nyambi, hengole, ngayi ulimuke mutima wami, nyezeke, ngayi ulimuke bihanganiko byami.

²⁴ Shingishisha ndi kuli wubi ku kwami, pe ntwaminine mu nzila yikekala mwaya myaka.