Nyimbo 138 - Libuka Lya Kuyela

Lilombelo lya kukambilila

Lwimbo lwa Ndavita

¹ Obe Nyambi ya Ngula, nikukambilila kukwobe na mutima wami nimwawo. Nikembila na kukuyemeza kumbili ya banyambi.

² Napenze ku litala lyobe lya kuyela na shintama hanci, na kukambilila ku lizina lyobe ndaba ya shishemo shobe sha mwaya myaka na kwoloka, ndaba unatumbalalishi lizina lyobe na lizu lyobe hayilu ya byuma nimwabyo.

³ Oho nehanine kukwobe wankumbwile, wancumishile na ngovu zobe.

⁴ Obe Nyambi ya Ngula, bamyene nimwabo hano hanci bakakuyemeza, ndaba banayuvwu mazu a mukanwa kobe.

⁵ Bakayemeza zinzila za Nyambi ya Ngula, ndaba wuwahe wa Nyambi ya Ngula wawunene.

⁶ Hinge ndi Nyambi ya Ngula wekala hayilu, wafulankananga bakakulilimbwilisha, bakakuliyemeza wabalimukilanga hahatali.

⁷ Hinge ndi nikwenda mukati ka makando, walamanga wumi wami shiwahe. Obe wolwele liboko lyobe na kulwisha bamalamo bami banapilama, pe liboko lyobe lya shilyo liku ndamwina.

⁸ Obe Nyambi ya Ngula, ukenzalishilila bifungo byobe hahami. Obe Nyambi ya Ngula, shishemo shobe sha mwaya myaka. Manishilila mulimo uya watatikile, hinga ufutamina mulimo wa maboko wobe.