Nyimbo 135 - Libuka Lya Kuyela

Lwimbo lwa kuyemeza

¹ Yemezenu Nyambi ya Ngula! Yemezenu lizina lya Nyambi ya Ngula, muyemezenu enu bakamilimo ba Nyambi ya Ngula,

² enu mwatendanga mulimo mu Litala lya Nyambi ya Ngula, mu bipango bya Nyambi yetu.

³ Yemezenu Nyambi ya Ngula, ndaba wamuwahe, yimbilenu bya kuyemeza lizina lyendi, ndaba wenga wa nceshe.

⁴ Nyambi ya Ngula walihatilile Yakobo, bantu ba Ishalela kwinga likona lyendi.

⁵ Nikulimuka ngayi Nyambi ya Ngula wamunene, kami Mwene yetu wamunene shikuma kupitakana banyambi nimwabo.

⁶ Nyambi ya Ngula watendanga nimwabyo aku wahilila, muyilu na hano hanci, mu mawate na mu mampunga wawo nimwawo.

⁷ Niye wakakumukishanga makumbi ku zinkumo za hano hanci nimwaho, wamwesheshanga mimuni ya mvula, kami watutwishanga mpepo ku bikongelo byendi.

⁸ Niye wazihile bana ba bamyeli babalume ba Baengepita, ba bantu na tuyamana hamo.

⁹ Watendele bilimukisho na bikomokesho mukati kobe, obe Engepita, kulwisha Fwalo na babilolo bendi nimwabo.

¹⁰ Walobeshele matunga amengi, wazihile bamyene bangovu,

¹¹ Shihoni, mwene wa Baamoli, Ongi, mwene waku Mbashani, na bamyene nimwabo ba Kenaani.

¹² Wapanine matunga wabo kwinga likona, kwinga wuheti ku bantu bendi Ishalela.

¹³ Obe Nyambi ya Ngula, lizina lyobe lyekala mwaya myaka, mpupo yobe, obe Nyambi ya Ngula, ukanukiwa ku mikoka nimwayo.

¹⁴ Ndaba Nyambi ya Ngula ukalamwina bantu bendi, ukayuvwila nceshe bakamilimo bendi.

¹⁵ Banyambi ba matunga batendiwa ha shiliva na ngolinde, batendiwa na maboko a bantu.

¹⁶ Bali na tunwa, ngoboni kwamba bafwako, bali na meho, ngoboni ku mona bafwako.

¹⁷ Bali na matu, ngoboni kuyuvwa bafwako, bali na mizulu, ngoboni kwoya bafwako.

¹⁸ Bantu nimwabo batendanga otu tunankishi, na naba bakukulupila mumwabyo, bakafweka tuya tunankishi batendanga!

¹⁹ Enu Baishalela, yemezenu Nyambi ya Ngula! Enu bakankombela, bazukulya Aloni, yemezenu Nyambi ya Ngula!

²⁰ Enu bazukulya Levi, yemezenu Nyambi ya Ngula! Enu mwamutinanga, yemezenu Nyambi ya Ngula!

²¹ Ayemeziwe Nyambi ya Ngula mu Ziyoni, Ou wekala mu Yelushalema! Yemezenu Nyambi ya Ngula!