Nyimbo 132 - Libuka Lya Kuyela

Kuyemeza Litala lya Nyambi ya Ngula

Lwimbo lwa kuyemeza ha kukankalala ku Yelushalema

¹ Obe Nyambi ya Ngula, anuka Ndavita, na makalikiza nimwawo azumananine.

² Eshe alibezele kuli Nyambi ya Ngula, naku kulupisha Nyambi wa ngovu wa Ishalela ngayi,

³ “Kukengina mu litala lyami, hinge kuya na kulangana ha wulili wami nifwako.

⁴ Kukaya mutulo hinge kuka kunoka nifwako,

⁵ hantu nawanini mwanya Nyambi ya Ngula, mwakwikala Nyambi wa ngovu wa Yakobo.”

⁶ Twayuvwile bya Likwati lya Kulimama ku Efulata, pe twa waninelyo mu mafuba a Yeyalima.

⁷ Twambile ngayi, “Tuyenunga ku Litala lya Nyambi ya Ngula, tuyenu tukalemeshe ku malyatilo a mawulu wendi.”

⁸ Obe Nyambi ya Ngula, katuka uye ku mwanya wobe wakukatalila. Obe na Likwati lya Kulimama, liku monesha ngovu zobe.

⁹ Bakankombela bobe mwanga bavwale kulunga, na bantu bobe ba kuyela mwanga bawulumwine tunkelenkele.

¹⁰ Obe wakulupishile mukamulimo wobe Ndavita, hinga ufutamina mwene ou wahatile wakuwabishiwa.

¹¹ Obe Nyambi ya Ngula, obe walibezele kuli Mwene Ndavita, kulibeza kuya ukabula kutwesha kufutula, oho wambile ngayi, “Nikakwata umo ha bana bobe ba kulibelekela kwikala ha litanda lyobe.

¹² Ndi bana bobe bakalama kulimama kwami, na kulama ndayano nikabalongesha, pe bana babo kami, bakekalanga ha litanda lyobe mwaya myaka.”

¹³ Nyambi ya Ngula unahata Ziyoni, kwinga munzi wendi uya anashingi mwakwikala.

¹⁴ “Okwe nikwo nikakatalilanga mwaya myaka, nikwo nikekalanga ndaba na shingiko.

¹⁵ Nikafuywela Ziyoni nimwabyo ebye akashinga, nikekutisha ba kuyanda bendi na byakulya.

¹⁶ Nikavwika bakankombela bendi na kupulwisha, kami bantu bendi ba kuyela bakawulumwina tunkelenkele.

¹⁷ Kuyo niko nika holwela ngovu za bazukulya Ndavita, na wahishili mumuni muka kuwabishiwa wami.

¹⁸ Nikavwika bamalamo bendi lisheni, ngoboni munana wendi uka byazima.”