Nyimbo 12 - Libuka Lya Kuyela

Lilombelo lya kushinga kuyavwiwa

Ku mukakwimbilisha, bembilile Sheminiti, lwimbo lwa Ndavita

¹ Nyambi ya Ngula, tuyavwe. Ndaba hikowa muntu wamuwahe unashalako, bakwoloka banamana mukati ka bantu.

² Muntu nimwendi ukwongeza minendi, ba kulyongeza umo na wamina na kukupeka.

³ Obe Nyambi ya Ngula umweneshe ozo zindimi za kukupeka. Otwo tunwa twa kuliyemeza tushinke.

⁴ Tuya twambanga ngayi, “Tukakona na mazu wetu, kami tukamba ebye twashinga, ndaba mivumbo yetu niye hekulyetu, pe kowa muntu wakutukanisha.”

⁵ Nyambi ya Ngula ngayi, “Haya nikeza, ndaba ba kushepwa bali na kuyandishiwa, nanaba bakuyandishiwa bali na ku shunga. Nikabalamwina ndaba bakushinga kulamwiniwa.”

⁶ Bikulupisho bya Nyambi ya Ngula byenga bya kupwisha, byenga bya kuyela ngonehe shiliva, unashamishiwi mu ngaanze.

⁷ Obe Nyambi ya Ngula, mona bakuluwa bali kuzimbalila nimwazo. Bakuliyemeza ha byabibi.

⁸ Haya tukinge bikati nimwabyo, na kutubibiza ku bantu banehe.