Nyimbo 119 - Libuka Lya Kuyela

Mulao wa Nyambi ya Ngula

¹ Bali na mfuywezi bantu bali na nyinkalo ya kubula nyanco, aba ba kuyoya mu mulao wa Nyambi ya Ngula.

² Bali na mfuywezi bantu ba kulama kubela kwendi, aba ba kumushinga na mitima yabo nimwayo.

³ Bakubula Kubipisha, ngoboni bakwenda mu zinzila za Nyambi ya Ngula.

⁴ Obe Nyambi ya Ngula unatupana ndayano zobe, kami watutongwezele kuzombatala shiwahe.

⁵ Eshe nikulumbeza ngayi shinga ninge wakwoloka mu kwombatala lukuwa lwobe.

⁶ Ndi nikuzumanana ku ndayano zobe nimwazo, pe kukayeneshiwa nifwako.

⁷ Nikakuyemeza na mutima wakwoloka, oho nikalilongesha kuyata kwobe kwa kulunga.

⁸ Nikwombatala lukuwa lwobe, hinga unciya ninkayami.

Kwombatala Mulao wa Nyambi ya Ngula

⁹ Kati ndumbana ukutwesha kuyoya nahiti nyinkalo ya kuyela? Na kwombatala mazu obe.

¹⁰ Nikakufwatula na mutima wami nimwawo, hinga witabila ngayi nishiye ndayano zobe niye na kuyambangila.

¹¹ Nalama mazu obe mu mutima wami, nohobene ngayi mwanga nikabule kukubipishila.

¹² Kuyemeziwe obe Nyambi ya Ngula, ndongeshe lukuwa lwobe.

¹³ Nikabokelaho kutontolola ndayano nimwazo unampaniki.

¹⁴ Niku wahilila shikuma hakwenda mu mazu wobe, kupitakana kwikala na wuheti wawingi.

¹⁵ Nikahanganikanga ha kufundiziza kwobe, na ku zundamina mu zinzila zobe.

¹⁶ Nikawahilila mu lukuwa lwobe, mazu obe kukawavulama nifwako.

Ku wahilila mu Mulao wa Nyambi ya Ngula

¹⁷ Inga wamuwahe kukwami, ami mukamulimo wobe, ngayi mwanga nikayoye na kwombatala mazu obe.

¹⁸ Tonesha meho wami, ngayi mwanga nimone byuma bya kukomokesha mu mulao wobe.

¹⁹ Nili muyeni hano hanci, hinga uholekela ndayano zobe.

²⁰ Mutima wami uli na nyumwa, ndaba ya kushinga kulimuka ndayano zobe.

²¹ Unakalihili bakakuliyemeza, aba ba kukutiwa, aba ba kukana ndayano zobe.

²² Mfumishe ku lihandu naku makendu wabo, ndaba nalama kubela kwobe.

²³ Hinge ndi batulela ba kuliwana na kuntungula, ngoboni ami mukamulimo wobe, nikahanganikanga ha lukuwa lwobe.

²⁴ Kufundiziza kwobe niko ku kungwahilisha, niko kukumbela.

Shifungo sha kwombatala Mulao wa Nyambi ya Ngula

²⁵ Ami na kushinga kufwa, mpindule ngonehe wankulupishile.

²⁶ Oho nalitabilile nimwabyo natendele, pe obe wankumbwile. Ndongeshe lukuwa lwobe.

²⁷ Nyavwe ngayi niyuvwishishe kufundiziza kwobe, kami nikahanganikanga ha milimo yobe ya kukomokesha.

²⁸ Mutima wami unapopo na wunginga, ncumishe ngonehe wankulupishile.

²⁹ Mfumishe ku zinzila za mahalo, mu nceshe zobe ndongeshe mulao wobe.

³⁰ Nahata kwinga wa kwoloka, nalama ndayano zobe mu mutima wami.

³¹ Obe Nyambi ya Ngula, na kakatili mu mazu wobe, hinga witabila ngayi niyeneshiwe.

³² Nikakonka shiwahe ndayano zobe, oho ukanyavwa kuziyuvwishisha.

Lilombelo lya kunyepa ku yuvwishisha

³³ Obe Nyambi ya Ngula, ndongeshe zinzila mwakulamina lukuwa lwobe, pe nikombatala kutwala na ku mamaninino.

³⁴ Nyavwe ku yuvwishisha, ngayi mwanga nilamenga mulao wobe na mutima wami nimwawo.

³⁵ Ntwaminine mu nzila ya ndayano zobe, ndaba nimo nikuwana ku wahilila.

³⁶ Mpane nyumwa ya kwombatala mazu wobe, kupitakana wuheti.

³⁷ Kanisha meho wami ku mona byuma byowa, yikala wamuwahe kukwami ngonehe wankulupishile.

³⁸ Shumisha shikulupisho shobe kukwami, ami mukamulimo wobe, eshe watenda nanobo ba kukwombatala.

³⁹ Fumisha lihandu linanyuvwishi bowa, ndaba kuyata kwobe kwakuwahe.

⁴⁰ Nikushinga shikuma kwombatala kufundiziza kwobe, mpane wumi wawupya ndaba uli wakulunga.

Kukulupila mu ndayano za Nyambi ya Ngula

⁴¹ Obe Nyambi ya Ngula, mwanga shishemo shobe shize kukwami, kami umpulwishe ngonehe wankulupishile.

⁴² Pe nikatwesha kukumbula obo ba kuntukana, ndaba na kulupila mu lizu lyobe.

⁴³ Untwesheshe kwamba mazu a kwoloka bikati nimwabyo, ndaba kulumbeza kwami kuli mu ndayano zobe.

⁴⁴ Nikwombatalanga mulao wobe mwaya myaka.

⁴⁵ Nikenda mu ku shoboloka, ndaba nalama kufundiziza kwobe.

⁴⁶ Nikashimikila bamyene kubela kwobe, niho kukayuvwa lisheni nifwako.

⁴⁷ Niku wahilila mukwombatala ndayano zobe, ndaba nazihaka.

⁴⁸ Nikwolwela maboko wami ku ndayano zobe, eze nahaka, kami nikahanganikanga ha lukuwa lwobe.

Kukulupila Mulao wa Nyambi ya Ngula

⁴⁹ Anuka lizu lyobe kukwami, ami mukamulimo wobe, ndaba nimo unampanini kulumbeza.

⁵⁰ Shuma shambengezekanga mu makando wami eshe, shikulupisho shobe shampananga wumi.

⁵¹ Bakakuliyemeza bankendwile shikuma, ngoboni kufuma ku mulao wobe nifwako.

⁵² Obe Nyambi ya Ngula, oho nikwanuka ndayano zobe za kushikale, zikumbengezeka.

⁵³ Mutima wami ukuhoka mushali, oho niku mona bakuluwa ba kukana mulao wobe.

⁵⁴ Shikati sha wumi wami hano hanci, nikuhonga nyimbo zaha lukuwa lwobe.

⁵⁵ Obe Nyambi ya Ngula, shikati sha wushiku nanukanga lizina lyobe, kami nalamanga mulao wobe.

⁵⁶ Mfuywezi eze zili hahami, ndaba ngayi nombatalanga kufundiziza kwobe.

Kulipana ku Mulao wa Nyambi ya Ngula

⁵⁷ Obe Nyambi ya Ngula, obe tuhu wa mfuywelanga. Nikukukulupisha kulama mazu obe.

⁵⁸ Nikulomba na mutima wami nimwawo, yikala na nceshe hahami, ngonehe wankulupishile.

⁵⁹ Oho nahanganikanga nyinkalo yami, pe nikukulupisha kulama kubela kwobe.

⁶⁰ Nikanyankupa na kubula kwihala kulama ndayano zobe.

⁶¹ Hinge ndi bakuluwa banamvwimi kanyimbwa, ngoboni kuvulama mulao wobe nifwako.

⁶² Napindukanga mukati ka wushiku, na kukuyemeza ndaba wayatanga mu kulunga.

⁶³ Nili muhoni wa nobo nimwabo ba ku kutina, aba bakwombatala kufundiziza kwobe.

⁶⁴ Obe Nyambi ya Ngula, hanci nimwaho hanenzala shishemo shobe, ndongeshe lukuwa lwobe.

Wuwahe wa Mulao wa Nyambi ya Ngula

⁶⁵ Obe Nyambi ya Ngula, unantendele ami mukamulimo wobe byuma byabingi byabiwahe, ngonehe wankulupishile.

⁶⁶ Ndongeshe ngana na kuyata shiwahe, ndaba nikukulupila mu ndayano zobe.

⁶⁷ Oho shilolo nimone malwa natendelenga mwaya bihanganiko byami, ngoboni wuluno nikwombatala lizu lyobe.

⁶⁸ Uli wamuwahe, kami watendanga byabiwahe! Ndongeshe lukuwa lwobe.

⁶⁹ Bakakuliyemeza banandamba bya mahalo, ngoboni nikwombatala kufundiziza kwobe na mutima wami nimwawo.

⁷⁰ Bakakuliyemeza ngana za ku yuvwishisha bafwazo, ngoboni ami nikatangala mu mulao wobe.

⁷¹ Shashiwahe kukwami oho namonene malwa, ngayi mwanga nililongeshe lukuwa lwobe.

⁷² Mulao wampanikile wawuwahe kukwami, kupitakana mali nimwawo ali mu kaye.

Kupwisha kwa Mulao wa Nyambi ya Ngula

⁷³ Maboko wobe, niwo andengele naku mvumba, nyavwe ku yuvwishisha, ngayi mwanga nililongeshe ndayano zobe.

⁷⁴ Obo ba kukutina bakawahilila oho bakamona, ndaba nikulumbeza mu lizu lyobe.

⁷⁵ Obe Nyambi ya Ngula, nikulimuka ngayi nyatilo yobe ya kulunga, kami wancushwile ndaba uli wakwoloka.

⁷⁶ Shishemo shobe shimbengezeke, ngonehe wankulupishile ami muka mulimo wobe.

⁷⁷ Nyuvwileko nceshe, mwanga niyoyenga, ndaba niku wahilila mu mulao wobe.

⁷⁸ Mwanga bakakuliyemeza bayeneshiwe, ndaba ya kunyata na mahalo, nehiboni ami, nikahanganikanga ha ndayano zobe.

⁷⁹ Mwanga obo ba kukutina beze kukwami, obo nimwabo ba kulimuka kubela kwobe.

⁸⁰ Mwanga ninge wakubula nyanco ku lukuwa lwobe, ngayi mwanga nikabule kuyuvwishiwa lisheni.

Lilombelo lya kunyepa kulamwiniwa

⁸¹ Moyo wami wapopakale na kutatilila kupulwisha kwobe, ngoboni nikulumbeza mu lizu lyobe.

⁸² Meho ami anakwanga kupenzelela eshe wankulupishile, nishili kwipula ngayi, “Kati mwaka ngani ukambengezeka?”

⁸³ Hinge ndi nafutuku ngonehi ntesho ya waine yinakonyatili, ngoboni kuvulama lukuwa lwobe nifwako.

⁸⁴ Kati ami mukamulimo wobe, nafwanini kutatilila shikati sha kukuma hati? Kati ukayata mwaka ngani aba ba kunyandisha?

⁸⁵ Bakakuliyemeza, obo bakubula kwombatala mulao wobe, banankabili mateke ngayi niwilemo.

⁸⁶ Ndayano zobe nimwazo za kupwisha. Nyavwe, ndaba ba kunyandisha na mahalo wabo.

⁸⁷ Hashalile hani ngayi banzihe, ngoboni kaliha nashiyile kufundiziza kwobe.

⁸⁸ Lama wumi wami kuya na shishemo shobe, ngayi mwanga nombatale mazu wobe.

Kukulupila mu Mulao wa Nyambi ya Ngula

⁸⁹ Obe Nyambi ya Ngula, lizu lyobe lyekalisha omo muyilu mwaya myaka.

⁹⁰ Kwoloka kwobe kukekalanga ku mikoka nimwayo, wayakile kaye mu mwanya, kami kekalilila.

⁹¹ Byuma nimwabyo byekalilila kukuma naku mutena walelo, ndaba ya ndayano zobe. Byuma nimwabyo bya kutendelanga milimo.

⁹² Shinga ngayi nabulile ku wahilila mu mulao wobe, shinga nafwile mwaka ndaba ya ku mona malwa.

⁹³ Nifwako kukavulama kufundiziza kwobe, ndaba mumwabyo unampana wumi.

⁹⁴ Nenga wobe, mpulwishe ndaba nashinga kufundiziza kwobe.

⁹⁵ Bakuluwa ba kumbelamina ngayi banzihe, ngoboni nikahanganikanga kubela kwobe.

⁹⁶ Nalimuku ngayi byuma nimwabyo bili na mamaninino, ngoboni ndayano zobe howa aha za kumina.

Kuhaka Mulao wa Nyambi ya Ngula

⁹⁷ Eshe nahaka shikuma mulao wobe! Nalihanganikanga mutena nimwawo.

⁹⁸ Ndayano zobe nili nazo shikati nimwasho, kami zikunkeyesha shikuma kupitakana bamalamo bami.

⁹⁹ Niku yuvwishisha shikuma kupitakana balongeshi bami nimwabo, ndaba nikuhanganika mazu wobe mu mutima.

¹⁰⁰ Niku yuvwishisha shikuma kupitakana tukulukazi, ndaba nikulama kubela kwobe.

¹⁰¹ Nakanishi mawulu wami ku zinzila zazibi, ngayi mwanga nilamenga lizu lyobe.

¹⁰² Kushanuka nifwako ku ndayano zobe, ndaba obe unandongeshe.

¹⁰³ Eshe atobala mazu obe, amatobe shikuma mu kanwa kami kupitakana wushi.

¹⁰⁴ Mu kufundiziza kwobe nawanamo ku yuvwishisha, nohobene nikuzimba zinzila zowa nimwazo.

Lumuni kufuminina ku Mulao wa Nyambi ya Ngula

¹⁰⁵ Lizu lyobe yinengi lambi ku mawulu wami, na lumuni mu nzila yami.

¹⁰⁶ Nalibezele kami nishili kulibeza ngayi, nikalama ndayano zobe za kulunga.

¹⁰⁷ Obe Nyambi ya Ngula, makando wami amanene shikuma, lama wumi wami ngonehe wankulupishile.

¹⁰⁸ Obe Nyambi ya Ngula tambula ntupu yami ya kuyemeza, kami ndongeshe ndayano zobe.

¹⁰⁹ Wumi wami unengi wakukwatilila mu liboko shikati nimwasho, ngoboni kuvulama mulao wobe nifwako.

¹¹⁰ Bakuluwa banamanyiki kantamba, ngoboni ku shanuka ku kufundiziza kwobe nifwako.

¹¹¹ Mazu wobe unengi wuheti wami mwaya myaka. Ee, wunengi wakuwahilisha mutima wami.

¹¹² Mutima wami ukuzengamina kwombatala lukuwa lwobe, kukakuma ku mamaninino.

Kulamiwa mu Mulao wa Nyambi ya Ngula

¹¹³ Nazimba bantu ba mitima yibili, ngoboni nahaka mulao wobe.

¹¹⁴ Obe shiholamino shami na likebo lyami, nikulumbeza mu lizu lyobe.

¹¹⁵ Fumenu kukwami enu bakakutenda byabibi, ngayi mwanga nombatale ndayano za Nyambi yami.

¹¹⁶ Obe Nyambi ya Ngula, ncumankanishe ngonehe wankulupishile ngayi mwanga niyoyenga, hinga witabila ngayi niyeneshiwe mu kulumbeza kwami.

¹¹⁷ Ncumankanishe pe nikekala shiwahe, nikwombatalanga lukuwa lwobe.

¹¹⁸ Wakananga nimwabo ba kushanuka ku kwombatala lukuwa lwobe, biyongola byabo byabibi byenga byowa.

¹¹⁹ Bakuluwa ba hano hanci nimwabo ukubayumba ngonehe bya mazilo, nohobene nahaka kwombatala kubela kwobe.

¹²⁰ Lutu lwami lukukanka ndaba ya kukutina, pe nili na bowa ha nyatilo yobe.

Kwombatala Mulao wa Nyambi ya Ngula

¹²¹ Natende bya kulunga na kupwisha, hinga unciya ku bakakunyandisha.

¹²² Kulupisha ngayi ukayavwa mukamulimo wobe, hinga witabila bakuliyemeza ngayi banyandishe.

¹²³ Meho ami anakwanga kupenzelela kulamwina kwobe, na kupenzelela kwinzalishilila shikulupisho shobe sha kulunga.

¹²⁴ Moneshe shishemo shobe, kami ndongeshe lukuwa lwobe.

¹²⁵ Ami mukamulimo wobe, nyavwe ku yuvwishisha, ngayi mwanga nilimuke kubela kwobe.

¹²⁶ Obe Nyambi ya Ngula, shikati shobe sha kuyata shakumakale, ndaba bantu banakiluku mulao wobe.

¹²⁷ Nohobene nahaka ndayano zobe kupitakana ngolinde, hinge ngolinde ya ku shamishiwa.

¹²⁸ Nohobene haya nikakonka kufundiziza kwobe nimwako, nazimba zintendelo nimwazo zazibi.

Nyumwa ya kwombatala Mulao wa Nyambi ya Ngula

¹²⁹ Mazu wobe akukomokesha, nohobene nikwombatala na mutima wami nimwawo.

¹³⁰ Kutontolola kwa mazu obe kukuleta lumuni, na kupana ngana ku bali mu wulube.

¹³¹ Nikuhekela na kulakama, ndaba ya nyumwa ya ndayano zobe.

¹³² Mpenze na kunyuvwila nceshe, ngonehe watendanga ku nimwabo bahaka lizina lyobe.

¹³³ Ngonehe wakupishile, ndame ngayi hinga niwa, kami hinga witabila ngayi nikomiwe ku wubi.

¹³⁴ Nkulize ku nobo ba kunyandisha, ngayi nombatale kufundiziza kwobe.

¹³⁵ Lupala lwobe lupenze na nceshe ha mukamulimo wobe, kami ndongeshe lukuwa lwobe.

¹³⁶ Meho wami akupwezuma mihozi ngonehe tushinzi twa mema, ndaba bantu kwombatala mulao wobe bafwako.

Kupwisha kwa Mulao wa Nyambi ya Ngula

¹³⁷ Obe Nyambi ya Ngula, uli wakulunga na nyatilo yobe yenga ya kwoloka.

¹³⁸ Kubela kwobe unampana, kwenga kwa kulunga na kwoloka.

¹³⁹ Mutima wami ukuhoka mushali, ndaba bamalamo bami banavulama mazu obe.

¹⁴⁰ Lizu lyobe lyenga lya kuyela, kami mukamulimo wobe nalihaka!

¹⁴¹ Hinge ngayi nili wamuhehu na kukaniwa, ngoboni kukana kufundiziza kwobe nifwako.

¹⁴² Kulunga kwobe kukekalilila mwaya myaka, kami mulao wobe wenga wakwoloka.

¹⁴³ Makando na malwa binangwili, ngoboni ndayano zobe zikungwahililisha.

¹⁴⁴ Mazu wobe enga a kulunga mwaya myaka, nyavwe ku yuvwishisha ngayi mwanga niyoyenga.

Lilombelo lya kulamwiniwa

¹⁴⁵ Obe Nyambi ya Ngula, nkumbule oho nikehana kukwobe na mutima wami nimwawo, pe nikombatala lukuwa lwobe.

¹⁴⁶ Nikwihana kukwobe mpulwishe, pe nikalama kubela kwobe.

¹⁴⁷ Nikupinduka lumenemene shikuma, na kukwihana ngayi unyavwe, nikulumbeza mu lizu lyobe.

¹⁴⁸ Nayumu mu meho wushiku nimwawo, na kuhanganika ha lizu lyobe.

¹⁴⁹ Obe Nyambi ya Ngula, ndaba ya shishemo shobe, nyuvwe, koweza wumi wami kuya na kuyata kwobe.

¹⁵⁰ Bantu banguma ba kuyongola bya kuluwa bali hahepi na nami, ngoboni balikwakutali na mulao wobe.

¹⁵¹ Ngoboni Obe Nyambi ya Ngula, uli hahepi na nami, kami ndayano zobe nimwazo zenga za kwoloka.

¹⁵² Nalimukile kubela kwobe ku balika kushikale, wakutendele ngayi kwikale mwaya myaka.

Kulambilila kuyavwiwa

¹⁵³ Tilamina ha makando wami, pe undamwine, ndaba kuvulama mulao wobe nifwako.

¹⁵⁴ Nyimanine ku shambo shami na kunkuliza, lama wumi wami ngonehe wankulupishile.

¹⁵⁵ Bakuluwa kukapuluka bafwako, ndaba ya kubula kwombatala lukuwa lwobe.

¹⁵⁶ Obe Nyambi ya Ngula, nceshe zobe zazinene, lama wumi wami kuya na ndayano zobe.

¹⁵⁷ Nili na bamalamo babengi ba kunyandisha, ngoboni ku shanuka ku mazu wobe nifwako.

¹⁵⁸ Nikutilamina bantu bakubula kukulupila na wunyengwe, ndaba kulama mazu obe bafwako.

¹⁵⁹ Obe Nyambi ya Ngula, mona eshe nahaka kufundiziza kwobe. Koweza wumi wami ndaba ya shishemo shobe.

¹⁶⁰ Mazu obe nimwawo enga a kwoloka, kami nyatilo yobe ya kulunga yikekala mwaya myaka.

Kufunguliwila ku Mulao wa Nyambi ya Ngula

¹⁶¹ Babilolo ba kunyandisha ha kubula mulandu, ngoboni ami nikutina lizu lyobe.

¹⁶² Nawahililanga na lizu lyobe, ngo muntu unawana wuheti wawingi.

¹⁶³ Nazimba na kukenda bya kwongeza, ngoboni nahaka mulao wobe.

¹⁶⁴ Nakuyemezanga bikati bya mutanu na kabili ha mutena ha mutena, ndaba ya ndayano zobe za kulunga.

¹⁶⁵ Obo bahaka mulao wobe bali mu ku mwena kwakunene, kami kowa shuma shikatwesha ku bapukalisha.

¹⁶⁶ Obe Nyambi ya Ngula nikulumbeza kupulwisha kwobe, kami natendanga mwaya ndayano zobe.

¹⁶⁷ Moyo wami ukulama kubela kwobe, ndaba na ku haka shikuma na mutima wami nimwawo.

¹⁶⁸ Nombatala kubela na kufundiziza kwobe, ndaba zinzila zami nimwazo wazimonanga.

Lilombelo lya kuyavwiwa

¹⁶⁹ Obe Nyambi ya Ngula, yuvwa kulila kwami, nyavwe ku yuvwishisha ngonehe wankulupishile.

¹⁷⁰ Yuvwilila kulambilila kwami, kami ndamwine ngonehe wakulupishile.

¹⁷¹ Nikakuyemeza shikati nimwasho, ndaba obe wandongeshele lukuwa lwobe.

¹⁷² Nikembila lwimbo lwa kuyemeza lizu lyobe, ndaba ndayano zobe nimwazo za kulunga.

¹⁷³ Liwahishile kunyavwa shikati nimwasho, ndaba nahata kufundiziza kwobe.

¹⁷⁴ Obe Nyambi ya Ngula, nili na nyumwa ya kupulwisha kwobe, mulao wobe wangwahilishanga.

¹⁷⁵ Nyintabilishe ngayi niyoyenga, ngayi mwanga nikuyemezenga, mwanga kufundiziza kwobe ku nyavwenga.

¹⁷⁶ Nayambangili ngo mbelele unayongala, nohobene yeka uncingencinge ami muka mulimo wobe, ndaba kuvulama ndayano zobe nifwako.