Nyimbo 118 - Libuka Lya Kuyela

Lilombelo lya kukambilila ha kukoma

¹ Kambililenu kuli Nyambi ya Ngula, ndaba wamuwahe, kami shishemo shendi sha mwaya myaka.

² Baishalela bambe ngayi, “Shishemo shendi sha mwaya myaka.”

³ Bakalupashi lwa Aloni bambe ngayi, “Shishemo shendi sha mwaya myaka.”

⁴ Nimwabo bakakutina Nyambi ya Ngula bambe ngayi, “Shishemo shendi sha mwaya myaka.”

⁵ Oho nekalile mu wukalu nakalokelele kuli Nyambi ya Ngula, Nyambi ya Ngula wankumbwile ha kuncobola.

⁶ Nyambi ya Ngula uli ku mbalila yami, kukatina nifwako. Muntu uku twesha ku ntenda bishini?

⁷ Nyambi ya Ngula uli kumbalila yami mu kunyavwa, kami nikamona bamalamo bami hibakomiwa.

⁸ Shashiwahe kuholama muli Nyambi ya Ngula kupitakana kukinka mutima ha muntu.

⁹ Shashiwahe kuholama muli Nyambi ya Ngula kupitakana kukinka mutima ha bana ba bamyene.

¹⁰ Bamalamo bami ba matunga nimwawo banzingulukile, ngoboni nabalobeshele na ngovu za lizina lya Nyambi ya Ngula!

¹¹ Banzingulukile kuzimbalila nimwazo, ngoboni nabalobeshele mu lizina lya Nyambi ya Ngula!

¹² Bapupwilile kukwami ngonehe mpuka, ngoboni wanguwangu baziminine ngonehe mundilo wamu mihongela, mu lizina lya Nyambi ya Ngula nabalobeshele.

¹³ Banyakwile shikuma ngayi niwe, ngoboni Nyambi ya Ngula wanyavwile.

¹⁴ Nyambi ya Ngula niye nyala zami na lwimbo lwami. Niye kupulwisha kwami.

¹⁵ Yuvwilila ku tunkelenkele twa kukoma mu zintanda za bakulunga, “Liboko lya Nyambi ya Ngula lya shilyo lyatendanga bya ngovu!

¹⁶ Liboko lya Nyambi ya Ngula lya shilyo likukoma, liboko lyendi lya shilyo lyatendanga bya ngovu.”

¹⁷ Kukafwa nifwako, ngoboni nikayoya, na ku shimikila milimo ya Nyambi ya Ngula.

¹⁸ Nyambi ya Ngula unancushulu shikuma, ngoboni kwitabila ngayi nifwe afwako.

¹⁹ Ncinkwilile mapangati a litala lya Nyambi ngayi mwanga nikengininemo, pe nika kambilila kuli Nyambi ya Ngula!

²⁰ Elye nilyo lipangati lya Nyambi ya Ngula, omu bakenginina bakulunga.

²¹ Obe Nyambi ya Ngula nikukukambilila, ndaba wankumbwile, pe wafutukakale kupulwisha kwami.

²² Limanya liya bakanine bakakutenda matala, nilyo linafutuku kwinga limanya lya ku shuma lya mu mbango.

²³ Eshe nisho anatende Mwene, kami shikukomokesha mu meho wetu.

²⁴ Ou niwo mutena anatuholwele Nyambi ya Ngula. Haya tuyenu tuwahililenu na kutangalala!

²⁵ Obe Nyambi ya Ngula, tupulwishe tukukulambilila. Obe Nyambi ya Ngula, tukukulambilila tutwesheshe!

²⁶ Uli na mfuywezi ou ukwiza mu lizina lya Nyambi ya Ngula! Tuku ku yemeza kuno mu Litala lya Nyambi ya Ngula.

²⁷ Nyambi ya Ngula niye Nyambi, kami unatupana liyeye. Pingenu shimbo sha minkungwa, wulutenu na myahi ya mitondo mu maboko, hantu kukuma ku kaala ka zinkombela.

²⁸ Obe uli Nyambi yami, pe nika kukambilila, obe uli Nyambi yami, pe nika kuyemeza.

²⁹ Kambililenu kuli Nyambi ya Ngula, ndaba wamuwahe, ndaba shishemo shendi sha mwaya myaka.