Nyimbo 116 - Libuka Lya Kuyela

Muntu unapuluku ku lufu ukuyemeza Nyambi

¹ Nahaka Nyambi ya Ngula, ndaba wayuvwanga lizu lyami na kulambilila kwami.

² Niye watengekelanga litu lyendi kukwami ngayi anyuvwe, pe shikati nimwasho sha kuyoya kwami nikehana kukwendi.

³ Malamo a lufu anzingulukile, nekalile na mutentu wa kalunga ka bafu, nekalile mu malwa na mu wunginga.

⁴ Niho nehanine ha lizina lya Nyambi ya Ngula, nambile ngayi, “Obe Nyambi ya Ngula, nikukulambilila, lamwina wumi wami!”

⁵ Nyambi ya Ngula uli wa nceshe na kulunga, Nyambi yetu uli na shikeketima.

⁶ Nyambi ya Ngula walamanga babihulahuli, oho nekalile mu malamo, wampulwishile.

⁷ Tula mutima, obe moyo wami, ndaba Nyambi ya Ngula unakutendele byabingi shikuma.

⁸ Nyambi ya Ngula wandamwinine ku lufu, na kunyomenesha mihozi yami, na kulama mawulu wami kukupukazala.

⁹ Nikenda ku meho a Nyambi ya Ngula, mu litunga lya babomi.

¹⁰ Nakulupilile nohobene nambile ngayi, “Namoneshiwi malwa shikuma.”

¹¹ Ha kutampwa kwami nambile ngayi, “Muntu kaliha waku fwanina kukulupila.”

¹² Kati nikutwesha kubweshela bishini Nyambi ya Ngula, ha byuma byabiwahe anantendele?

¹³ Nikaletela Nyambi ya Ngula ntupu ya waine, ku monesha kukambilila oho anandamwini.

¹⁴ Nikatupula kuli Nyambi ya Ngula eshe namukulupishile, ku meho a bantu bendi nimwabo.

¹⁵ Lufu lwa bantu ba kuyela, lwa koleshanga shikuma Nyambi ya Ngula ku mutima.

¹⁶ Obe Nyambi ya Ngula, ami nili mukamulimo wobe, nili mukamulimo wobewobe, mwana wa mulume wa mukamulimo wobe wa mbuyama. Obe unampulwishi ku lufu.

¹⁷ Nikatupula nkombela ya kukambilila, na kwihana lizina lya Nyambi ya Ngula.

¹⁸ Nikatupula kuli Nyambi ya Ngula eshe namukulupishile, ku meho a bantu bendi nimwabo.

¹⁹ Mu bipango bya Litala lya Nyambi ya Ngula, mukatikobe Yelushalema. Yemezenu Nyambi ya Ngula!