Nyimbo 115 - Libuka Lya Kuyela

Nyambi umo Wakupwisha

¹ Kukwobe pele, Obe Nyambi ya Ngula, kukwobe pele, kaliha kukwetu, mwanga lizina lyobe lipanikiwe maleema ndaba ya shishemo shobe na kwoloka.

² Kati shumangani matunga akutuyipula ngayi, “Nyambi yenu uli kuti?”

³ Nyambi yetu uli muyilu, watendanga nimwasho shikumuwahilisha.

⁴ Ngoboni tunankishi twabo twatendiwa ha shiliva na ngolinde, twatendiwa na maboko a bantu.

⁵ Tuli na tunwa, ngoboni kwamba tufwako, tuli na meho, ngoboni ku mona tufwako.

⁶ Tuli na matu, ngoboni kuyuvwa tufwako, tuli na mizulu, ngoboni ku humba tufwako.

⁷ Tuli na maboko, ngoboni kukwata tufwako, tuli na mawulu, ngoboni kwenda tufwako, kutwesha kwinga mishindo tufwako.

⁸ Bantu aba babitendanga na naba bakukulupila mumwabyo, bafweke ngo tuya tunankishi batendanga.

⁹ Enu Baishalela, kulupilenu muli Nyambi ya Ngula. Niye mukakumiyavwa na likebo lyenu.

¹⁰ Enu baka litala lya Aloni, kulupilenu muli Nyambi ya Ngula. Niye mukakumiyavwa na likebo lyenu.

¹¹ Enu mwatinanga Nyambi ya Ngula, mu kulupilenu. Niye mukakumiyavwa na likebo lyenu.

¹² Nyambi ya Ngula mukakutufulankana, ukatufuywela. Ukafuywela bantu ba Ishalela, ukafuywela na bakankombela bendi.

¹³ Ukafuywela nimwabo obo bamutinanga, babanene na babashe.

¹⁴ Mwanga Nyambi ya Ngula amivulishe, enu na bazukulyenu.

¹⁵ Mwanga Nyambi ya Ngula, ou walengele liyilu na hanci amifuywele.

¹⁶ Liyilu lya Mayilu lyenga lya Nyambi ya Ngula ninkayendi, ngoboni hanci wapanikile bantu.

¹⁷ Bakufwa kutwesha kuyemeza Nyambi ya Ngula bafwako, obo bakuya mu kalunga ka bafu.

¹⁸ Ngoboni etu babomi, tukayemeza Nyambi ya Ngula, ku balika shikati shino kuya mwaya myaka. Yemezenu Nyambi ya Ngula!