Nyimbo 114 - Libuka Lya Kuyela

Lwimbo lwa shimbo sha kupitilila

¹ Oho Baishalela bafumine mu Engepita, oho bazukulya Yakobo bashiyile liya litunga, lya bantu ba lulimi lwashenge.

² Yunda wafutukile kwinga bantu ba kuyela, Ishalela wafutukile kwinga wene wendi.

³ Liwate lya kufubila lya bamonene pe lyatinine, Mushinzi wa Yondana walehele kukunkula.

⁴ Mapili akilukile na bowa ngonehe babikungwe, na binkanda ngonehe bambelele.

⁵ Obe liwate, kati ndaba ngani wayumine? Nanobe, Yondana, kati shumangani walehele kukunkula?

⁶ Enu mapili, kati shumangani mu kukilukakiluka na bowa ngonehe babikungwe? Enu binkanda, kati shumangani mu kukilukakiluka ngonehe bambelele?

⁷ Kanka ku meho a Mwene, obe hanci ku meho a Nyambi wa Yakobo,

⁸ Ou wafutulanga mamanya kwinga maziba a mema, na limanya lya ku shuma kwinga tuheloke twa mema.