Nyimbo 111 - Libuka Lya Kuyela

Kuyemeza Nyambi ya Ngula

¹ Yemezenu Nyambi ya Ngula! Nikakambilila na mutima wami nimwawo kuli Nyambi ya Ngula, mu muhoko wa bakakwoloka na mu litengo lya bantu bendi.

² Milimo ya Nyambi ya Ngula yayinene na kukomokesha! Baku wahilila nayo nimwabo bakushinga kuyiyuvwishisha.

³ Milimo yendi yekala na maleema kami yayinene, kulunga kwendi kwa mwaya myaka.

⁴ Ukatwanukisha milimo yendi ya kukomokesha, Nyambi ya Ngula wa nceshe na shikeketima shikuma.

⁵ Ukuholwela byakulya obo ba kumutina, ukanuka kulimama kwendi mwaya myaka.

⁶ Bantu bendi unabamoneshe ngovu za milimo yendi, na kubapana likona lya bakamatunga.

⁷ Milimo ya maboko wendi ya kwoloka na kupwisha, ndayano zendi nimwazo ba kutwesha kuzikulupila.

⁸ Nizo zikekala mwaya myaka, zatendiwile mu kwoloka na mu kupwisha.

⁹ Nakulizi bantu bendi, pe unashumishi nabo kulimama kwa mwaya myaka. Lizina lyendi lyenga lya kuyela na kutinisha!

¹⁰ Kuyuvwila Nyambi ya Ngula bowa niwo mabalikilo a ngana, ba kukonka mu zintambo zendi nimwabo bali na kalimukisho shikuma. Kuyemeziwa kwendi kukekala mwaya myaka.