Nyimbo 107 - Libuka Lya Kuyela

Libuka lya mutanu Kuyemeza wuwahe wa Nyambi

¹ “Kambililenu kuli Nyambi ya Ngula, ndaba wamuwahe, nceshe zendi za mwaya myaka!”

² Enu nimwenu munakuliziwi na Nyambi ya Ngula, ambenu na ku bokela mazu awa akuyemeza. Niye unamikulizi ku bamalamo benu.

³ Unamikungululu kumifumisha ku matunga ashenge, namifumishi ku mushamuko naku mponci, ku ncelele naku mabukubuku.

⁴ Bamina bayambangilile mu libelelengwa mwakubula nzila, pe babulile kuwana nzila ya kubatwala ku lukena lwa kuzika.

⁵ Balandukile ku nzala na kufwa linyontwa, pe mitima yabo yapopele shikuma.

⁶ Niho mu makalikiza wabo behanine kuli Nyambi ya Ngula, pe wabalamwinine ku makando wabo.

⁷ Wabatwaminine mu nzila ya kwoloka, kutwala noho bakumine ku lukena oku batweshele kuzika.

⁸ Haya ba ku fwanina kukambilila Nyambi ya Ngula, ndaba ya nceshe zendi za mwaya myaka, na byuma bya kukomokesha atendela bantu.

⁹ Wapananga mema bali na linyontwa na kwikutisha bali na nzala na byuma byabiwahe.

¹⁰ Bamo bekalile mu mincimpwe namu mubombola wakufwa, hinga bamangiwa mu makalikiza na mu bikulo,

¹¹ ndaba bafutukilile mazu a Nyambi, na kukana kufundiziza kwendi ou Wakukangana.

¹² Mitima yabo yakwangile na milimo yayilemu, nohobene bawile hanci ndaba kwabulile wakubayavwa.

¹³ Niho mu makalikiza wabo behanine kuli Nyambi ya Ngula, pe wabalamwinine ku makando wabo.

¹⁴ Wabatutwishile mu mincimpwe namu mubombola wakufwa, na kuketozola bikulo byabo.

¹⁵ Haya ba ku fwanina kukambilila kuli Nyambi ya Ngula, ndaba ya nceshe zendi za mwaya myaka, na byuma bya kukomokesha atendela bantu.

¹⁶ Ndaba unaketozolo bihala bya lubemba, na kuketula mikambo ya byondo hakati.

¹⁷ Bamo bafutukile bihulahuli, bayandile ndaba ya kuluwa kwabo, bamonene malwa ndaba ya milandu yabo.

¹⁸ Balevumine na byakulya nimwabyo pe bashingile kufwa.

¹⁹ Niho mu makalikiza wabo behanine kuli Nyambi ya Ngula, pe wabalamwinine ku makando wabo.

²⁰ Nyambi ya Ngula watumine lizu lyendi na ku banyongomanisha, na ku balamwina kukulobeshiwa.

²¹ Haya ba ku fwanina kukambilila kuli Nyambi ya Ngula, ndaba ya nceshe zendi za mwaya myaka, na byuma bya kukomokesha atendela bantu.

²² Batupule zinkombela za kumukambilila, na nyimbo za ku wahilila, zikutontolola nimwabyo ebye anatende.

²³ Bamo bavuwile mato amanene ha liwate, bengile bakamikwebo baha mawate.

²⁴ Bamonene milimo ya Nyambi ya Ngula, milimo yendi ya kukomokesha mu mawate.

²⁵ Nyambi wambile pe nkuli yatatikile kupepoka, na kukatula mankanyi.

²⁶ Aya akatwile mato amanene hayilu, na kuwazubika ha mema mu mankunzela. Bakakuvuwa bahopokele mu zinyutu ndaba ya malamo anehe,

²⁷ bapukazalile na kutalangila ngo bakakukolwa, pe ngana zabo nimwazo zamanine.

²⁸ Niho mu makalikiza wabo, behanine kuli Nyambi ya Ngula, pe wabalamwinine ku makando wabo.

²⁹ Wamweneshele nkuli, niho mankanyi a liwate amwenene.

³⁰ Batangalile ndaba bekalile mu ku mwena, pe wababweshele shiwahe ku livwe oku balumbilenga.

³¹ Haya ba ku fwanina kukambilila kuli Nyambi ya Ngula, ndaba ya nceshe zendi za mwaya myaka, na byuma bya kukomokesha atendela bantu.

³² Banafwanini kumuyemeza mu shikungulukilo sha bantu, bamuyemeze kami mu nkuta ya bakulwane.

³³ Nyambi ya Ngula wafutulanga mishinzi kwinga libelelengwa, na tuheloke twa mema kwinga mu nyuminine,

³⁴ na litunga lya wilo kwinga lya shikula sha mushele, ndaba ya kuluwa kwa nobo bazikamo.

³⁵ Wafutulanga mabelelengwa kwinga maziba a mema, na litunga lya nyuminine kwinga tuheloke twa mema,

³⁶ na kuleha bali na nzala ngayi bazikemo, pe bakuwahisha lukena mwakwikala.

³⁷ Bakukuba mafuba na kutampika mikolobozi ya shinyanca, na kuteza byabingi.

³⁸ Na mfuywezi zendi, ba kuhanya shikuma, kuleha zingombe zabo ngayi zipupuke ufwako.

³⁹ Oho bantu bakomiwile na kulyatililiwa, bayandile shikuma na ku mona makando.

⁴⁰ Bekalile mu wunginga waholwele lihandu ku bana ba bamyene, bayambangilile mu libelelengwa lya kubula nzila.

⁴¹ Ngoboni walamwinine ba kuyanda ku malwa wabo, kami wahanyishanga ba lupashi lwabo ngo matanga a bambelele.

⁴² Bakulunga bakamona noho bakatangala, ngoboni bakabula kulunga nimwabo bakafwika tunwa twabo.

⁴³ Nimwendi wakukeya mwanga a shangame ha byuma ebye, mwanga alimuke nceshe za Nyambi ya Ngula za mwaya myaka.