Nyimbo 106 - Libuka Lya Kuyela

Wuwahe wa Nyambi ya Ngula ku bantu bendi

¹ Yemezenu Nyambi ya Ngula! Kambililenu kuli Nyambi ya Ngula, ndaba wenga wamuwahe, shishemo shendi sha mwaya myaka.

² Yani ukutwesha kutoya byuma byabinene anatende Nyambi ya Ngula? Yani ukutwesha ku monesha kuyemeza kwendi nimwako mwa ku fwanina?

³ Bali na mfuywezi obo ba kulama ndayano za Nyambi ya Ngula, na kutenda bya kulunga shikati nimwasho.

⁴ Nyanuke, Obe Nyambi ya Ngula, oho ukuyamiziza bantu bobe, nyakeko na nami oho ukubalamwina.

⁵ Nimone kutumpuka kwa bantu bobe ba kuhatiwa, niwahilile mu kutangala kwa matunga wobe, niwane maleema hamo na likona lyobe.

⁶ Tunabipishi ngonehe bankakazetu, twatendele bya kutengama, pe twatendele bya kuluwa.

⁷ Bankakazetu oho bekalile mu Engepita, kaliha bayuvwishishile milimo yobe ya kukomokesha, bavulamine shishemo shobe shashinene sha mwaya myaka, eshe waholwele bikati byabingi, kami bafutulukilile na kulwisha Wakukangana ku Liwate lya Kufubila.

⁸ Hinge noho wabapulwishile ndaba ya lizina lyendi, ngayi mwanga amoneshe ngovu zendi zazinene.

⁹ Wambilile Liwate lya Kufubila, pe lyayumine nkwaa, wabapitishile mu limpunga ha limvu lya kuyuma.

¹⁰ Nohobene wabapulwishile ku liboko lya baya babazimbile, pe waba kulizile ku ngovu za bamalamo babo.

¹¹ Mema akupwile bamalamo babo, kowa umo wabo washalileho.

¹² Niho bantu bendi bakulupilile mazu wendi, pe bembilile nyimbo za kumuyemeza.

¹³ Ngoboni wanguwangu bavulamine milimo yendi, kami kaliha batatilile kubela kwendi.

¹⁴ Benzalile na likwilu mu libelelengwa, pe bezekele Nyambi mu libelelengwa,

¹⁵ nohobene niye wabapanine obyo banyepele, ngoboni kami watumine mukati kabo wulweli wakubula kutwesha kupangiwa.

¹⁶ Muyo mu munkungwa bengilile mwili Moshesha na Aloni, mukamulimo wa Nyambi ya Ngula wa kuyela.

¹⁷ Niho hanci hayahamine kumina Ndatani, na kufunda Ambilamu na kanzunga kendi.

¹⁸ Mundilo wezile ha bakakubakonka, pe wahokeshele bantu bakuluwa.

¹⁹ Batendele nkunzi wa ngolinde ku Holembu, niho balemeshele kayo kanankishi kakuyungulula.

²⁰ Nibo batambashanine wuwahe wa Nyambi, ku shifwekesha sha ngombe uya walyanga mwila.

²¹ Bavulamine Nyambi mulamwini wabo, Ou watendele byuma byabinene mu Engepita,

²² na milimo ya kukomokesha atendele mu litunga lya Hamu, na byuma bya kutinisha atendele ku Liwate lya Kufubila!

²³ Nohobene Nyambi wambile ngayi ukabalobesha, sha kubula Moshesha mukamulimo wendi wakuhatiwa, ou wabemaninine kuli Nyambi, watengulwile wukali wendi waku shinga kubalobesha.

²⁴ Bakanine litunga lyaliwahe, ndaba babulile kukulupila shikulupisho sha Nyambi.

²⁵ Bekalile mu zintanda zabo na kulinyenga, pe babulile kwombatala mazu a Nyambi ya Ngula.

²⁶ Nohobene wakatwile liboko lyendi pe wahahile ngayi ukabalobeshela mu libelelengwa,

²⁷ na kulobesha bazukulyabo mukati ka bakamatunga, na kubaleha ngayi bakafwile mu matunga ashenge.

²⁸ Niho ku Mbaalu waku Peyola aba bantu balifungilile mu kulemesha Mbaalu, kami balile zinkombela za kutupula kutunankishi.

²⁹ Bashonkomwene wukali wa Nyambi ya Ngula na zintendelo zabo, pe kwaholokele wulweli wakubula kutwesha kupangiwa mukati kabo.

³⁰ Ngoboni Fwinihashi wemanine pe washushwile baka Kubipisha, nohobene wulweli wakubula kutwesha kupangiwa wamanine.

³¹ Nohobene walabiwile kwinga wakulunga, kami shikekala ku mukoka na mukoka wakumbili.

³² Ku kaheloke ka Melimba bantu bapilamishile Nyambi ya Ngula, pe Moshesha wapukalile ndaba yabo.

³³ Bamushonkomwene shikuma mu mutima, pe Moshesha wambile mazu a kulokomoka.

³⁴ Kaliha bazihile bakakulemesha bakamatanga, ngonehe eshe abatongwezele Nyambi ya Ngula,

³⁵ ngoboni baliyekelele nabo na kuyambula biheka byabo.

³⁶ Balemeshele tunankishi twabo, eshe shaletele kuloba kwabo.

³⁷ Batupwile bana babo babalume na ba bambuyama kwinga zinkombela ku tunankishi.

³⁸ Bayitile mukeza wakubula mulandu, mukeza wa bana babo, aba bakombelelele ku tunankishi twa Bakenaani, pe litunga lyabipile na mukeza wabo.

³⁹ Balibipishile na ntendelo yabo, kami bengile bakubula kukulupiliwa kuli Nyambi mu ntendelo yabo yengile ngonehe wumambe.

⁴⁰ Nohobene wukali wa Nyambi ya Ngula wabangile ha bantu bendi, pe likona lyendi lyengile lya wunyengwe kukwendi.

⁴¹ Wabayakile ku ngovu za bakamatunga, na kuleliwa ku baya babazimbile.

⁴² Bayandishiwile na bamalamo babo, pe bekalile shikuma mu ngovu zabo.

⁴³ Nyambi ya Ngula wapulwishile bantu bendi bikati byabingi, ngoboni bahatile kumufutukila mu bifungo byabo, pe balobeshiwile mu wubi wabo.

⁴⁴ Hinge ndi kwengile noho, wabayuvwile oho bakalokelele kukwendi, kami wabayavwile mu makando wabo.

⁴⁵ Wanukile kulimama kwendi ndaba ya ba kuhakiwa bendi, pe wazinunukile ndaba ya shishemo shendi sha shinene sha mwaya myaka.

⁴⁶ Wapanine nimwabo aba babahetelenga mitima ya kubayuvwila nceshe.

⁴⁷ Obe Nyambi ya Ngula, Nyambi yetu, tupulwishe na kutufumisha mukati ka matunga, ngayi mwanga tukambilile ku lizina lyobe lya kuyela, na kuyemeza mu wuwahe wobe.

⁴⁸ Yemezenu Nyambi ya Ngula, Nyambi wa Ishalela, haya muyemezenu kufuma kushikale kuya mwaya myaka. Bantu nimwabo bambe ngayi, “Ameni!” Nyambi ya Ngula ayemeziwe!