Nyimbo 105 - Libuka Lya Kuyela

Nyambi na bantu bendi

¹ Kambililenu kuli Nyambi ya Ngula, yemezenu lizina lyendi, tongwezenu bantu nimwabo ebye anatende.

² Yimbilenu nyimbo za kuyemeza Nyambi ya Ngula, shimikilenu ha byuma bya kukomokesha ebye anatende.

³ Wahililenu mu lizina lyendi lya ku yela, mitima ya nobo bakulemesha Nyambi ya Ngula yitangale.

⁴ Shingashingenu Nyambi ya Ngula na ngovu zendi, shingenu lupala lwendi shikati nimwasho.

⁵ Anukenu bikomokesho ebye atendele Nyambi, na bilimukisho byendi nanebye aketwile ha kuyata,

⁶ enu bazukulya Abulahama mukamulimo wa Nyambi, na bana ba Yakobo babalume aba ahatile.

⁷ Nyambi ya Ngula niye Nyambi yetu, kuyata kwendi kuli hano hanci nimwaho.

⁸ Wanukanga kulimama kwendi mwaya myaka, kulimama oku alimamine ngayi kwikale ku mikoka ya likulukazi,

⁹ kulimama kuya alimamine na Abulahama, shikulupisho akulupishile Ishaki.

¹⁰ Kulimama oku ashumishile kuli Yakobo kwinga ndayano, na ku bantu ba Ishalela kwinga kulimama kwa mwaya myaka.

¹¹ Wambile ngayi, “Nikamipana litunga lya Kenaani, nilyo likenga likona lyenu.”

¹² Bantu ba Nyambi bengile babashe, bengile bayeni mu litunga lya Kenaani.

¹³ Bayambangililenga kufuma ku litunga limo na kuya ku lyamina, kufuma ku wene umo na kuya ku wamina.

¹⁴ Ngoboni Nyambi kaliha wetabilishile muntu ngayi abayandishe, wabakalihilile bamyene,

¹⁵ na kwamba ngayi, “Hinga mukwata ba kuwabishiwa bami, hinga mulemeka bamiluwe bami.”

¹⁶ Nyambi ya Ngula waletele kapande ku litunga lya Kenaani, pe wabipishile byakulya byabo nimwabyo.

¹⁷ Hinge noho watumine muntu kumbili yabo, Yoshefwa uya walandishiwile kwinga ndungo.

¹⁸ Mawulu wendi alemekiwile na nketwana, kami shikongo sha shondo shekalile mu ncingo yendi,

¹⁹ kutwala noho ebye alubulwile byengile bya kupwisha. Lizu lya Nyambi ya Ngula lyamuwanine ngayi wa kwoloka.

²⁰ Niho mwene wa Engepita wamushobwele, kalela wa bantu bayo wamushobwele.

²¹ Wamuyakile kwinga mukulwane wa litala lyendi, wamukwatile na kumwinga mukulwane ku bishete bya litunga nimwalyo,

²² ngayi akafundizizenga babilolo ba mwene omu akushingila, na ku longesha bakakumubela ngana.

²³ Niho Ishalela wayile ku Engepita, pe wazikile mu litunga lya Hamu kwinga lipukwenda.

²⁴ Nyambi ya Ngula wavulishile bantu bendi, pe wabapanine ngovu shikuma kupitakana bamalamo babo.

²⁵ Wafutwile Baengepita kuzimba bantu bendi, na kutenda na ku shoshoka ku bakamilimo bendi.

²⁶ Niho atumine mukamulimo wendi Moshesha, hamo na Aloni ou ahatile.

²⁷ Batendele bilimukisho bya Nyambi mukatikabo, na kutenda bikomokesho mu litunga lya Hamu.

²⁸ Nyambi watumine mincimpwe na ku shipisha mu litunga, ngoboni Baengepita kaliha bombatalile mazu wendi.

²⁹ Wafutwile mishinzi yabo mukeza, pe zinci zabo nimwazo zafwile.

³⁰ Litunga lyabo lyenzalile na mambotwe, hinge mu musheke wa mwene enzalilemo.

³¹ Nyambi ya Ngula wambile, pe matanga a banzinzi na mbalembale byezile mu litunga nimwalyo.

³² Watumine likandavula kupitakana mvula, na mimuni ha litunga lyabo,

³³ wabipishile mikolobozi yabo ya shinyanca na mitondo ya mikuyu, na kupokozola mitondo nimwayo.

³⁴ Nyambi wambile, pe mikumbi yezile, na tuhenya twa kubula kutwesha kulabiwa,

³⁵ yalile bya kumena nimwabyo mu litunga lyabo, na zimbuto nimwazo za mu mafuba wabo.

³⁶ Wazihile bamyeli babo nimwabo babalume mu litunga lyabo, ku mapashi nimwawo amu Engepita.

³⁷ Niho atutwishile Baishalela hinga bashimba shiliva na ngolinde, pe ku mishobo yendi kwabulile hinge umo wayile na kupukazala.

³⁸ Baengepita bawahililile oho Baishalela bafuminemo, ndaba babatinine shikuma.

³⁹ Nyambi wayakile likumbi ha bantu bendi, na liyeye lya mundilo ku wushiku ku bamunikila.

⁴⁰ Bamulombele, pe watumine bitentu, wabapanine byakulya bya muyilu byabingi.

⁴¹ Washinkwilile limanya, pe mema ashabukile, akunkwile mukati ka libelelengwa ngonehe mushinzi.

⁴² Wanukile kulimama kwendi kwa kuyela na Abulahama mukamulimo wendi.

⁴³ Niho atutwishile bantu bendi na ku wahilila, bayile na kwimbila na kuwulumwina na ku wahilila.

⁴⁴ Wabapanine matunga a bantu bashenge, pe bakonene mafuba a mikabo a litengela lya nobo bantu,

⁴⁵ ngayi bantu bendi bakalame lukuwa lwendi, na kwombatala mulao wendi. Yemezenu Nyambi ya Ngula!