Nyimbo 104 - Libuka Lya Kuyela

Kuyemeza Shakalenga

¹ Yemeza Nyambi ya Ngula, obe moyo wami! Obe Nyambi ya Ngula, Nyambi yami, uli wamunene shikuma! Unavwala maleema na wuwahe.

² Unalifwiki liyeye ngonehe shivwalo. Unatandubulu mayilu ngonehe shiya batandubulanga ntanda,

³ unayala mikambo ya matala wobe hayilu ya mema. Ukwingisha makumbi kwinga makoloyi obe. Ukukandama ha mbando za mpepo.

⁴ Ukuliyavwisha mpepo ngo bantumwana, na mulangi wa mundilo kwinga bakamilimo bobe.

⁵ Unemiki kaye na kukashumisha ha mwimbi wako, kukahenyeshiwa kami kafwako.

⁶ Wafwikile liwate hahako ngonehe shikobelo, pe mema afwikile ha mapili.

⁷ Oho wakalihile mema, atinine, oho ayuvwile lizu lyobe lya kumbyazeka, mema akunkwile.

⁸ Akankalalile ha mapili, na kukunkula mu mikulo ku zimbalila wa watendelele.

⁹ Wayakile nginza eye a kubula kutwesha kukiluka, kuwakanisha kukupula hanci kami.

¹⁰ Ukukukishila tuheloke mu mikulo, pe mishinzi yikukunkula mukati ka mapili,

¹¹ na kupana mema ku tuyamana twa lishaka nimwato, na bambongolo ba kumanisha linyontwa lyabo.

¹² Tuyoni tukutenda mahwa watwo ku mitondo ya hahepi na mushinzi, na ku showela mukati ka myahi.

¹³ Ukuyitilila mapili na mvula wakufuma ku mwanya wobe wakuyilu, hanci hana konkana na mikabo ya milimo ya maboko wobe.

¹⁴ Ukumeneshela tuyamana mwila, na kumenesha mbuto ngayi muntu aliyavwishe, ngayi mwanga bitutwishe byakulya hanci,

¹⁵ na kuyema waine ngayi yimu wahililishenga, na mazi a olive akumubyazimisha, na linkende lya kumupana ngovu.

¹⁶ Mitondo ya Nyambi ya Ngula yikutambula mvula wamwingi, mitondo ya shinda ya mu Lembanoni eye ashangile.

¹⁷ Kuya twatendelanga tuyoni mahwa watwo, tunyange batendelanga minzi yatwo ku mitondo ya mupaini.

¹⁸ Bampongo ba lishaka bekala ha mapili amatali, kami masheha aholamanga mu manzolongoma.

¹⁹ Walengele ngonda ngayi atapulule bikati mu mwaka, mutena ukulimuka shikati sha kulela kwawo.

²⁰ Wayakile mincimpwe ngayi yiletenga wushiku, pe tuyamana twa lishaka ba kulyendela nahiya.

²¹ Bana ba babimbwi ba kubulumina ha kushinga mbuyo yabo, bakushinga byakulya ebye akubaholwela Nyambi.

²² Ha kututika kwa mutena babokanga na kulala mu mamfwenke wabo.

²³ Bantu batutikanga na kutenda milimo yabo, ba kutenda kutwala na ku mazolo.

²⁴ Obe Nyambi ya Ngula, unatende byuma byabingi! Wabitendele nimwabyo na ngana! Hanci hanenzala na bibumbwabumbwa byobe.

²⁵ Kuli liwate lyalinene lya ku yahama, oku kwekala bibumbwabumbwa bya kuyoya, bya kubula kutwesha kulabiwa, byabinene na byabishe.

²⁶ Mato amanene akupitamo, na Libiyatani ou watendele nimo atumpozokanga mu liwate.

²⁷ Ebye nimwabyo byakinka mitima hahobe, ngayi ubapane byakulya oho ba kubishinga.

²⁸ Obe ukubapanabyo pe nibo ba kubikungulwila hamo, oho ukufukulula liboko lyobe na ku balela, pe nibo bakwikuta na byakulya byabiwahe.

²⁹ Oho ukuholeka lupala lwobe, pe ba kutina, oho ukufumisha kwoya kwabo, ba kufwa na kuboka ku lukungu.

³⁰ Ngoboni oho ukwoya, nibo ba kulengiwa, Obe watendanga kami wupya ku moneka kwa hanci.

³¹ Mwanga wuwahe wa Nyambi ya Ngula ukekale mwaya myaka! Nyambi ya Ngula mwanga awahilile nanebye anatende!

³² Oho wapenzanga hanci, pe hakankanga, oho wakwatanga mapili, atutumanga wishe.

³³ Nikembilila Nyambi ya Ngula mu kuyoya kwami nimwako, nikayemeza Nyambi aha nishili kuyoya.

³⁴ Mwanga bihanganiko byami bimuwahilishe, ndaba nikutangala muli Nyambi ya Ngula.

³⁵ Baka wubi mwanga balobeshiwe kufuma hano hanci, mwanga bakuluwa hinga bamoneka kami! Yemeza Nyambi ya Ngula, obe moyo wami! Yemezenu Nyambi ya Ngula!