Nyimbo 103 - Libuka Lya Kuyela

Shishemo sha Nyambi

Lwimbo lwa Ndavita

¹ Yemeza Nyambi ya Ngula, obe moyo wami! Wuntu nimwawo uyemeze lizina lyendi lya kuyela!

² Yemeza Nyambi ya Ngula, obe moyo wami! Kami hinga uvulama bitandalisho byendi nimwabyo.

³ Wayatilanga milandu yobe nimwayo, na kunyongomanisha malweli wobe nimwawo.

⁴ Wakulizanga wumi wobe ku shizimbi, wakuvwikanga munana wa shishemo na nceshe.

⁵ Wekutishanga wumi wobe na byuma byabiwahe, ngayi winge ndumbana na ku shuma ngonehe ngonga.

⁶ Nyambi ya Ngula wayatanga mu kupwisha, wapananga binabafwanini kuli bakuyandishiwa.

⁷ Waholwele zinzila zendi kuli Moshesha, na ku monesha milimo yendi yayinene ku bantu ba Ishalela.

⁸ Nyambi ya Ngula wa shikeketima na nceshe, wehalanga kupilama, kami wenzala na shishemo sha mwaya myaka.

⁹ Kukazamina ku shuza mwaya myaka ufwako, kami kaliha watwalililanga kupilama.

¹⁰ Kaliha watu shushulanga ngonehe kuku bipisha kwetu, hinge kutu hingishila ngonehe ku milandu yetu.

¹¹ Ngonehe liyilu lyekala kwakutali na hano hanci, nisho shili shishemo shendi sha mwaya myaka ku nobo ba kumutina.

¹² Ngonehe wutali waku mushamuko kukuma ku mponci, nisho kami anafumishi kukwetu milandu yetu.

¹³ Ngonehe tata muntu ayuvwilanga nceshe mwanendi, nisho kami Nyambi ya Ngula ayuvwilanga nceshe baya ba kumutina.

¹⁴ Ndaba niye walimuka eshe twabumbiwa, wanukanga ngayi etu twenga lukungu.

¹⁵ Neheboni muntu, wumi wendi wafweke ngonehe mwila, wakulanga na kutama ngonehe maluba amu mfuba.

¹⁶ Oho mpepo yikupepokelaho maluba a kupulumuka, pe ha mwanya uyo kowa ukawamona kami.

¹⁷ Ngoboni shishemo sha Nyambi ya Ngula, sha mwaya myaka shili hali baya ba kumutina, kami kulunga kwendi kukekala ku bihemunwino byabo nimwabyo,

¹⁸ obo ba kulama kulimama kwendi, na kwanuka ndayano na kuzitenda.

¹⁹ Nyambi ya Ngula wunashumishi litanda lyendi mu mayilu, kami wene wendi ukulela nimwabyo.

²⁰ Yemezenu Nyambi ya Ngula, enu mangeloyi bendi, enu bangovu mukwombatala lizu lyendi, enu mukwombatala ebye akwamba.

²¹ Yemezenu Nyambi ya Ngula, enu makunge wendi, enu bakamilimo bendi mukutenda sha mutima wendi.

²² Yemezenu Nyambi ya Ngula, enu bibumbwabumbwa byendi nimwabyo, mu zimbalila nimwazo a kulela. Yemeza Nyambi ya Ngula, obe moyo wami!