Nyimbo 102 - Libuka Lya Kuyela

Lilombelo lya ndumbana

Lilombelo lya muntu uli mu wukalu, uli na kulinyenga kuli Nyambi ya Ngula

¹ Obe Nyambi ya Ngula, yuvwilila lilombelo lyami, yuvwilila kulila kwami kwa kuyavwiwa kukwobe.

² Ha mutena wami wa malwa, hinga uholeka lupala lwobe kukwami. Nyuvwilile, pe unkumbule wangu oho nikwihana.

³ Wumi wami uli na kuzimina ngonehe wishe, lutu lwami luli na kubanga ngonehe mundilo wamu ngaanze.

⁴ Mutima wami unamfumfuliwi ngo mwila unalebuku, na vulama na kulya byakulya byami.

⁵ Lutu lwami luna shala tuhu shikonde na bifupafupa, ndaba ya ku shunga kwami kwakunene.

⁶ Nafweke ngonehe likubi wa mu libelelengwa, nafweke ngonehe likungulu linashala mu mapembe.

⁷ Nayumu mumeho, nafweke ngo kayoni kali ninkayako ha shihoke.

⁸ Bamalamo bami bakuhandula mwapita mutena, ba kunkumangiza na kuliyavwisha lizina lyami ha ku nkuta.

⁹ Nikulya mutoko ngonehe nikulya byakulya, mihozi yinalivwele na bya kunwa byami,

¹⁰ ndaba ya wukali wobe na kupilama kwobe. Unankatulu na kunyumbila kwakutali.

¹¹ Wumi wami unengi ngo mumvulu wa mazolo, nafweke ngo mwila wakuyuma.

¹² Ngoboni, Obe Nyambi ya Ngula, ukekala ha litanda lyobe mwaya myaka. Bihemunwino nimwabyo bikatoyanga lizina lyobe.

¹³ Obe ukakatuka na kuyuvwila Ziyoni nceshe, shikati shinakumu sha ku muyuvwila nceshe, shikati shakumakale.

¹⁴ Bakamilimo bobe bahaka luya lukena lwa Ziyoni, hinge ndi lunalobeshiwi na kufutuka lipembe, ba kuluyuvwila nceshe.

¹⁵ Matunga akatina lizina lya Nyambi ya Ngula, bamyene nimwabo ba hanci bakatina wuwahe wendi.

¹⁶ Nyambi ya Ngula, oho akatendulula Ziyoni, ukaholoka mu wuwahe wendi.

¹⁷ Ukakumbula lilombelo lya bantu bendi afutaminine, kukakana kulambilila kwabo ufwako.

¹⁸ Haya tikitila bihemunwino bikeza kumbili, hanebye anatende Nyambi ya Ngula, nohobene ngayi bantu bashili kuhemuwa bakamuyemeze.

¹⁹ Nyambi ya Ngula, wapenzele hanci ku mwanya wendi wa kuyela, wapenzele hano hanci hinga ekala kuyilu,

²⁰ ngayi ayuvwe ku shunga kwa bantu bali mu tolongo, niho ashobwele obo bayatiwilile kufwa.

²¹ Ngayi bantu mwanga babilike lizina lya Nyambi ya Ngula mu Ziyoni, pe ukayemeziwa mu Yelushalema,

²² oho mishobo ya bantu na wene bakakunguluka hamo, ngayi balemeshe Nyambi ya Ngula.

²³ Nyambi ya Ngula unambulishi ngovu oho nishili kanuke, unaketawizi wumi wami.

²⁴ Nikwamba ngayi, “Obe Nyambi yami, hinga uncimba oho shilolo nikulumpale. Obe Nyambi ya Ngula wayoya mwaya myaka, kubihemunwino nimwabyo.”

²⁵ Ha kutatika wa yalile mimbi ya hanci, wa tendele mayilu na maboko wobe.

²⁶ Nimwabyo ebye bikaloba, ngoboni Obe ukashala, nimwabyo bika kulumpala ngonehe bivwalo.

²⁷ Ngoboni Obe kaliha wafutukanga, ukekalilila pe wumi wobe kukamana ufwako.

²⁸ Banabetu etu bakamilimo bobe bakalamiwa shiwahe, kami bazukulyabo bakalamiwa.