Nyimbo 101 - Libuka Lya Kuyela

Shikulupisho sha Mwene

Lwimbo lwa Ndavita.

¹ Obe Nyambi ya Ngula, nikembila ha shishemo shobe na nyatilo yobe ya kupwisha.

² Nyinkalo yami yikenga ya kubula mulandu. Kati mwaka ngani ukeza kukwami? Kuyoya kwa mu litala lyami kukenga kwakuwahe.

³ Nifwako kuketabila ngayi meho amone byabibi. Nazimba ntendelo ya nobo banafutamini Nyambi, kukaliyuvwa nabo nifwako.

⁴ Kukashinga kwikala na ba mitima ya kukontama nifwako, kami kukatendanga byabibi nifwako.

⁵ Nikanongesha muntu nimwendi ukutungula ndambo yendi ha byuma byabibi, kuketabila muntu wakuliyemeza na kulilundumika nifwako.

⁶ Nikayameza nimwabo obo benga bakwoloka mu litunga, kami nika betabila ngayi bekale na nami. Obo banombatala shiwahe nikabetabila ngayi bantendele mulimo.

⁷ Muntu wa shishweka kukekala mu litala lyami ufwako, kowa wa mahalo ukekala ku meho ami.

⁸ Ha mutena ha mutena nikalobesha bakuluwa mu litunga, nikatanda bantu bakuluwa mu lukena lwa Nyambi ya Ngula.