Nyimbo 10 - Libuka Lya Kuyela

Lilombelo lya kunyepa kuyata kwa kupwisha

¹ Obe Nyambi ya Ngula, kati shumangani unemanini hahatali? Kati shumangani unaholamini ha bikati bya makando?

² Bakuluwa bakuliyemeza na kuyandisha ba kushepwa, mwanga nyimbwa banamanyiki zikabakwate.

³ Muntu wakuluwa ukuliyemeza na bifungo bya mu mutima wendi, ou muntu wa mutongo ukuhandula na kukana Nyambi ya Ngula.

⁴ Muntu wakuluwa kulifulankana Nyambi ufwako, na mutima wakuliyemeza ukwamba ngayi, “Nyambi kowa.”

⁵ Mukawubi ukutangama mu byuma nimwabyo, ku yuvwishisha nyatilo ya Nyambi ufwako, ukukendula bamalamo bendi.

⁶ Ukulyambashana niyemwine ngayi, “Nifwako kukahenyeshiwa, nifwako kami kukamona makando.”

⁷ Mu kanwa kendi munenzala matuka na mahalo na mafumbila, ha lulimi lwendi hali mishunga na byabibi.

⁸ Ukubelamina hahepi na minzi, ukuziha bantu bakubula mulandu. Meho wendi akupenza na nkole ku bakakuyanda.

⁹ Ukubelamina ngonehi shimbwi mu limfwenke lyendi, ukubelamina ba kuyanda. Ukukwata ba kushepwa na ku bakokela mu kantamba kendi.

¹⁰ Bakupopa banacancoliwi, muntu wa nyala unabapitakana.

¹¹ Bakuluwa ba kulyambashana ngayi, “Nyambi unavulama, unafwiki ha meho kami ku mona ufwako.”

¹² Obe Nyambi ya Ngula, katuka. Monesha ngovu zobe, Obe Nyambi. Anuka bakakuyanda.

¹³ Kati wakuluwa ukutwesha nahiti kulimbwilisha Nyambi, na kwamba niyemwine ngayi, “Kukancushula ufwako?”

¹⁴ Ngoboni Obe Nyambi, watoshanga makando a bakakuyanda, pe kaliha wehalanga ha ku bayavwa. Wakupopa ukuyendamina kukwobe, ndaba obe wayavwanga banginga.

¹⁵ Fwomona ngovu za bakuluwa naza bantu bababi. Bashushule, ndaba ya byabibi ebi banatende, hantu banashiyi wubi nimwawo.

¹⁶ Nyambi ya Ngula niye mwene mwaya myaka. Ukafumisha bakakulemesha ba nyambi bowa mu litunga lyendi.

¹⁷ Obe Nyambi ya Ngula, ukuyuvwilila ku malombelo a bakakulilimbwilisha, ukashumisha mitima yabo na kutengeka litu lyobe.

¹⁸ Ukayuvwa kulila kwa banginga na bakakulyatililiwa, ukabayata mu kubayamiziza, nohobene ngayi bantu mwanga bakabule kukekala kami na mutentu.