Ngalatiya 6 - Libuka Lya Kuyela

Lishimbishenu byabilemu umo na wamina

¹ Bawushinda, ndi muntu ukuwaniwa na mulandu, enu mu kutwamininiwa na moyo, mubokeshenu mu nzila ya kwoloka. Ngoboni keyenu, kutina nenu kami mwezekiwa.

² Lishimbishenu biya binalemenene umo na wamina, ha kutenda noho, mukwinzalishilila ndayano za Kilishitu.

³ Ndi muntu ukulihanganika niye mwine ngayi wamunene, oho niye nengi muntu wowa, ukulyongeza niye mwine.

⁴ Ngoboni muntu nimwendi ezeke milimo yendi, ndi yayiwahe, pe ukaliyemeza ndaba ya milimo yendi, kaliha na milimo ya muntu wamina.

⁵ Ndaba muntu na muntu uli na muziho wendi niye mwine.

⁶ Muntu ukulilongesha lizu lya Nyambi, alitapile na mulongeshi wendi mu byuma nimwabyo byabiwahe.

⁷ Hinga mulyongeza, Nyambi kaliha ukwongeziwa. Ndaba nimwasho akukuba muntu, nisho kami akateza.

⁸ Ndaba muntu ukukuba bya mahungu amabi a wuntu, ku nawa mahungu ukateza lufu. Ngoboni muntu ukukuba bya kuwahililisha Moyo, pe ku Moyo ukateza wumi wa mwaya myaka.

⁹ Hinga tukwanga kutenda shiwahe, ndaba ha shikati sha kufwanina tukateza, ndi tufwako kupopa.

¹⁰ Nohobene, oho tushili na shikati, tutende shiwahe ku bantu nimwabo, shinene ku bawushinda wetu bakakukulupila.

Kushiwulula na kushangwisha kwa mamaninino

¹¹ Monenu eze zitaku zazinene nilinakumitikitila na liboko lyami!

¹² Bantu bakushinga kumi kandamika ngayi muye ku mukanda ba kutenda noho ndaba bakushinga kulimonesha na kuliyemeza ha byuma bya ha munkanda, ba kutina kuyandishiwa ndaba ya shishempakano sha Kilishitu.

¹³ Ndaba hinge nibo aba banayi ku mukanda, ku lama mulao bafwako, ngoboni bakushinga ngayi muye ku mukanda, pe mwanga baliyemezele hahenu.

¹⁴ Ngoboni ami kuliyemeza nifwako, nikaliyemeza tuhu na shishempakano sha Mwene wetu Yeshu Kilishitu, ndaba kupitila ha shishempakano shendi, kukwami kaye kanafu na nami kami ninafu ku kaye.

¹⁵ Kuya ku mukanda hinge kubula kuya ku mukanda kaliha nisho shuma shashinene, ngoboni shuma shashinene ngayi muntu enge shibumbwabumbwa shashipya.

¹⁶ Nyambi abapane ku mwena, kami ekale nabo na nceshe bantu ba Nyambi nimwabo ba kukonka nzila eye.

¹⁷ Ha kumaninina, muntu wamina hinga anyandisha, ndaba nili na mabenga ha lutu lwami aku monesha ngayi nili ndungo wa Mwene Yeshu.

¹⁸ Bawushinda wami, nceshe za Mwene wetu Yeshu Kilishitu zikale nenu nimwenu. Ameni.