Ngalatiya 5 - Libuka Lya Kuyela

Kushoboloka muli Yeshu

¹ Kilishitu unatushobolo ngayi twikale ba kushoboloka, haya kalamanenu, hinga mumangiwa kami na mpongoho ya wulungo.

² Yuvwililenu! Ami Paulu nikumitongweza ngayi ndi mukwitabila kuya ku mukanda, pe muli na kutontolola ngayi kukwenu Kilishitu kuyavwa wufwako.

³ Nikwamba kami ngayi ndi muntu ukushinga kuya ku mukanda nafwanini kulama ndayano nimwazo.

⁴ Enu mukushinga kwinga bakwoloka kuli Nyambi hakwombatala ndayano, munalifumishi kuli Kilishitu, nohobene munalifumishi ku nceshe za Nyambi.

⁵ Ngoboni na kukulupila, tukutatilila hinga twawahilila kupitila mu Moyo ngayi tutambule kwoloka oku tukulumbeza.

⁶ Ndaba muli Yeshu Kilishitu, kuya ku mukanda hinge kubula kuya ku mukanda kuyavwa bifwako, ngoboni shashiwahe ngayi muntu ekale mu kukulupila kuya kukuholola milimo ya shishemo.

⁷ Munendenga shiwahe, kati yani unamikanishi kwombatala kupwisha?

⁸ Oku kukandamikiwa kaliha kukufuma kuli ou wamihanine.

⁹ Mumena wawushe watundishanga muvuba nimwawo.

¹⁰ Nili na shikulupilo muli Mwene, ngayi mukabula kuhanganika byashenge. Ngoboni ou nimwendi ukumishanwisha Nyambi ukamuyata.

¹¹ Ngoboni ami, bawushinda, ndi nishili ku shimikila ngayi bantu bayenga ku mukanda, pe ndabangani nishili kuyandishiwa? Shinga shili nahiyo, shinga ebye ni ku shimikila bya shishempakano sha Yeshu, shinga kuleta wukalu bifwako.

¹² Nikushinga ngayi nibo ba kumishanwisha, bapitakanishe kutenda noho, pe balihengole nibo bamwine.

¹³ Bawushinda wami, Nyambi wamihanine ngayi mwikale ba kushoboloka. Ngoboni keyenu ngayi mubule kwingiza ku shoboloka kwenu mu byuma bya wuntu, ngoboni litendelenu milimo umo na wamina mu shishemo.

¹⁴ Ndaba ndayano nimwazo za Nyambi zinenzala mu lizu limo lya ndayano ngayi, “Haka ndambo yobe ngonehe walihaka obe mwine.”

¹⁵ Ngoboni ndi mu kulihuma na kulilemeka umo na wamina ngonehe tuyamana twa mu lishaka, keyenu kutina mulilobesha umo na wamina.

Moyo na wuntu

¹⁶ Shuma nikushinga kwamba eshe, endenu mu Moyo ngayi mubule kwinzalisha mahungu a wuntu.

¹⁷ Ndaba wuntu walwishanga Moyo na Moyo kami walwishanga wuntu. Nibyo wubili wabyo byalilwishanga, nohobene kutwesha kutenda byuma ebye mukushinga mufwako.

¹⁸ Ngoboni ndi Moyo ukumitwaminina, pe enu kaliha muli mu nceto ya ndayano.

¹⁹ Milimo ya byuma byabibi bya wuntu yenga eye, wunjenge na mazilo na lwiholwiho,

²⁰ kulemesha tunankishi na wulozi na nzimbo na nkani na lihungu na wukali na kulilundumika na mishunga na kulilwisha,

²¹ mwili na kukolwa na mutongo na bya kulifweka nanebye. Nikumishiwulula ngonehe namitongwezele ngayi nibo ba kutenda byuma bya nahiyo, kukakona Wene wa Nyambi bafwako.

²² Ngoboni mikabo ya Moyo yenga eye, shishemo na ku wahilila na ku mwena na lunzewe na kubomba na kuwahisha na kukulupila,

²³ kulilimbwilisha na kulizilikila. Byuma ebye kowa ndayano za kubikanisha.

²⁴ Nibo bali muli Kilishitu Yeshu banakoleke ha shishempakano nyinkalo yabo yayibi na mahungu nimwawo.

²⁵ Ndi tukuyoya mu Moyo, pe Moyo niwo unafwanini kututwaminina.

²⁶ Hinga tulilundumika, hinge kulipilamisha, hinge kwikala na mwili ku umo na wamina.