Ngalatiya 4 - Libuka Lya Kuyela

¹ Shuma nikushinga kwamba eshe, ncwana oho ushili kanuke, kutapuluka wufwako kuli ndungo, hinge ndi niye mwine wa byuma nimwabyo.

² Oho ushili kanuke, uli mu nceto ya bakakumulela na bakakulama byuma byendi, kutwala ku shikati eshe anayaka tatiyendi.

³ Pe nanetu kami, oho twengile batwanuke, twengile bandungo ku myoyo ya hano ha kaye.

⁴ Ngoboni oho shikati sha kumine, Nyambi watumine Mwanendi, ou wahemuwile ku mukazi, kami wahemuwilile mu ndayano,

⁵ ngayi akulize aba bekalile mu nceto ya ndayano, ngayi ha kutenda noho etu twinge bana ba Nyambi.

⁶ Ndaba ngayi muli bana bendi, Nyambi unatumu Moyo wa Mwanendi mu mitima yetu, ou Moyo ukumyambisha ngayi, “Tate, Tate.”

⁷ Nohobene kaliha ushili kami ndungo, ngoboni uli mwana, ndaba uli mwana, Nyambi unakwingi kami ncwana.

Shitima sha Paulu ku Bakangalatiya

⁸ Mwaka kaliha mwalimukile Nyambi, mwengile bandungo ku byuma bya kubula Wunyambi.

⁹ Ngoboni wuluno munalimuku Nyambi, hinge shinene nambe ngayi munalimukiwi kuli Nyambi. Haya ndabangani mu kubokela ku myoyo yowa ya kubula kuyavwa? Ndabangani kami mukushinga kwinga bandungo kukwabyo?

¹⁰ Mukulama matena na zingonda, bikati na myaka.

¹¹ Nili na bowa, kampe milimo yami nimwayo natendele kukwenu yikuya mwanahiya.

¹² Bawushinda, nikumilomba ngayi, mufweke ngonehe ami, ndaba nami kami nafwekele ngonehe enu. Kaliha munambipishili.

¹³ Mu kulimuka ngayi, oho natatikile ku shimikila ncango zaziwahe nakolelenga.

¹⁴ Hinge ngayi makolano ami engile shezeko kukwenu, ngoboni kaliha mwankendwile, hinge kunkenda, ngoboni mwantambwile ngo lingeloyi lya Nyambi, hinge ngonehe Kilishitu Yeshu.

¹⁵ Kati ku wahilila kwenu nimwako kuli kuti? Nikumipakila ngayi ha shikati shiyo, shinga shengile shuma sha kutwesheka, shinga mwatompwele meho wenu na kuwampanika.

¹⁶ Kati nengakale mukankole wenu, ndaba ya kumitongweza kupwisha ndi?

¹⁷ Bantu bamina ba ku monesha shishemo kukwenu, ngoboni bihanganiko byabo kaliha byabiwahe. Shuma bakushinga kumifumisha kukwami, ngayi muwile kukwabo.

¹⁸ Shuma shashiwahe ngayi muntu enge wa shishemo na bihanganiko byabiwahe bikati nimwabyo, kaliha oho nili tuhu nanenu.

¹⁹ Enu bana bami ba kuhakiwa! Nikuyuvwa kami kukola ndaba yenu, ngonehe ayuvwanga mbuyama ndi uli hahepi na ku shalaho. Pe shikatendiwa noho hantu Kilishitu naziki mumwenu.

²⁰ Nikushinga shikuma ngayi shinga nili nenu ha shikati shino, shinga ninawana nzila yamina ya kwamba nenu, ndaba nikulikekula shikuma hahenu.

Hangali na Shala

²¹ Enu mukushinga kwikala mu nceto ya ndayano, kati ku yuvwishisha ndayano ebye zikwamba mufwako ndi?

²² Ndaba kwatikitiwa ngayi Abulahama wekalile na bana babili, umo ku mukazi wa ndungo, wamina ku mukazi wakushoboloka.

²³ Mwana ou wahemuwile ku mukazi wa ndungo, wahemuwile mu shiheka sha wuntu. Ngoboni ou wahemuwile ku mukazi wakushoboloka wahemuwile na shikulupisho sha Nyambi.

²⁴ Byuma ebye byenga bifwekesha. Baya bakazi bakwimanina kulimama kwa Nyambi kubili, kulimama kwa ha Lipili lya Shinayi, kukwimanina Hangali mu ka bana ba wulungo.

²⁵ Hangali ukufweka ngonehe Lipili lya Shinayi mu litunga lya Alembiya, ukwimanina Yelushalema wa wuluno, ndaba uli mu wulungo hamo na bana bendi.

²⁶ Ngoboni Yelushalema wa muyilu wenga wakushoboloka, ou niye mandiyetu.

²⁷ Ndaba kwatikitiwa ngayi, “Wahilila, obe mbuyama wa mumba! Obe wakubula bana, wulumwina na kubilikiza kwa ku wahilila, obe wabula kuyuvwa malwa a kubeleka! Ndaba mukazi bakanine uli na bana babengi kupitakana ou uli na mulume.”

²⁸ Haya enu bawushinda, muli bana ba shikulupisho ngonehe Ishaki.

²⁹ Ha shikati shiyo mwana wahemuwile mu shiheka sha wuntu, wayandishile ou wahemuwile na ngovu za Moyo wa Nyambi. Pe nisho shili na shikati shino.

³⁰ Ngoboni byatikitiwa bikwamba nahiti? Ngayi, “Tanda ou mbuyama wa ndungo na mwanendi, ndaba ou mwana mbuyama wa ndungo ku fwanina kukona shitapilo sha wuheti wobe wufwako na mwana mukazi wakushoboloka.”

³¹ Pe bawushinda, etu kaliha tuli bana ba mukazi wa ndungo, ngoboni tuli bana ba mukazi wakushoboloka.