Ngalatiya 2 - Libuka Lya Kuyela

Paulu na bantumwana bamina

¹ Munyima ya myaka likumi na yinaa nakankalalile kami ku Yelushalema nayile na Mbanambashi napitwile na Taitashi.

² Nayileko ndaba Nyambi wamoneshele ngayi ninafwanini kutenda noho. Nakaliwanine na bakakutwaminina, pe kwaninkayetu nabatongwezele bya ncango ziya ni ku shimikila ku Bakamatunga, ndaba kaliha nashingile ngayi mulimo ou natendele mwaka, hinge ou nili na kutenda ngayi ukwangane.

³ Hinge Taitashi ou nekalilenga nendi, hinge ndi niye wengile Kangiliki, kaliha wakandamikiwile ngayi aye ku mukanda,

⁴ hinge ndi bamo bashingile ngayi shitendiwe noho balimonekeshele ngo bawushinda wetu bakakukulupila, aba balume benginine na ku shoshoka mu kanzunga ketu, ngayi mwanga bashingishishe ku shoboloka kuya tuli nakwo muli Yeshu Kilishitu, pe mwanga batweshe kutwinga bandungo.

⁵ Kaliha twabetabilile hinge tuhu mu kashikati kakashe, twengile nahiyo ngayi mwanga kupwisha kwa ncango zaziwahe kwikale hamo nanenu.

⁶ Ngoboni baya bamonekele kwinga bakakutwaminina, nikwamba ebye, ndaba ami kaliha namonene kutapuluka mumwabo. Nyambi kuhota muntu wufwako, kowa bihanganiko byamina bawezelele ku ncango zami.

⁷ Ngoboni hinge noho, bamonene ngayi Nyambi unampana mulimo wa ku shimikila ncango zaziwahe ku Bakamatunga, ngonehe apanine Pita mulimo wa ku shimikila ncango zaziwahe ku Bayunda.

⁸ Nyambi ou watendelenga milimo muli Pita uya wengile ntumwana ku Bayunda, niye kami watendelenga milimo mumwami ami nengile ntumwana ku Bakamatunga.

⁹ Yakoba na Pita na Yowano, aba bengile bakakutwaminina oho batoshele ngayi Nyambi unampaniki ncango zendi za nceshe, balilumikilile nanetu, pe batukwatile mu maboko, ami na Mbanambashi ku monesha ngayi tulihamo. Twaliyuvwile ngayi ami na Mbanambashi tuye ku Bakamatunga nibo baye ku Bayunda.

¹⁰ Ngoboni shuma banyepele tuhu ngayi twanukenga bakakushepwa, eshe nisho shuma nashingilenga shikuma kutenda.

Paulu ukunyanca Pita ku Antiyoke

¹¹ Ngoboni oho Pita ezile ku Antiyoke namunyancile mukati ka bantu, ndaba wabipishile.

¹² Ndaba oho balume baya atumine Yakoba shilolo ba kume, Pita walilenga na Bakamatunga bakakukulupila, ngoboni oho bezile, wabengukile na kulitapulula ku Bakamatunga, ndaba watinine bakakanzunga ka mukanda.

¹³ Na Bayunda bamina nanibo kami batatikile kwikala na bowa ngonehe Pita, pe ndaba ya shishweka shabo na Mbanambashi naniye kami wakonkele ebye batendele.

¹⁴ Ngoboni oho namonene ngayi kaliha ba kutenda bya kupwisha kwa ncango zaziwahe nambile na Pita ku meho a bantu nimwabo ngayi, “Ndi obe uli Kayunda, ngoboni ukuyoya ngonehe Mukamatunga, kaliha ngonehe Kayunda, haya shumangani ukukandamika Bakamatunga ngayi bayoye ngo Bayunda?”

Bayunda na Bakamatunga ba kupuluka na kukulupila

¹⁵ Etu tuli Bayunda mu shihemwa, kaliha tuli bakawubi ngonehe Bakamatunga,

¹⁶ ngoboni tukulimuka ngayi muntu kaliha ukwolokeshiwa na milimo ya ndayano, ngoboni na kukulupila muli Yeshu Kilishitu. Nanetu kami tunayaka kukulupila kwetu muli Yeshu Kilishitu, ngayi mwanga twinge bakwoloka kuli Nyambi ha kukulupila muli Kilishitu, kaliha na milimo ya ndayano, ndaba kowa muntu ukwolokeshiwa na milimo ya ndayano.

¹⁷ Ngoboni ndi tukushinga kwolokeshiwa muli Kilishitu, pe tuku fwanina kulimuka ngayi nanetu tuli ngonehe Bakamatunga. Kati tukwamba ngayi Kilishitu nengi mukamulimo wa wubi ndi? Byo, kaliha noho!

¹⁸ Ndaba ndi nikutenda kami byuma biya nalobeshele mwaka, pe nikulimonekesha amimwine ngayi nili mukakukiluka ndayano.

¹⁹ Ndaba kuya na ndayano, ami ninafu ku ndayano, ngayi mwanga niyoye kuli Nyambi.

²⁰ Nakolekiwi hamo na Kilishitu, haya kaliha ami nikuyoya, ngoboni Kilishitu niye ukuyoya mumwami. Kami wumi ou nikuyoya shikati shino mu wuntu, nikuyoya na kukulupila muli Mwana Nyambi, ou wahakile ami, pe wapanine wumi wendi ndaba yanami.

²¹ Kukana nceshe za Nyambi nifwako, ndaba ndi kwoloka kukuwaniwa mu ndayano, pe Kilishitu kowa ebye afwililile.