Nehemiya 9 - Libuka Lya Kuyela

Bantu ba kulitabila wubi wabo

¹ Baishalela bakungulukilile hamo ha mutena wawumakumi abili na anaa wa ngonda oyo bene na kuzila kulya, mu ku monesha wunginga wa wubi wabo. Bavwalile bivwalo bya mincangwe na kulifukwila limvu ha mitwe yabo kwinga shimonekesho sha wunginga wabo.

² Pe Baishalela balitapulwile nibo bamwine na bantu ba mishobo yashenge yamu litunga. Niho bemanine, pe batatikile kulitabila wubi uya batendele nibo, hamo na kuluwa kwa bankakazabo.

³ Mazu a Nyambi ya Ngula, Nyambi yabo, alabiwile kukwabo bikati bihatu, pe kami bikati bihatu, balitabilile wubi wabo na kulemesha Nyambi ya Ngula, Nyambi yabo.

⁴ Ha katambo ka Balevi, hemanine ba Yeshuwa na Mbani na Kandimiyele na Shembaniya na Mbuni na Shelembiya na Mbani na Kenani. Nibo balombelelenga naku bilikiza shikuma kuli Nyambi ya Ngula, Nyambi yabo.

⁵ Kami Balevi aba batwamininine bantu mu kulemesha bengile ba Yeshuwa na Kandimiyele na Mbani, Hashambineya na Shelembiya na Hondiya na Shembaniya na Petahiya. Nibo bambile ngayi, “Katukenu na kuyemeza Nyambi ya Ngula, Nyambi yenu, muyemezenu mwaya myaka! Yemezenu lizina lyendi lyaliwahe, ndaba kuyemeza kwa muntu kumulingana kufwako.”

Lilombelo lya kulitabila wubi

⁶ Niho bantu ba Ishalela balombelele elye lilombelo ngayi, “Obe Nyambi ya Ngula, Obe tuhu ninkayobe, Nyambi ya Ngula. Obe walengele liyilu na nyenye nimwazo, Obe walengele hanci na byuma nimwabyo bilimo, Pe kami wapanikanga wumi ku nimwabyo. Nimwabyo bya muyilu byalambanga naku kulemesha.”

⁷ Obe Nyambi ya Ngula, Obe Nyambi wahatile Abulama, wamufumishile mu litunga lya Ule mu Mbambiloniya, na kufutula lizina lyendi kwinga Abulahama.

⁸ Obe wawanine ngayi wengile wakwoloka kukwobe, pe niho walimamine nendi. Wamukulupishile kumupana litunga lya Bakenaani, litunga lya Bahita na Baamoli, litunga lya Bapelizi na Bayembushi, na Bangilingashi kwinga litunga omo bakazikanga bazukulyendi. Walaminenga shikulupisho shobe, ndaba Obe uli wakulunga.

⁹ “Wamonene eshe bayandilenga bankakazetu mu Engepita, wayuvwile kukaloka kwabo kwakushinga kuyavwiwa ku Liwate Lya kufubila.

¹⁰ Obe watendele bikomokesho ha kulwisha mwene wa Engepita na kulwisha babilolo bendi na bantu bamu litunga lyendi, ndaba Obe walimukile eshe bayandishiwilenga bantu bobe. Lizina lyobe lyayile mpupo eye ushili nayo na kulelo.

¹¹ Watapwilile mema a liwate ku meho a bantu bobe, pe niho wabapitishile ha limvu lya kuyuma mukati ka liwate. Obo babakonkelelenga waba kupwile mu mampunga a mema, ngonehe limanya lya ndokamanga ku nceto ya mankanyi a liwate.”

¹² Ku mwaana wabendeshelenga na likumbi lya kwimana nkonka. Pe ku wushiku wabamunikililenga liyeye, lya mundilo lya kwimana nkonka mu nzila yabo.

¹³ Washilukilile hanci ku Lipili lya Shinayi. Kuyo niko wambilenga na bantu bobe, Obe wabapanikile kuyata kwakuwahe, na mulao wa kupwisha, na ku longesha kwakuwahe na ndayano.

¹⁴ Wabalongeshele kulama Mutena wobe Wakukatala. Wabapanikile Ndayano zobe na mazu obe, na kufundiziza kwobe, kupitila muli mukamulimo wobe Moshesha.

¹⁵ “Oho bekalile na nzala, wabapanikile mankende a muyilu, oho bekalile na linyotwa, wabapanine mema amu limanya. Wabatongwezele kuya na kutambula litunga, elye waba kulupishile ngayi ukabapanalyo.

¹⁶ Ngoboni bankakazetu baliyemezele naku kaluhisha mitima, pe bakanine kwombatala ndayano zobe.

¹⁷ Bakanine kwombatala bavulamine biya watendele nimwabyo, bavulamine bikomokesho biya watendelenga, niho bakaluhishile mitima yabo. Pe bahatile mukakubataminina wakubabwesha mu Engepita mu wulungo. Ngoboni Obe Nyambi Ou wayatilanga, Obe wenga washikeketima na shishemo, wehalanga ha kupilama. Nceshe zobe za mwaya myaka zenga zazinene shikuma, pe kaliha wabafutaminine.

¹⁸ Hinge ndi nibo batendele kanankishi kakufweka ngonehe nkunzi wa ngombe, na kwamba ngayi, ‘Niye bene nyambi ou watufumishile mu Engepita!’ Elye lihandu bakuhandwile nalyo lya nahiti, Obe Nyambi ya Ngula!

¹⁹ Ngoboni Obe kaliha wabafutaminine muyo mu libelelengwa, ndaba nceshe zobe zazinene, obe kaliha wafumishilenga likumbi lya kwimana nkonka liya lya bamoneshelenga mu nzila ku mwaana, hinge liyeye lya mundilo lya kwimana nkonka liya lya bamoneshelenga mu nzila ku wushiku.

²⁰ Na moyo wobe wawuwahe wa balongeshele, wabalishile maana a kulya pe kami wabapanikile na mema akunwa.

²¹ Mu myaka makumi anaa yiyo bekalile mu libelelengwa, wabaholwelele nimwabyo biya bashingilenga, bivwalo byabo kaliha byatabozokele, kami mawulu wabo kaliha azimbile.”

²² “Wabetabilishile ngayi bakome wene na matunga awa enga zinginza na litunga lyabo. Bakomene litunga lya Heshimboni, omu alelelenga mwene Shihoni, na litunga lya Mbashani, omu alelelenga Mwene Ongi.

²³ Wabapanikile bana babengi ngonehe nyenye za muyilu. Pe wabetabilishile ngayi bakome na kuzika mu litunga, elye aba kulupishile bankakazabo.

²⁴ Bana babo benginine na kutambula litunga lya Kenaani, wakomene bantu bazikilengamo. Wapanikile bantu bobe ngovu za kutenda ngo omu yashingilenga mitima yabo, ha bantu na bamyene bamu litunga lya Kenaani.

²⁵ Bantu bobe bakomene zinkena za bipata na litunga lya wilo, kami bakomene matala enzalile na byuma nimwabyo byabiwahe na mashima anyuminine akukongela mema, akukabila shilumweza na mitondo bya olive, na mitondo ya mikabo na mafuba a mikabo ya shinyanca. Balile nimwabyo bashingilenga pe bashuwile, balikuwile byuma nimwabyo byabiwahe biya wabapanikile.”

²⁶ “Ngoboni hinge noho, bantu bobe ba kufutulukilile, na ku kulimbwilisha nakufutamina mazu obe. Bazihile bamiluwe bobe aba bababelelenga, aba babatongwezele ngayi baboke kukwobe. Bonzelelenga kukuhandula,

²⁷ nohobene wetabilishile bamalamo babo ngayi babakome na ku balela. Mu makando wabo nimwawo bakwihanine ngayi ubayavwe, pe obe waba kumbwile omo muyilu. Na nceshe zobe zazinene shikuma wabatuminine bakakutwaminina, aba babalamwinine ku bamalamo babo.

²⁸ Oho bekalile mu ku mwena niho kami batendele wubi, pe wetabilishile bamalamo babo ngayi babakome. Ngoboni oho batengulukile na ku kunyepa ngayi ubapulwishe, Obe wa bayuvwile omo muyilu, kami bikati byabingi wabalamwininenga na nceshe zobe zazinene shikuma.

²⁹ Wababelele ngayi bombatale kufundiziza kwobe, ngoboni nibo mu kuliyemeza kwabo bakanine mazu obe, hinge ndi ngayi kulama mazu obe niyo yenga nzila ya wumi. Bengile babinkwange babakalu mitima, pe bakanine kwombatala.

³⁰ Wababelelenga na lunzewe ku myaka yayingi. Wapanine bamiluwe bobe Moyo wobe ngayi bambe kukwabo. Ngoboni bantu bobe bengile ngo bakuzika matu. Nohobene wetabilile ngayi bakomiwe ku mikoka yamina.

³¹ Hinge noho, nceshe zobe zenga zazinene shikuma, kaliha wabafutaminine hinge kubalobesha. Obe wenga Nyambi wa nceshe na shikeketima shikuma!”

³² “Obe Nyambi, Nyambi yetu, wunene wobe unyabo shikuma! Wenga wakukomokesha, kami wenga wa ngovu shikuma! Walamanga bikulupisho bya Kulimama kwobe na nceshe zobe za mwaya myaka. Ku balika ku shikati shiya batuyandishilenga bamyene Baashiliya, kukuma ni ku shikati shino. Anuka makando wetu! Bamyene betu na bana ba bamyene betu na bakankombela betu na bamiluwe betu, na bankakazetu na bantu betu nimwabo banayanda! Kufuma ku matena a bamyene ba Baashiliya kukuma na kulelo.

³³ Hinge noho, unatende shiwahe aha unatushushulu nehe, Obe uli wakulunga kukwetu hinge ndi etu twatendanga wubi kukwobe.

³⁴ Bankakazetu na bamyene betu na bana ba bamyene betu na bakankombela betu kaliha balamine mazu obe. Babulile kuyuvwa ndayano zobe na kubela kwobe.

³⁵ Bamyene ba bantu bobe Baishalela, balelele bantu bobe na mfuywezi zobe. Oho bazikile mu litunga lyalinene lya wilo liya wabapanikile, nibo bakwangile ku kulemesha ndaba kaliha batengulukile ku wubi.

³⁶ Pe haya twengakale bandungo mu litunga liya watupanine litunga lya wilo elye likutupana byakulya!

³⁷ Ebye bikulimiwa bikuya ku bamyene, baya wayakile hayilu yetu ndaba twatendele wubi. Bakutenda kukwetu naku zingombe zetu, ngonehe eshe yikushinga mitima yabo, pe tuli mu makando amanene shikuma.”

Bantu ba kutikita Kulimama

³⁸ Ndaba yanebye nimwabyo byatendiwakale, etu bantu ba Ishalela tuli kuno na kutikita luhaho lwa kulimama, nohobene bakakutwaminina betu na Balevi na bakankombela betu ba na nyateleho.