Nehemiya 8 - Libuka Lya Kuyela

Ezila ukulabila bantu ndayano

¹ Ha mutena wakutatika wa ngonda iyo, nimwabo bakungulukilile mu Yelushalema mu mbanza ya mukati hahepi na Lipangati lya Mema. Balombele mukankombela Ezila ou walilongeshele Mazu a Nyambi ya Ngula aya apanikiwile ku Baishalela kupitila muli Moshesha, ngayi alete Libuka lya Ndayano, eze Nyambi alayelele bantu ba Ishalela kupitila muli Moshesha.

² Ezila watwalile Libuka lya Nyambi oku kwakungulukilile bantu nimwabo, balume na bambuyama, hamo na batwanuke ba kukula aba batweshele ku yuvwishisha mazu.

³ Wabalabilile mazu a Nyambi kuyo hahepi na lipangati, ku balika malungashiku kukuma naku shikati sha mutena mukati ka mutwe, pe nimwabo babangwile matu shiwahewahe na kuyuvwilila.

⁴ Mukakutikita Ezila walabilenga hinga emana ha katambo ka bitondo kaya katendiwilile shiya shimbo. Balume aba bemanine ku liboko lyendi lya shilyo bengile ba Matitiya na Shema na Anaya na Uliya na Hilikiya na Maasheya, pe kami ku liboko lyendi lya shimoho, balume bemanineko bengile ba Pendaya na Mishayela na Malikiya na Hashumi na Hashimbandana na Zakaliya na Meshulama.

⁵ Ezila wemanine ha katambo, oho bantu nimwabo batweshele ku mumona. Oho afukulwile libuka, bantu nimwabo bemanine.

⁶ Niho Ezila ambile ngayi, “Yemezenu Nyambi ya Ngula, Nyambi Wamunene!” Pe bantu nimwabo bolwele maboko wabo muyilu naku kumbula ngayi, “Ameni! Ameni!” Niho bafunkamine, pe balemeshele Nyambi ya Ngula hinga bapenza zimpala zabo hanci.

⁷ Niho bantu nimwabo bakatukile, bemanine mu myanya yabo. Pe ano niwo mazina a Balevi baya batontwelele Mazu a Nyambi kukwabo, bengile ba Yeshuwa na Mbani na Shelembiya na Yamini na Akumbi na Shambetayi na Hondiya na Maasheya na Kelita na Azaliya na Yozambandi na Hananu na Pelaiya, nimwabo aba bayilenga mukati ka bantu.

⁸ Balabilenga Mazu a Nyambi naku wanungulula ngayi mwanga bantu bayuvwishishe shiwahe.

⁹ Oho bantu bayuvwile Mazu a Nyambi balikekwile, pe balilile. Niho Nehemiya kalela na mukankombela Ezila ou walilongeshele Mazu a Nyambi na Balevi aba batontolwelenga Mazu a Nyambi, batongwezele bantu nimwabo ngayi, “Uno mutena walelo unengi wakuzila kuli Nyambi ya Ngula, Nyambi yenu, nohobene kaliha munafwanini kutuwumuka mbingo hinge kupwezuma mihozi.

¹⁰ Haya yenu ku minzi mukalye mayambwayambwa na kunwa waine. Kami mukapeko obo banabulu bya ku balingana. Lelo unengi mutena wakuzila kuli Hekulyetu. Nohobene hinga muhomba, ndaba ku wahilila kwa muli Nyambi ya Ngula kukamishumisha.”

¹¹ Niho Balevi bakatukile naku mwenesha bantu na kubatongweza ngayi hinga bahomba ndaba unengi mutena wakuzila.

¹² Nohobene bantu nimwabo babokele ku minzi mu kulya na kunwa na ku wahilila na kupako baminabo ebye bekalile nabyo, ndaba Mazu awa babalabilile bawayuvwishishile shiwahe.

Shimbo sha Minkungwa

¹³ Oho kwashile, bakulwane bamu mavumo, hamo na bakankombela na Balevi, bayile kuli mukakutikita Ezila mu kulilongesha eshe likwamba Libuka lya Ndayano.

¹⁴ Bakawanine ngayi Mazu a Nyambi, aya apanine Nyambi ya Ngula muli Moshesha, akutongweza Baishalela kwikala mu minkungwa shikati sha kukwatiziza sha Shimbo sha Minkungwa mu ngonda ya mutanu na zibili.

¹⁵ Nohobene babafundizizile kuya mu Yelushalema nimwamo ngayi, “Yenunga ku mapili na ku shimba myahi ya mitondo ya olive na mipani na mayiliti na minkomona yili na mabizi, bya kutendesha minkungwa ngonehe kufundiziza oku kwatikitiwile mu Libuka lya Ndayano.”

¹⁶ Nohobene bantu bashimbile myahi na kutenda minkungwa hayilu ya biluli bya kupapalala bya matala wabo namu bipango byabo namu shipango sha shinzanza shamu Litala lya Nyambi namu zimbanza za mukati za kwakwipi na Lipangati lya Mema naku Lipangati lya Efulemu.

¹⁷ Bantu nimwabo aba balubukile kufuma mu wuntapwa batendele minkungwa na kwikalamo. Eshe shatendiwile nisho shengile shikati sha kutatika ku balika ku matena a Yoshuwa mwana Nune. Baishalela nimwabo batangalile na ku wahilila.

¹⁸ Ku balika ku mutena wakutatika wa Shimbo kukuma naku mutena wakumanishila balabilenga Libuka lya mulao wa Nyambi ha mutena ha mutena. Bapingile Shimbo matena mutanu na abili, pe ha mutena wa mutanu na ahatu batendele shikungulukilo sha kuyela sha kulemeshela ngonehe kwashingiwile mu Libuka lya Ndayano.