Nehemiya 6 - Libuka Lya Kuyela

Bamalamo ba kuyongola kulwisha Nehemiya

¹ Shanimbalati na Tombiya na Ngeshema na wingi wa bamalamo betu bayuvwile ngayi twamanishakale kutenda kembi kami kowa mampananga anashalako hinge ndi twabulile kuyaka bihala ku mapangati.

² Nohobene Shanimbalati na Ngeshema bantuminine lizu, lya kuntongweza ngayi niliwanine nabo mu munzi umo ku munzi yamu Mbuwa ya Ono. Okwe kwengile ku shoshoka kwabo kwakushinga kunziha.

³ Natumine bantumwana kukwabo mu kubatongweza ngayi, “Nili na kutenda mulimo wawunene shikuma, kami kutwesha kwiza kami okwo nifwako. Kutwesha ku shiya mulimo kwiza tuhu mukumimona nifwako.”

⁴ Batuminine bikati binaa, lizu tuhu limo, pe shikati nimwasho na ba kumbwilenga na lizu limo tuhu.

⁵ Niho Shanimbalati atumine lizu lya wu mu mutanu na mukamulimo wendi. Watikitile mazu amo mu liñwati lyendi lya kubula ku shinkiwa.

⁶ Nilyo lyalabiwile nehe. “Ngeshemu nantongweze ngayi mpupo yili na ku kwayana muno mukati ka bantu bashindambo ngayi obe na Bayunda muli na kushinga kufutulukila wene, ngayi nisho shuma mu kutendulwila kembi. Niye wamba kami ngayi obe uli na kushinga kuliyaka ha wene.

⁷ Pe kami obe wa wahishakale bamiluwe ba Nyambi bamo kuya naku ku bilika mu Yelushalema ngayi wengakale mwene wamu Yunda. Haya mwene ya ngoma uli na kushinga ngayi ayuvwe kupwisha kwa shambo eshe. Niho ami nahanganiki ngayi obe na nami tuliwane twambole ha shambo eshe.”

⁸ Ami niho na kumbwile ngayi, “Ebye uli na kwamba, kaliha binengi bya kupwisha. Nimwabyo binengi bya kuvumba mu mutima wobe.”

⁹ Bashingile kututinisha ngayi tulehe mulimo. Pe ami nalombelele ngayi, “Haya shumisha mutima wami, Obe Nyambi.”

¹⁰ Ha shikati shimo nayile na ku zingula Shemaya mwana Ndelaya muzukulya Mehatambela, ou walubile kutwesha ku shiya litala lyendi. Wambile ku kwami ngayi, “Obe na nami tu ku fwanina kuya hamo Mukuholama mu Mwanya Wakuzila wamu Litala lya Nyambi na kupata bihala, ndaba bali na kwiza mu kukuziha ku wushiku.”

¹¹ Ngoboni na kumbwile ngayi, “Kaliha nenga muntu uya watinanga kuya na kuholama. Kati ukuhanganika ngayi muntu wa kwinga ngonehe ami ukutwesha kwingina mu Litala lya Nyambi na kuholama, ngayi alamwine wumi wendi? Ami kutenda noho nifwako.”

¹² Oho nahanganikile shikuma nalimukile ngayi Nyambi kaliha wambile kuli Shemayi, ngoboni ngayi ba Tombiya na Shanimbalati nibo banamupana lizika kanwa ngayi mwanga anyambile.

¹³ Bamupanine lizika kanwa ngayi antinishe mwanga nibipishe, nohobene ngayi nitende wubi mwanga batweshe Kubipisha lizina lyami na kunyenesha.

¹⁴ Pe nalombelele ngayi, “Obe Nyambi yami, anuka ebye banatende ba Tombiya na Shanimbalati, pe ubashushule. Anuka uya muluwe wa mbuyama Nowandiya na bamiluwe bamina baya bezekelenga kuntinisha.”

Mamaninino a mulimo

¹⁵ Oho matena 52 apitile, mulimo wa kembi wamanine. Ha mutena wa 25 wa ngonda wa Eluli kembi kamanine.

¹⁶ Oho bamalamo ba matunga atuzinguluka bayuvwile ngayi mulimo wa kembi unamana pe bayuvwile bowa, balimukile ngayi mulimo unatendiwi mu ngovu za Nyambi.

¹⁷ Shikati nimwasho shiyo, bakakutwaminina ba Bayunda balitikitililenga mañwati na Tombiya.

¹⁸ Bantu babengi bamu Yunda bemaninine Tombiya ndaba wengile muko wa Shekaniya wa Kayunda, mwana Alahi. Pe kami, mwanendi Yehohanani wayekele mwana Meshulama, mwana Mbelekiya.

¹⁹ Bantu batweshele kwamba kukwami ha biheka nimwabyo byabiwahe atendelenga Tombiya na ku shimikila kami Tombiya nimwabyo biya nambilenga. Pe wazundaminine kuntuminanga mañwati akushinga kuntinisha.