Nehemiya 5 - Libuka Lya Kuyela

Kuyandishiwa kwa bancepwe

¹ Oho kwapitile shikati, bantu babengi, balume na bakazabo, batatikile kulinyenga ha bawushinda wabo Bayunda.

² Bamo bambile ngayi, “Etu na banabetu babalume na ba bambuyama tuli babengi. Tukushinga byakulya bya kutuyoyesha.”

³ Bamina kami bambile ngayi, “Tuli na kupana mafuba wetu ha mikuli na mafuba a mikabo ya shinyanca na matala wetu kuwanako byakulya kutina tulanduka ku nzala.”

⁴ Pe bamina bambile kami ngayi, “Twawilanga mali ku bantu ngayi mwanga tutele mutelo waku wene waha mafuba wetu na mafuba a mikabo ya shinyanca.

⁵ Hinge ndi nimwetu tuli ba mukoka umo ngonehe baminetu Bayunda, kati banabetu kaliha ba kulifweka na bana babo ndi? Ngoboni banabetu bamo ba bambuyama balandishiwakale kwinga bandungo. Twabulakale nomu mwa kutendela ndaba mafuba a mikabo ya shinyanca banatuyanguluwo.”

⁶ Ami oho nayuvwile manyengo na kalihile shikuma,

⁷ pe nahanganikile mu mutima wami ngayi nitendeho shimo. Niho nambilile bakakutwaminina na babilolo na bantu naku batongweza ngayi, “Muli na kuyandisha bawushindawenu shikuma oho mu ku balundilangako nkambiko yayinene ku byuma ba ku wila kukwenu!” Nehanine likunge lya bantu babengi ngayi twambe ha nowe wukalu.

⁸ Pe nambile kukwabo ngayi, “Mukutwesha kwetu, tu na landa bawushinda wetu Bayunda obo balandishiwilenga ku mishobo yashenge mu wulungo. Haya muli naku kandamika bawushindawenu ngayi balilandishe kukwenu!” Bakakutwaminina bamwenene hulutuu, kaliha batweshele kuwana mwa kwambila.

⁹ Niho nambile kami ngayi, “Eshe muli na kutenda sha shibi! Mu ku fwanina kutina Nyambi na kutenda shiwahe. Niho eze mukabule kupana mwanya wakutuhengamina ku bamalamo betu bakamatunga ashenge.

¹⁰ Netabilishi bantu ngayi bawile mali na byakulya kukwami naku bambayi na bantu aba bantendelanga mulimo. Haya shashiwahe tu lehenu kukala mikuli.

¹¹ Ba bweshelenu mafuba wabo na mafuba a mikabo ya shinyanca na bitondo bya olive na matala wabo wanguwangu! Bweshenu kami byuma byabo nimwabyo mwakwatile mukuli wa mali hinge wa byakulya hinge waine, hinge wa mazi.”

¹² Bakakutwaminina bakumbwile ngayi, “Tukatende ngonehe eshe unamba. Tukabwesha wuheti wabo na kubula kutambula nkambiko.” Nehanine bakankombela na ku tongweza bakakutwaminina ngayi balibeze kumbili yabo na kulama mbeza eze banalibeze.

¹³ Niho nafumishile kaponda aka nalimangile mu lukanda, pe nakatotomwene na kwamba ngayi, “Eshe nisho akatotomona Nyambi muntu nimwendi hakati kenu ou ukabula kulama eze mbeza zenu. Nyambi ukamuyangula matala wendi na byuma nimwabyo aheta na ku kamushiya mabokoboko.” Bantu nimwabo bekalileko bambile ngayi, “Ameni!” Pe bayemezele Nyambi ya Ngula. Kami bakakutwaminina balamine bikulupisho byabo.

Kubula mwili kwa Nehemiya

¹⁴ Mu myaka nimwayo likumi na yibili iya nengile kalela wa litunga lya Yunda, ku balika ku mwaka wawumakumi abili wa wakulela kwa Mwene Wamunene Atazekishi, kukuma ku mwaka wendi wa wuhatu na yibili, bawushinda wami hinge ami kaliha twalilenga byakulya binafwanini kalela.

¹⁵ Batulela nimwabo obo bekalilengaho oho ami shilolo nikume bengile miziho ku bantu, kami batambwilenga mali makumi anaa a muwayawaya wa shiliva ha mutena ha mutena hamo na byakulya na waine. Hinge bakamilimo babo bayandishilenga bantu, ngoboni ami kaliha natendele noho ndaba natinine Nyambi.

¹⁶ Nayakile ngovu zami nimwazo mu kutendulula kembi, kami kowa muntu hakatiketu wanyepele ndoba. Bantu nimwabo aba bakakutenda mulimo balifungilile nabo hamo mu ku tendulula.

¹⁷ Shikati nimwasho kutebulu yami nalilenga na Bayunda 150 hamo na bakakutwaminina babo kubula ku labako bantu nimwabo aba bafuminenga ku mukoka yatuzinguluka.

¹⁸ Ha mutena ha mutena nabazihililenga ngombe wa ntatula na bambelele ba kushuwa mutanu na umo na bahuhwa babengi, pe oho kunapiti matena likumi kaliha napanikile waine. Hinge noho ami kaliha nepwilenga ku mali a byakulya binafwanini kalela, ndaba nalimukile ngayi bantu miziho yiya bashimbile yengile yayilemu.

¹⁹ Nikunyepa Obe Nyambi yami, ngayi wanuke wuwahe wami nimwawo uya natendele ku naba bantu.