Nehemiya 4 - Libuka Lya Kuyela

Nehemiya ukukana kuyuvwilila bamalamo bendi

¹ Shanimbalati ayuvwile ngayi etu Bayunda twatatikakale kutendulula kembi wapilamine shikuma pe watatikile kutuhengamina.

² Niho ambile kumbili ya baminendi na makunge a banzita ba Shamaliya ngayi, “Kati aba Bayunda ba kupopa bishini boni ebye bakuhanganika kutenda! Bakushinga ngayi batendulule lukena ndi? Kati bakuhanganika ngayi ha kukombelela nkombela ba kutwesha kumanisha mulimo ha mutena umo ndi? Kati ba kutwesha na mamanya aha mishiinzi ya bibanku bya kuhokeshiwa ndi?”

³ Tombiya wa Kaamoni ou wemanine kunkumo yendi na niye kami wambile ngayi, “Kati ba kutwesha kutenda kembi ka mushobo ngani! Hingebene mumbwe ukutwesha kukanyemuna!”

⁴ Ami Nehemiya niho nalombelele ngayi, “Obe Nyambi yetu, yuvwa eshe ba kutuhengamina! Shashiwahe shihepwa shabo shibabokele. Balehenu bayanguliwe nimwabyo ebye bali nabyo, kami batwaliwe kwinga bantapwa mu litunga lya mapukwenda.

⁵ Hinga ubayatila ku byabibi ba kutenda, kami hinga uvulama wubi wabo, ndaba banatuhandulu etu tukutenda uno mulimo.”

⁶ Nohobene twazaminine kutendulula kembi, pe wanguwangu twakumine ha shitika sha mwimo wa kembi ndaba bantu batendelenga na ku zundamina.

⁷ Ngoboni Shanimbalati na Tombiya na bantu ba ku Alembiya na Amoni na Ashindondi oho bayuvwile ngayi tulinakuya kumbili na mulimo wetu wakutendulula kembi ka mu Yelushalema kami ngayi myanya yekalile mukati ka kembi yazikiwakale, nibo bapilamine shikuma.

⁸ Nohobene nimwabo bakungulukile hamo na kubeba, ngayi balwishe Yelushalema na kuleta kaluwanganyi.

⁹ Pe twalombelele kuli Nyambi yetu na kuyaka balume ba kulama wushiku na mwaana.

¹⁰ Ngoboni bantu ba Yunda bambile ngayi, “Twakwangakale ku shimba biyeko, ku shili bibanku byabingi biku fwanina kufumishiwa, pe tukatwesha nahiti kutendulula kembi.”

¹¹ Pe bamalamo betu bambile na kuhanganika ngayi, “Kuka bamona hinge kulimuka eshe bakatenda tufwako hantu banezi na ku tu bazumuna na ku tu ziha hamo na ku manisha mulimo wetu.”

¹² Niho Bayunda aba bekalilenga mukati ka bamalamo betu bezilenga na kutushiwulula bikati likumi ngayi, “Tukeye ndaba, bamalamo betu bakushinga kutulwisha na kutuziha.”

¹³ Niho natapishilile mikwale na milinga na bipando bya mukunzi ku bantu. Pe na bakwalikile kuya mu mavumo wabo kunyima ya kembi, kuya kwabulile kumana.

¹⁴ Pe namonene ngayi bantu nimwabo baliyakatile, niho nambile kukwabo naku bakakutwaminina babo naku babilolo ngayi, “Hinga mutina bamalamo betu. Anukenu wunene wa Hekulyetu, Niye wenga wakukomokesha. Pe, mulwile bantu bamu litunga lyenu na bana benu babalume na bana benu ba bambuyama na bakazenu na minzi yenu.”

¹⁵ Bamalamo betu oho bayuvwile ngayi twalimukakale ebye batubebelenga, balimukile ngayi Nyambi napitakana bihanganiko byabo. Niho nimwetu twabokele ku mulimo wakutendulula kembi.

¹⁶ Ku balika mutena uyo, shitika sha bantu bami batendelenga mulimo na shitika shamina balaminenga hinga bakwatilila milinga na makebo na bipando bya mukunzi, hinga bavwala bivwalo bya nzita bya byondo. Pe bakakutwaminina betu bemaninine bantu ba ku Yunda na mutima umo,

¹⁷ obo batendulwilenga kembi. Hinge obo bashimbilenga bya kuliyavwisha, batendelenga mulimo na liboko limo, ndaba ku liboko lyamina hinga bakwata bilwisho.

¹⁸ Kami bantu nimwabo oho batendelenga milimo, mikwale yabo hinga yekala mu bipushu ha zinkanda zabo. Pe muntu mu kakushiba mpandula wekalile hamo na nami.

¹⁹ Pe natongwezele bantu na babilolo na bakakubatwaminina ngayi, “Mulimo wanenehakale na kuli tapulula kantabule hamo etu kami twalitapululakale shikuma umo kuwamina ha kembi.

²⁰ Oho mu kuyuvwa mpandula, kungulukilenu kukwami. Nyambi yetu ukatulwila.”

²¹ Nohobene matena nimwawo ku balika ku lumenemene kwa kutabula kwa mutena kutwala ku wushiku wakututika kwa nyenye, shitika shimo shatendelenga ku kembi oho shitika shamina hinga shemana na kubelamina na milinga.

²² Ha shikati eshe natongwezele bantu nimwabo baka ku mona mulimo hamo na bakakubayavwa nimwabo ngayi, shikati sha wushiku ba ku fwanina kwikala mu Yelushalema ngayi mwanga tutweshe kulama lukena ku wushiku na kutenda milimo ku shikati sha mwaana.

²³ Hinge ku shikati sha wushiku, kaliha navulilenga bivwalo byami, hinge umo wa ba bambayi, hinge bakamilimo bami, hinge ku byamanga bami. Nimwetu twakwatilililenga tuhu bilwisho byetu mu maboko.