Nehemiya 2 - Libuka Lya Kuyela

Nehemiya ukuya ku Yelushalema

¹ Munyima ya zingonda zinaa, mu ngonda ya Nishani mu mwaka wawumakumi abili wakulela kwa Mwene wamunene Atazekishi natwalile waine kukwendi. Hinga atanga shilolo kale amone hinga nahomba.

² Niho mwene anyipwile ngayi, “Kati shumangani unahombele nehe, obe kukola ufwako? Shiku moneka ngayi uli na manyengo mu mutima wobe.” Pe natinine shikuma,

³ niho na kumbwile ngayi, “Obe mwene ya ngoma, yoyanga mwaya myaka! Kati nikubula ku moneka kuhomba nahiti, lukena luyo bafundiwa bankaka zami hinga lwenga mapembe, kami mapangati alwo hinga ahokeshiwile?”

⁴ Niho mwene wamunene epwile ngayi, “Kati eshe ukushinga bishini?” Pe nalombelele kuli Nyambi wa Muyilu,

⁵ niho natongwezele mwene wamunene ngayi, “Ndi obe mwene ya ngoma unangwahilili ku mutima, kami ukushinga kumpana ebye nikulomba, nyintabilishe niye ku litunga lya Yunda, ku lukena kuyo kwafundiwile bankaka zami, ngayi mwanga nikatweshe kutendulula lukena.”

⁶ Mwene wamunene hamo na lihano hinga ekala kunkumo yendi, wetabilile kunyepa kwami. Pe wanyipwile ngayi, “Ukekalako matena anga na shikati ngani ukaboka?” Niho namutongwezele shikati sha kuboka kwami.

⁷ Niho nanyepele mwene ngayi ndi shikumuwahilisha ku mutima mwanga ampeko mañwati akuholola ku batulela ba ku litunga lya ku mponci ya Mushinzi wa Yufuleti, akubatongweza ngayi banyintabilishe kupita ha kuya ku Yunda.

⁸ Kami nanyepele ngayi ampane liñwati lya kutwala kuli Ashafwi, mukakulama mashaka a wene na ku mu tongweza ngayi ampeko maleenge aku mapangati a shipata shalamanga Litala lya Nyambi na twimbi twa lukena na nawa a litala omu nikekalanga. Mwene wamunene wampanine nimwabyo ebye nanyepele ndaba nekalile na mfuywezi za Nyambi.

⁹ Mwene wamunene wa mfunzwile na babilolo bamo ba banzita hamo na likunge lya bakakukandama ha bambishi, pe na katukile na kukuma ku mponci ya Mushinzi wa Yufuleti. Niko na kapanikilile mañwati ku batulela afumine kuli mwene wamunene.

¹⁰ Ngoboni Shanimbalati waku munzi wa Mbeti Heloni na Tombiya shilolo wamu litunga lya Amoni, oho bayuvwile ngayi kunezi muntu mu kutendela ha bantu ba Ishalela byuma biwahe, nibo bapilamine shikuma.

¹¹ Nakumine ku Yelushalema pe nekalile kuyo matena ahatu.

¹² Nabula kutongwezako muntu wamina obyo ayakile Nyambi mu mutima wami bya kutendela Yelushalema. Niho napindukile mukati ka wushiku na kuya na bambayi bamo babashe. Shimuna tuhu twashimbile wengile mbongolo ou nakandamine.

¹³ Kwengile wushiku oho natutikile mu lukena na Lipangati lya ku Mukulo waku mponci na kuya ku mabukubuku a Lishima lya Mumbwe kukakuma naku Lipangati lya ku Lilala. Oho nayilenga nahengwele mamota a Yelushalema aku nyemuka na mapangati aya ahokele na mundilo.

¹⁴ Niho nayile ku Lipangati lya kaheloke kukakuma naku Liziba lya Mwene. Ngoboni Mbongolo nakandamine kaliha watweshele kuwana nzila ya kupita mukati ka bibanku,

¹⁵ nohobene na kunkulukile mu mukulo waku kunama shikuma wa Kendiloni kuya na kuhengola kembi. Niho nabokele mu nzila iya nezilenga nayo na kuboka ku lukena na kwinginina ku Lipangati lya ku Mukulo.

¹⁶ Babilolo ba kuyo kowa walimukile oku nayile hinge ebye natendele. Nalubile na kutongwezako bambayi Bayunda na bakankombela na bakakutwaminina hamo na babilolo, hinge bantu nimwabo bakatenda uno mulimo.

¹⁷ Ngoboni haya nambile kukwabo ngayi, “Nka munamono wukalu owe tuli nawo wa lukena lwa Yelushalema olwe lu nafutuku mapempe kami mapangati alwo ahokeshiwa! Tokonoko tutendululenu twimbi twa lukena na kulifumisha lisheni.”

¹⁸ Pe na batongwezele eshe liboko lya Nyambi lya nceshe lyekalile hahami na nebye ambile kukwami mwene wamunene. Betabilile ngayi, “Tokonoko tubalike kutendulula!” Pe balikwatishile kutatika kutenda mulimo.

¹⁹ Ngoboni oho ba Shanimbalati waka Heloni na Tombiya na Ngeshema waku Alambu bayuvwile ebye twafungilenga kutenda, batuhepele na kutuhengamina na kwamba ngayi, “Kati mukushinga kutenda bishini? Mukushinga kufutulukila mwene ndi?”

²⁰ Na bakumbwile ngayi, “Nyambi wa muyilu ukututweshesha. Tunengi bakamilimo bendi, pe tu ka balika kutendulula. Ngoboni enu shitapilo mufwasho mu likona lya mu Yelushalema, kami shitapilo mufwasho mu shihemwa shamo.”