Nehemiya 13 - Libuka Lya Kuyela

Kulitapulula na Mapukwenda

¹ Ku shikati shiyo oho Ndayano zamu libuka lya Moshesha zalabiwile ku bantu, balabile ha mazu akwamba ngayi hinga mwaka kukatanga Kaamoni hinge Kamowambi kuketabilishiwa ngayi alifungile na bantu ba Nyambi.

² Eshe shatendewile ndaba Baamoni na Bamowambi babulile kupana byakulya na mema ku Baishalela oho bafuminenga mu Engepita, ngoboni bapanine Mbalaamu mali ngayi akute Ishalela, ngoboni Nyambi yetu wafutwile mukuto kwinga mfuywezi.

³ Oho Baishalela bayuvwile eze ndayano hizilabiwa bafumishile bakamatunga nimwabo mu shikungulukilo.

Nehemiya ukutengulula byuma

⁴ Mukankombela Eliyashimbu, kawushinda wa Tombiya, ou wengile mukulwane wa bishete bya ku Litala lya Nyambi.

⁵ Eliyashimbu wetabilishile Tombiya kuliyavwisha kampenci kakanene kaya katendiwile kwinga ka kukongela zintupu za mbuto ya mpeka na incence na byuma baliyavwishilenga mu Litala lya Nyambi na zintupu za bakankombela na bya wulikumi bya mbuto ya mpeka na waine na mazi a olive apanikiwile ku Balevi na ku bakakwimbila naku bakakulama mu Litala lya Nyambi.

⁶ Oho byatendiwilenga nimwabyo ebye, ami Nehemiya kaliha nekalile mu Yelushalema, ndaba mu mwaka wa 32 wakulela kwa Atazekishi mwene wa Mbambiloni nayile kuli mwene na kulomba shikati sha kuboka ku Yelushalema. Niho anyintabilishile.

⁷ Nakalikomokelele ha kuwana ngayi Eliyashimbu unetabilishi Tombiya kuliyavwisha kampenci ka mu Litala lya Nyambi.

⁸ Napilamine shikuma, pe nayumbayumbile byuma bya Tombiya nimwabyo ha munkanda.

⁹ Niho napanine ndayano zaha tumpenci ngayi tuyeleshiwe naku bweshelamo byuma bya kuliyavwisha mu Litala lya Nyambi na zintupu za mbuto ya mpeka na incence.

¹⁰ Kami nawanine ngayi Balevi na bakakwimbila mu Litala lya Nyambi bafumakale mu Yelushalema naku boka ku mafuba wabo, ndaba bantu kaliha bapanikilenga bya kubakonkana ngayi bibayoyeshe.

¹¹ Nambilile babilolo ha kulehelela Litala lya Nyambi ngayi likendiwe. Pe nabweshele Balevi na bakakwimbila mu Litala lya Nyambi ngayi batende ku mulimo kami.

¹² Niho bantu nimwabo ba Yunda batatikile kuleta bya wulikumi bya mbuto ya mpeka na waine na mazi a olive ku bishete bya ku Litala lya Nyambi.

¹³ Bano balume nibo bayakile kwinga bakulwane ba ku bishete, mukankombela Shelemiya na Zandoki mukakutikita, ou wengile wakulilongesha mazu a Nyambi na Pendaya, wa Kalevi. Hananu mwana Zakula muzukulya Mataniya, niye wengile ncwana mumi wabo. Nalimukile ngayi nikutwesha kukulupila aba balume kwinga bakulunga mu kutapila byakulya ku baminabo bakamilimo.

¹⁴ Obe Nyambi yami, nyanuke ha byuma ebye nimwabyo natende hinga ushandula byuma byabiwahe natende byaha litala lyobe na kulemeshiwa kwobe.

¹⁵ Ku shikati shiyo namonene bantu bamu Yunda hibazonga mema ku mikabo ya shinyanca ha Mutena Wakukatala. Bamina balongelenga mbuto ya mpeka na waine na mikabo ya nkuyu na byuma byamina ha bambongolo zabo na kubitwala ku Yelushalema. Nababelele ngayi hinga balandisha byakulya ha Mutena Wakukatala.

¹⁶ Kami balume bamo bafumine ku lukena lwa Tile bazikilenga mu Yelushalema, baletelenga zinci na ntutu nimwayo ya mishoboshobo mu kulandisha ku bantu betu ha Mutena Wakukatala.

¹⁷ Nambilile bakakutwaminina ba Bayunda na bakankombela ngayi, “Monenu byabibi ebye mu kutenda, muli nakuzilulula Mutena Wakukatala.

¹⁸ Eshe nisho shuma Nyambi ashushwilile bankakazenu, oho alobeshele lukena luno. Hinge shingi noho mushili kuleta wukali wa Nyambi shikuma ha Ishalela mu kuzilulula Mutena Wakukatala.”

¹⁹ Nohobene nabatongwezele ngayi mapangati a lukena ashinkiwenga ku matatikilo a Mutena nimwawo Wakukatala, oho mutena ukulela ku mazolo, mapangati a lukena aku fwanina ku shinkiwa na kubula kuwashinkulula kami hantu Mutena Wakukatala unamana ha kutatumuka kwa mutena. Nayakile bantu bami bamo ku mapangati na kumoneshesha ngayi kowa shuma shikaletiwa mu lukena ha Mutena Wakukatala.

²⁰ Haya bakakulandisha, aba balandishilenga ntutu ya mishobo nimwayo, bonzelelenga ha munkanda wa twimbi twa Yelushalema kamo hinge kabili.

²¹ Nababelele ngayi, “Kumiyavwa shifwako sha kutatilila ha munkanda kutwala ku lumenemene. Ndi mukwezeka kutenda nehe kami pe nikamitanda.” Kufuma hayo na kutwala kumbili kaliha babokelenga ha Mutena Wakukatala.

²² Natongwezele Balevi kuliyelesha nibo bamwine ha kuya mu kulama mapangati na ku moneshesha ngayi Mutena Wakukatala ulamiwe hinga wazila. Obe Nyambi yami, nyanuke ha shuma eshe kami, pe nkobelele ndaba ya shishemo shobe sha mwaya myaka.

²³ Ku shikati shiyo nawanine kami ngayi balume babengi ba Bayunda bayekelenga bambuyama ba ku Ashindondi naku Amoni naku Mowambi.

²⁴ Shitika sha bana babo bambilenga lulimi lwa Ashindondi hinge lulimi lwamina, kaliha balimukile sha kwamba lulimi lwetu.

²⁵ Nabakalihilile na ku ba kuta na ku bakama na bakokele huki na milevu. Na batongwezele ngayi balibeze mu lizina lya Nyambi ngayi, “Nibo hinge bana babo hinga bakaliyekelanga na bantu bamu matunga ayo.

²⁶ Kati kaliha bambuyama bamu matunga ashenge baya batwamininine mwene Sholomoni mu wubi ndi? Wengile muntu wamunene kupitakana bamyene ba matunga amina, kami Nyambi wamuhakile na kumwingisha mwene wamu Ishalela nimwamo. Ngoboni bambuyama ba mishobo yashenge bamutwamininine mu wubi.

²⁷ Kati tunafwanini kuhembwiliza zintambo zenu zazibi za kuyeka bambuyama ba mishobo yashenge yamu matunga na kulimbulula Nyambi yetu ndi, kukumbula ngayi byo?”

²⁸ Yoyiyanda wengile mwana Eliyashimbu Mukulwane wa bakankombela nimwabo, ngoboni umo ha bana ba Yoyiyanda wayekele mwana Shanimbalati waku munzi wa Heloni. Nohobene, ami Nehemiya natandile Yoyiyanda mu Yelushalema.

²⁹ Obe Nyambi yami, anuka aba bantu babipishile mulimo wa bakankombela na Kulimama walimamine na bakankombela na Balevi.

³⁰ Pe ami Nehemiya nayeleshele bantu ba Yunda ku biheka nimwabyo byashenge bya mu matunga. Niho nawahishile ndayano za bakankombela na Balevi ngayi muntu na muntu alimuke mulimo wendi.

³¹ Bya nkuni za kuhokeshela zinkombela nawahishile ngayi ziletiwe ha shikati sha kufwanina na bantu ngayi baletenga zintupu zabo za kuhoma mikabo yayipya ku litala kuli Nyambi. Obe Nyambi yami, anuka ebye nimwabyo, pe unyakeko.