Nehemiya 12 - Libuka Lya Kuyela

Muhoko wa Bakankombela na Balevi

¹ Ou niwo muhoko wa mazina a bakankombela na Balevi baya balubukile kufuma mu wuntapwa hamo na Zelumbambelu mwana Shelatiyele, hamo na Yoshuwa Mukulwane wa bakankombela nimwabo. Awa niwo mazina a bakankombela bengile ba Shelaya na Yelemiya na Ezila,

² na Amaliya na Maluki na Hatushi,

³ na Shekaniya na Lehumi na Melemoti,

⁴ na Indo na Ngenetoyi na Ambiya,

⁵ na Miyamini na Maandiya na Mbilinga,

⁶ na Shemaya na Yowalimbu na Yendaya,

⁷ na Shalu na Amoki na Hilikiya na Yendaya. Aba bengile bantwamina hakati ka baminabo bakankombela ha shikati sha Yoshuwa.

⁸ Awa niwo mazina a balevi bakakwimbilisha nyimbo za kukambilila, ba Yeshuwa na Mbinuyi na Kandimiyele na Shelembiya na Yunda na Mataniya.

⁹ Ba Mbakimbukiya na Unini na baminabo Balevi, bemaninenga hamo hinga ba lipenza ha kwimbila.

Bazukulya Yoshuwa Mukulwane wa bakankombela nimwabo

¹⁰ Yoshuwa wengile tata Yoyakimu wengile tata Eliyashiba, Eliyashimbu wengile tata Yoyiyanda,

¹¹ Yoyiyanda wengile Tata Yonatana, Yonatana wengile tata Yanduwa.

Bakulwane bamu mavumo a bakankombela

¹² Oho Yoyakimu engile Mukulwane wa bakankombela nimwabo, bakankombela aba nibo bengile bakulwane bamu mavumo a mukankombela, mukankombela Melaya wengile mukulwane wamu livumo lya Shelaya. Mukankombela Hananiya wengile mukulwane wamu livumo lya Yelemiya.

¹³ Mukankombela Meshulama wengile mukulwane wamu livumo lya Ezila. Mukankombela Yehohanani wengile mukulwane wamu livumo lya Amaliya.

¹⁴ Mukankombela Yonatana wengile mukulwane wamu livumo lya Maluki. Mukankombela Yoshefwa wengile mukulwane wamu livumo lya Shembaniya.

¹⁵ Mukankombela Andina wengile mukulwane wamu livumo lya Halimu. Mukankombela Helukayi wengile mukulwane wamu livumo lya Melayoti.

¹⁶ Mukankombela Zakaliya wengile mukulwane wamu livumo lya Indo. Mukankombela Meshulama wengile mukulwane wamu livumo lya Nginetoni.

¹⁷ Mukankombela Zikali wengile mukulwane wamu livumo lya Ambiya. Mukankombela Pilutayi wengile mukulwane wamu mavumo a Miniyamini na Mowandiya.

¹⁸ Mukankombela Shamuwa wengile mukulwane wamu livumo lya Mbilinga. Mukankombela Yonatana wengile mukulwane wamu livumo lya Shemaya.

¹⁹ Mukankombela Matenayi wengile mukulwane wamu livumo lya Yowalimbu. Mukankombela Uzi wengile mukulwane wamu livumo lya Yendaya.

²⁰ Mukankombela Kalayi wengile mukulwane wamu livumo lya Shalu. Mukankombela Emba wengile mukulwane wamu livumo lya Amoki.

²¹ Mukankombela Hashambiya wengile mukulwane wamu livumo lya Hilikiya. Mukankombela Natanele wengile mukulwane wamu livumo lya Yendaya.

Libuka lya mazina a bakankombela ba bakulwane na ba lupashi lwa Balevi

²² Libuka lya mazina a bakulwane ba mapashi a bakankombela na Balevi lyalamiwilenga mu bikati bya kuyoya kwa Bakulwane ba bakankombela nimwabo, ba Eliyashimbu na Yoyiyanda na Yohanani na Yanduwa. Elye libuka lyamanishiwile oho Ndaliyashi hinga enga mwene wamunene wamu Pesha.

²³ Bakulwane ba mapashi a Balevi batikitiwile mazina mu mabuka a wene hantu ku shikati sha Yohanani muzukulya Eliyashimbu.

Kupanikiwa kwa milimo yamu Litala lya Nyambi

²⁴ Bakakutwaminina Balevi, ba Hashambiya na Shelembiya na Yeshuwa na Kandimiyele, Balevi bayakiwile mu tunzunga tunzunga. Tunzunga tubili twayemezelenga Nyambi ha shikati shimo na kuliyangushuna na kukambilila kuli Nyambi, kuya ngonehe kufundiziza kwa mwene Ndavita muntu wa Nyambi.

²⁵ Ba Mataniya na mbakimbukiya na Ombandiya na Meshulama na Talimoni na Akumbu nibo bengile bakakulama Litala lya Nyambi, bekalile na ngovu za kulama tumpenci twa bishete twahahepi na mapangati aku Litala lya Nyambi.

²⁶ Aba bantu bekalilenga ku shikati sha Yoyakimu mwana Yoshuwa muzukulya Yehozandaki na kalela Nehemiya hamo na Ezila mukankombela na mukakutikita ou walilongeshele Mazu a Nyambi.

Nehemiya ukufungula kembi ka lukena

²⁷ Oho kembi ka lukena lwa Yelushalema kafunguliwile, Balevi baletiwile mu Yelushalema kufuma nimwako oku bazikilenga, nohobene ngayi mwanga batweshe kupinga shimbo na ku wahilila hamo na kwimbila nyimbo za kukambilila na mushumina wa mikwashi na tumbuli.

²⁸ Muhoko wa Balevi bakakwimbila bakungulukile kufuma ku zimbalila za zinguluka Yelushalema naku minzi yaku Netofwa,

²⁹ bamina bafumine ku Mbeti Ngilingale na Ngemba naku Azimabeti ndaba bakakwimbila balizikilile minzi yabo hahepi na Yelushalema.

³⁰ Pe bakankombela na Balevi batendele shiheka sha kuliyelesha nibo bamwine hamo na bantu na mapangati na kembi ka lukena.

³¹ Niho ami Nehemiya nakungwile bakakutwaminina bamu Yunda hayilu ya kembi na kubayaka kwendesha matanga abili amanene ngayi bende mu mihoko kuzinguluka lukena hibakambilila kuli Nyambi. Litanga lya kutatika lyayile na ku zinguluka kuboka ku shilyo sha kembi kulumba ku Lipangati lya ku Lilala.

³² Hoshaya niye wendele munyima ya bakakwimbila hamo na shitika sha bakakutwaminina bamu Yunda.

³³ Pe muhoko wa bakankombela bayilenga na ku shiba zimpandula, bengile ba Azaliya na Ezila na Meshulama,

³⁴ na Yunda na Mbenjamani na Shemaya na Yelemiya.

³⁵ Niho kwalundaminine Zakaliya mwana Yonatana muzukulya Shemaya. Bankakazendi bamina bengile ba Mataniya na Mikaya na Zakula, aba bengile bamu livumo lya Ashafwi.

³⁶ Bamukonkele kami bamina bamu livumo lyendi, bengile ba Shemaya na Azalelu na Milalayi na Ngilalayi na Maayi na Natanele na Yunda na Hanani. Aba nimwabo bashimbile bimbetesho bya mushobo wa nobyo ambeteshelenga Mwene Ndavita, muntu wa Nyambi. Ezila mukaku longesha mazu a Nyambi watwamininine litanga kumbili hibaya na kwenda.

³⁷ Ku Lipangati lya Kaheloke bakandamine ha tukandamisho tu kulumba mu Lukena lwa Ndavita na kupita ku musheke wa Ndavita na kuboka ku kembi ku Lipangati lya Mema, ku mbalila yaku mushamuko wa lukena.

³⁸ Litanga lyamina lya baya bakambililenga lyayile na kuboka ku shimoho hayilu ya kembi, pe ami Nehemiya nabakonkele munyima na shitika sha bantu. Twendele mu muhoko kupitakana Kapeshi ka Bivulu na kukuma ku Kembi kakanene,

³⁹ twayile kupitakana Lipangati lya Efulemu na Lipangati lya Yeshana na Lipangati lya Zinci naku Kapeshi ka Hananela naku Kapeshi ka Mwanda naku lipangati lya bambelele naku kuma ku Lipangati oku bahatulwilenga bakanzita.

⁴⁰ Nohobene matanga mu wubili wawo aya akambililenga kuli Nyambi emanine ha munkanda wa Litala lya Nyambi. Ha kufungilako kubakakutwaminina baya bekalile hamo na nami,

⁴¹ mu litanga lyami mwekalile bakankombela, bashibilenga zimpandula. Bengile ba Eliyakimu na Maasheya na Miniyamini na Mikaya na Eliyonayi na Zakaliya na Hananiya.

⁴² Pe bakonkelenga munyima yabo bengile ba Maasheya na Shemaya na Eliza na Uzi na Yehohanani na Malikiya na Elamu na Eza. Yezilahiya wembilishilenga bakakwimbila, nohobene bembilile shikuma naku katula mazu hayilu.

⁴³ Ha mutena uyo zinkombela zazingi zakombeleliwile, pe bantu bawahililile shikuma ndaba Nyambi wabengishile baka ku wahilila shikuma. Bambuyama na batwanuke kami balifungilile mu shimbo, pe miyoyo ya ku wahilila kwabo yatweshele kuyuvwanika kwakutali na Yelushalema.

Kuwahisha mwa kulemeshela mu Litala lya Nyambi

⁴⁴ Ha shikati shiyo kwayakiwile kwinga bakulwane ba ku bishete oku bakongelelenga mu kungwila waku Litala lya Nyambi na mbuto ya kutatika na mikabo yiya yatatikilenga kuhoka ha mwaka ha mwaka na bya wulikumi. Aba balume bekalile na ngovu za kukungula byakulya mu mafuba a hahepi na zinkena na ha mu kungwila wa bakankombela na Balevi, owe washingiwilenga kuya ngo ku mazu a Nyambi. Bantu nimwabo bamu Yunda bekalile na ku wahilila hamo na bakankombela na Balevi,

⁴⁵ ndaba batendele bimbo bya kuliyelesha ebye abatongwezele Nyambi na bakakulama Litala lya Nyambi kami batendele milimo yabo ngonehe abafundizizile Mwene Ndavita na mwanendi Sholomoni.

⁴⁶ Ku balika kunyima ku shikati sha mwene Ndavita na ntumbi Ashafwi bakakutwaminina nyimbo bembilishilenga nyimbo za kuyemeza na kukambilila kuli Nyambi.

⁴⁷ Ku shikati sha Zelumbambelu na Nehemiya bantu nimwabo ba Ishalela bapaninenga bya ha mutena ha mutena bya kuyavwa bakakwimbila hamo na bakakulama Litala lya Nyambi. Bantu bapaninenga shitapilo shashingiwilenga ku Balevi. Balevi kami bapaninenga shitapilo shashingiwilenga ku bakankombela bana ba Aloni.