Nehemiya 11 - Libuka Lya Kuyela

Bantu bayo bekalile mu Yelushalema

¹ Bakakutwaminina bazikile mu Yelushalema, pe bantwamina bakunine nyela yakuhataho lupashi lumo ku mapashi likumi akuya mu kuzika mu lukena lwa kuyela lwa Yelushalema. Aba bashalileho bazikile mu zinkena na minzi yamina.

² Bantu bayemezele muntu nimwendi ou wekalile na shifungo sha kuya mu kuzika mu Yelushalema.

³ Ngoboni bantu ba Ishalela nimwabo na bakankombela na Balevi na bakamilimo yamu Litala lya Nyambi na bazukulya bakamilimo ba Sholomoni bazikile ha makona wabo mu minzi ya mu Yunda. Ou niwo muhoko wa bakulwane bazikile mu Yelushalema na mu minzi yamina ya Yunda muntu na muntu wekalile ha likona lyendi. Aba bengile bantu Baishalela nimwabo na bakankombela na balevi na bakakutenda milimo mu Litala lya Nyambi na bazukulya bakamilimo ba Sholomoni.

⁴ Bantu bamina bafumine ku Yunda na Mbenjamani aba bazikile mu Yelushalema bengile ba Atayiya mwana Uziya. Uziya mwana Zakaliya, niye kami wengile muzukulya Zendekiya Bankakazendi bamina bengile ba Amaliya na Shefwatiya na Mahalalelu, bazukulya Pelizi mwana Yunda.

⁵ Maasheya, mwana Mbaluki niye kami muzukulya Koluhoze, bankakazendi bamina bengile ba Hazayiya na Andayiya na Yowalimbu na Zakaliya, bazukulya Shila mwana Yunda.

⁶ Ku bazukulya Pelizi balume ba mpupo bazikile mu Yelushalema bengile 468.

⁷ Bazukulya mushobo wa Mbenjamani aba bazikile mu Yelushalema, bengile Shalu mwana Meshulama, niye kami muzukulya Yowendi. Bankakazendi bamina bengile ba Pendaya na Kolaya na Maasheya na Itiyelu na Yeshaya.

⁸ Kunyima yendi kwekalile Ngambayi na Shalayi, bantu nimwabo bengile 928.

⁹ Yowele mwana Zikali niye wengile mukakutwaminina wabo na Yunda mwana Hashenuwa niye kami wengile shilolo wawubili wa mukulwane mu lukena.

¹⁰ Bakankombela aba bazikile mu Yelushalema. Bengile ba Yendaya mwana Yowalimbu na Yakini,

¹¹ na Shelaya na mwana Hilikiya, niye kami muzukulya Meshulama. Bankakazendi bamina bengile ba Zandoki na Melayoti na Ahitumbi ou wengile Mukulwane wa Bakankombela nimwabo.

¹² Wingi wa bantu nimwabo bamu livumo liyo aba batendelenga mulimo mu Litala lya Nyambi bengile 822. Andayiya mwana Yelohama niye kami muzukulya Pelaliya, bankakazendi bamina bengile ba Amazi na Zakaliya na Pashiha na Malikiya.

¹³ Likunge lya bantu bamu livumo liyo bengile 242, nibo bengile bakulwane ba mapashi. Amashishayi mwana Azalelu, niye kami muzukulya Ahizayi, bankakazendi bamina bengile ba Meshilemoti na Imele.

¹⁴ Kwekalile litanga lya bantu 128 bamu livumo liyo, bengile banzita ba kushuma. Zambindiyelu mwana Hangindolimu niye wengile mukakutwaminina wabo.

¹⁵ Mu Yelushalema mwazikilenga Balevi aba. Shemaya mwana Hashumbu, niye kami muzukulya Azilikamu. Bankakazendi bamina bengile ba Hashambiya na Mbuni.

¹⁶ Balevi ba bakulwane ba ku mulimo wa Litala lya Nyambi waha munkanda bengile ba Shambetayi na Yozambandi.

¹⁷ Mataniya niye kami wengile mukakwimbilisha nyimbo za malombelo akukambilila mu Litala lya Nyambi. Niye wengile mwana Mika, mwana Zambindi wengile muzukulya Ashafwi. Mbakimbukiya, niye wengile mukakuyavwa Mataniya. Ambinda niye mwana Shamuwa, mwana Ngalale muzukulya Yendutani.

¹⁸ Wingi wa Balevi nimwabo bazikilenga mu lukena lwa kuzila lwa Yelushalema bengile 284.

¹⁹ Bakakulama mapangati bengile ba Akumbu na Talimoni na bawushinda wabo, nimwabo hamo bengile 172.

²⁰ Pe wingi wa bantu ba Ishalela na bakankombela hamo na Balevi aba bashalileho, bazikile nahiya mu zinkena zamina namu minzi yamu Yunda ha makona wabo.

²¹ Bakakutenda mulimo mu Litala lya Nyambi bazikile ku mbalila ya Yelushalema yikutumbiwa ngayi Ofwila, pe bakakubatwaminina bengile baziha na Ngishipa.

²² Mu kakutwaminina mulimo wa Balevi mu Yelushalema, wengile Uzi mwana Mbani, mwana Hashambiya. Bankakazendi bamina bengile ba Mataniya na Mika. Pe Uzi wengile wamu livumo lya Ashafwi, livumo liya lyekalile na ngovu ha bakakwimbila ba mu Litala lya Nyambi.

²³ Kwekalile ndayano za wene za kutongweza mavumo eshe eze bakaliyangushunenga mukwimbila nyimbo za mu Litala lya Nyambi ha mutena ha mutena.

²⁴ Petahiya mwana Meshezambela, wamu livumo lya Zela mwana Yunda wemaninine bantu ba Ishalela ku nkuta ya Bapesha.

Bantu bamu zinkena zamina namu minzi

²⁵ Wingi wa bantu bekalilenga mu minzi yekalile hahepi na mafuba wabo. Ba mushobo wa Yunda bekalilenga mu zinkena za Kiliyati Alimba na Ndimboni namu Yekambizelu namu minzi yekalile hahepi na neze zinkena,

²⁶ bamo bazikile mu zinkena za Yeshuwa namu Molanda na Mbeti Peleti,

²⁷ namu Haza Shuwali namu Mbelishemba namu minzi ya zingulukako.

²⁸ Bamina bazikile mu lukena lwa Zikilangi namu Mekona na minzi yalwo,

²⁹ namu Eni Limoni namu Zola namu Yalimuti,

³⁰ namu Zanowa namu Andulama namu tunzi twekala hahepi na minzi eye. Na mu Lakishi naku mafuba awa ekalilenga kwakwipi na lukena lwa Azeka na minzi yalwo. Nohobene bantu ba mushobo wa Yunda bazikile mu litunga lya mukati ka Mbelishemba na mukulo wa Hinoma.

³¹ Bantu ba mushobo wa Mbenjamani bazikile mu zinkena za Ngemba namu Mikemashi namu Ayi namu Mbetele namu minzi ya kwakwipi,

³² ya Anatoti na Nombu na Ananiya,

³³ na Hazola na Lama na Ngitayima,

³⁴ na Handinda na Zemboimu na Nambalati,

³⁵ na Londi na Ono namu mukulo wa bantu bawutungu.

³⁶ Tuzunga tumo twa Balevi baya bazikilenga mu litunga lya Yunda bazikile hamo na bantu ba Mbenjamani.