Nehemiya 10 - Libuka Lya Kuyela

¹ Wakutatika ku nyatelaho lizina lyendi wengile kalela Nehemiya mwana Hakaliya, pe niho Zendekiya anyateleleho kami lizina lyendi. Bakankombela kami aba batikitileko mazina wabo,

² bengile ba Shelaya na Azaliya na Yelemiya,

³ na Pashiha na Amaliya na Malikiya,

⁴ na Hatushi na Shembaniya na Maluki,

⁵ na Halimu na Melemoti na Ombandiya,

⁶ na Ndanyele na Nginetoni na Mbaluki,

⁷ na Meshulama na Ambiya na Miyamini,

⁸ na Maaziya na Mbilingayi na Shemaya. Balevi kami aba banyateleleho mazina wabo,

⁹ bengile ba Yeshuwa, mwana Azaniya na Mbinuyi wamu livumo lya Henandandi na Kandimiyele,

¹⁰ na bawushinda wabo ba Shembaniya na Hondiya na Kelita na Pelaiya na Hananu,

¹¹ na Mika na Lehobi na Hashambiya,

¹² na Zakula na Shelembiya na Shembaniya,

¹³ na Hondiya na Mbani na Mbeninu.

¹⁴ Bakakutwaminina ba bantu aba banyateleleho kami mazina wabo. Bengile ba Paloshi na Pahati Mowambi na Elamu na Zatu na Mbani,

¹⁵ na Mbuni na Azingandi na Mbembayi,

¹⁶ na Andoniya na Mbingibayi na Andini,

¹⁷ na Atali na Hezekiya na Azula,

¹⁸ na Hondiya na Hashumi na Mbezayi,

¹⁹ na Halifwa na Anatoti na Nebayi,

²⁰ na Mangipiyashi na Meshulama na Heziya,

²¹ na Meshezambela na Zandoki na Yanduwa,

²² na Pelatiya na Hananu na Anayiya,

²³ na Hoshiya na Hananiya na Hashumbu,

²⁴ na Haloheshi na Piliha na Shobeki,

²⁵ na Lehumi na Hashambina na Mayasheya,

²⁶ na Ahiya na Hananu na Anani,

²⁷ na Maluki na Halimu na Mbaana.

Kulimama

²⁸ Etu bantu ba Ishalela na bakankombela na Balevi na bakakulama Litala lya Nyambi na bakakwimbila mu Litala lya Nyambi na bakamilimo bamu Litala lya Nyambi na bamina nimwabo bakakwombatala Mazu a Nyambi, banalitapululu nibo bamwine ku bantu ba mishobo yashenge yamu litunga lyetu, hamo na bakazetu na banabetu nimwabo babalume na naba ba bambuyama aba bali na ngana za kutwesha ku yuvwishisha,

²⁹ tunalifungili hamo na bawushinda wetu na bakakutwaminina betu. Tunalifungili hamo mu shikulupisho sha kulama Mazu a Nyambi apanikiwile muli mukamulimo wendi Moshesha. Ngayi tukombatalenga nimwabyo biya atutongwezele Nyambi ya Ngula, Nyambi yetu, mwanga tukalamenga Mazu wendi nimwawo. Ndi tukakiluka mbeza eze pe tukekala na shikuto.

³⁰ Twakulupishi ngayi kukayekiwisha banabetu ku bantu ba mishobo yashenge yamu litunga lyetu tufwako, hinge banabetu babalume kukayeka bana babo bafwako.

³¹ Ndi bantu ba mu litunga ba mishobo yashenge bakaleta mbuto ya mpeka hinge shumangani shamina mu kulandisha kukwetu ha Mutena Wakukatala, hinge ha matena amina akuzila, kukalandako tufwako. Kumwaka wa mutanu na yibili nimwayo kukalima mafuba wetu tufwako, tukalehela mikuli nimwayo ku nobo batambwile mikuli kukwetu.

³² Ha mwaka ha mwaka, muntu na muntu, ukapananga shiliva ya wulemu wa mangilamu mutanu, mu kuyavwa ku byuma bya kutendulwisha Litala lya Nyambi.

³³ Tukapananga mankende ashizila na ntupu ya mbuto ya mpeka yaha mutena ha mutena na bimuna bya kuhokesha ha mutena ha mutena kwinga zinkombela na zintupu za shizila zaha Matena aku Katala na bimbo byaha Ngonda Wamupya naha bimbo byamina na zintupu zamina za shizila na zinkombela za kufumisha wubi wa Baishalela na byuma nimwabyo bikashingiwa mu Litala lya Nyambi.

³⁴ Ha mwaka ha mwaka etu bantu, hamo na bakankombela ba Balevi, tukakunanga nyela ya ku shingishisha mavumo awa aku fwanina kucaba nkuni za kuhokeshela zinkombela zikukombeleliwa ha kaala ka Nyambi ya Ngula, Nyambi yetu, nehe shatikitiwa mu mazu a Nyambi.

³⁵ Ha mwaka ha mwaka tukatwalanga ku Litala lya Nyambi ntupu ya mbuto ya mpeka ya kutatika kuteza na mikabo yiya ya kutatika kuhoka ku mitondo yetu.

³⁶ Mwana nimwendi wa mweli wa mulume ukahemuwa ku muntu na muntu tukamutwalanga ku bakankombela ba mu Litala lya Nyambi mu kumufungwila kuli Nyambi. Mwana nimwendi wakutatika kuhemuwa ku ngombe na ngombe waku zingombe zetu nimwazo na mwana nimwendi wakutatika kuhemuwa ku mbelele na mbelele waku bambelele betu nimwabo, hamo na mwana wakutatika kuhemuwa ku mpongo na mpongo waku bampongo betu nimwabo, shikatendiwa ngonehe shatikitiwa mu Mazu a Nyambi.

³⁷ Tukatwalanga ku bakankombela bamu Litala lya Nyambi muvuba unatendiwi ku mbuto ya mpeka ya kutatika kuteza, ha mwaka na mwaka na zintupu zetu zamina za waine na mazi a olive na mishobo nimwayo ya mikabo. Tukatwalanga ku Balevi bya wulikumi kunebye twalimanga ku mafuba wetu, ndaba Balevi nibo ba kungwishanga bya wulikumi bya mu mafuba wetu.

³⁸ Bakankombela bahemuwa kuli Aloni bakekala hamo na Balevi, oho bakakungulanga bya wulikumi. Pe Balevi bakatwalanga shimo sha wulikumi ku shishete sha Litala lya Nyambi ku bya wulikumi nimwabyo banakungwishi.

³⁹ Bantu ba Ishalela na Balevi bakatwalanga bitapilo bya mbuto ya mpeka na waine na mazi a olive ku bishete bakongelanga bikwatilo bya mu Litala lya Nyambi. Naku matala a bakankombela aba bali ha mulimo naku bakakulama Litala lya Nyambi. Naku litanga lya bakakwimbila mu Litala lya Nyambi. “Kuka kenda Litala lya Nyambi yetu tufwako.”