Nehemiya 1 - Libuka Lya Kuyela

Kulifulankana kwa Nehemiya ha Yelushalema

¹ Awa niwo mazu na nebye atendele Nehemiya mwana Hakaliya. Mu mwaka wa 20 mu ngonda wa Kishilevi, oho Atazekishi wengile kalela wa Pesha. Ami Nehemiya nekalile mu Shusha, mu munzi wawunene.

² Hanani umo wa bawushinda wami, wafumine ku Yunda hamo na litanga lya bantu bamo. Niho na bepwile bya baminetu Bayunda aba bafumine mu wuntampwa mu Mbambiloniya na bya Lukena lwa Yelushalema.

³ Bantongwezele ngayi baya bapulukile na kuboka mu litunga lyetu bali mu wukalu wawunene na lisheni. Pe kami ngayi twimbi twa Yelushalema twa nyemuka na mapangati atwo ahokeshiwa.

⁴ Oho nayuvwile ebye nimwabyo nekalile hanci na kulila. Kwapitile matena hinilila na kuzila kulya. Pe nalombelele kuli Nyambi wa Muyilu ngayi,

⁵ “Obe Nyambi ya Ngula! Obe Nyambi wa Muyilu! Uli wamunene na kukomokesha. Walamanga Kulimama kwobe na shishemo shobe mwaya myaka nanobo ba ku kuhaka na kutenda ebye ukubatongweza.

⁶ Obe Nyambi ya Ngula! Bangula matu wobe na kuyuvwa malombelo wami, oho nikulombela mwaana na wushiku ha bakamilimo bobe bantu ba Ishalela. Nikulitabila ngayi etu bantu ba Ishalela, tunabipishi. Bankaka zami na nami tunabipishi.

⁷ Tunatende bya kuluwa kukwobe. Kutenda ebye watutongwezele tufwako tunabulu kulama mazu obe aya watupanikile muli mu kamilimo wobe Moshesha.

⁸ Anuka biya watongwezele Moshesha oho wambile ngayi, ‘Ndi enu bantu ba Ishalela mukwinga ba kulungwa kukwami, nikamipanzanishila mukati ka bantu ba matunga amina.

⁹ Ngoboni ndi mu kuboka kami kukwami na kutenda ngonehe namitongwezele, hinge ndi munapanzanini hano hanci nimwaho nikamibwesha mu mwanya uya nahatile ngayi nikalemeshiwenga, pe mukenga bantu bami kami.’

¹⁰ “Obe Hekulu, aba banengi bakamilimo bobe na bantu bobe obemwine. Wabalamwinine na liboko lyobe lya ngovu na nyala zobe zazinene.

¹¹ Obe Nyambi ya Ngula, yuvwilila kulamba kwami naku malombelo a bakamilimo bobe banawahilili kukulemeeka. Lelo untwesheshe ngayi mwene wamunene anyuvwileko nceshe.” Ha shikati shiyo, ami nengile kawaba wa mwene wamunene.