Ndayano 9 - Libuka Lya Kuyela

Kubula kwombatala kwa bantu

¹ “Yuvwilila obe Ishalela, lelo uli na kushinga kuzabuka mushinzi wa Yondana na kutambula litunga liya lyenga lya mikoka yayinene na ngovu shikuma kukupitakana. Minzi yabo yayinene hamo na twimbi tuya twa kuma naku likumbi.

² Bantu banengi babatali na ngovu, nibo banengi bana ba Anakimu, baya mwalimuka, kami enu mwayuvwako ngayi kowa muntu wakutwesha kubalwisha.

³ Haya limuka ha mutena walelo ngayi Nyambi ya Ngula uli hambili yobe ngonehe mundilo wakulasheka. Ukabatampwisha oho ukuya na kulikaka ngayi ukabatande na kubalobesha wanguwangu, ngonehe eshe ambile.

⁴ “Oho Nyambi ya Ngula, Nyambi yobe, wakutandilabokale, hinga wamba mu mutima wobe ngayi, ‘Ndaba ya kulunga kwami kunaleteshe ngayi nikome lino litunga,’ ngoboni Nyambi ya Ngula uli na ku kutandilamo bantu aba ndaba banengi bakuluwa.

⁵ Kaliha ndaba ya kulunga hinge kwoloka kwobe kukaletesha ngayi ukakome litunga lyabo, ngoboni ndaba banengi bakuluwa, Nyambi ya Ngula, Nyambi yobe, ukakutandilabo ndaba ukushinga kulama kulibeza kuya atendele na bankakazobe Abulahama, Ishaki na Yakobo.

⁶ Nohobene limuka ngayi Nyambi ya Ngula kaliha ukukupana elye litunga lya wilo ndaba uli wakulunga, byo, ndaba unengi muntu wamukalu mitima.

⁷ “Hinga ukavulama eshe wapilamishile Nyambi ya Ngula, Nyambi yobe, mu libelelengwa. Ku balika mutena uya mwafumine mu Engepita kukuma naku mutena uya mwakumine mu mwanya uno, mwengile bamafutufutu na kulwisha Nyambi ya Ngula.

⁸ Hinge kuyo ku lipili lya Shinayi mwapilamishile Nyambi ya Ngula. Mwamupilamishile shikuma wafwaninine kumilobesha.

⁹ Nakandamine ku lipili mu kutambula matapa a limanya aha hatikitiwile kulimama kwa Nyambi ya Ngula alimamine nanenu. Nakekalileko matena makumi anaa na zinciku makumi anaa, kami kaliha nalile sha kulya hinge kunwa mema.

¹⁰ Niho Nyambi ya Ngula ampanine matapa abili a mamanya, haya atikitile na munwewendi niyemwine ebye ambile kukwenu mu mundilo ha mutena uya mwakungulukilile kuyo ku lipili.

¹¹ Kunyima ya matena makumi anaa na zinciku zinaa, Nyambi ya Ngula wampanine matapa abili a mamanya aha atikitile kulimama.

¹² “Niho Nyambi ya Ngula ambile kukwami ngayi, ‘Kunkuluka wanguwangu ndaba bantu bobe, baya wafumishile ku Engepita, banabipi na kutenda wubi. Banafumu wanguwangu kunebye nabalayile ngayi babitende, kami banalitendele kanankishi nibo bamwine.’

¹³ “Nyambi ya Ngula wambile kukwami kami ngayi, ‘Namono wukalu wa mitima ya naba bantu!

¹⁴ Hinga wezeka kunkanisha ndehe nibalobeshe ngayi kukabule muntu wakubanuka kami kumbili. Niho nika kutenda tata mukoka wawunene na ngovu shikuma kubapitakana.’

¹⁵ “Hohobene natengulukile, niho na kunkulukile ku nceto ya lipili, hinga na shimba matapa abili a mamanya aha hatikitiwile kulimama. Milangi ya mundilo yalashekelenga ku lipili.

¹⁶ Pe namonene ngayi mwabipishilakale Nyambi ya Ngula, Nyambi yenu, kami mwalitendele kanankishi kakuyungulula mu shifwekesha sha nkunzi, ndaba munashanuku wanguwangu ku mazu wendi.

¹⁷ Nohobene kumbili yenu niko nayumbilile matapa a mamanya abili, niho apabozokele twanitwani.

¹⁸ Niho kami na shulubalile na kukinka lupala hanci matena makumi anaa na zinciku makumi anaa ku meho a Nyambi ya Ngula, kami kaliha nalile sha kulya hinge kunwa mema. Natendele eshe ndaba ya wubi mwatendele kuli Nyambi ya Ngula na kumupilamisha.

¹⁹ Natinine wukali wakubamba wa Nyambi ya Ngula, ndaba wakalihile na kushinga kumilobesha. Ngoboni Nyambi ya Ngula wanyuvwililile.

²⁰ Kami Nyambi ya Ngula wapilaminine Aloni na kushinga kumuziha, ngoboni nalombelele kami Aloni ha nosho shikati.

²¹ Natolele shiya shuma sha shibi mwatendele, kaya ka nkunzi, niho nakayumbilile mu mundilo na kukacancozola na kukatwa muhungahunga, pe niho nayumbilile muhunga mu mushinzi uya wakunkwilenga mema ha lipili.

²² “Kami mwapilamishile Nyambi ya Ngula, Nyambi yenu, oho mwekalile ku Tambela naku Masha naku Kimbuloti Hatava.

²³ Kami oho amifumishile ku Kandeshi Mbaneya hamo na kumipana ndayano za kuya na kukoma litunga liya amipanine Nyambi ya Ngula, mwamulwishile kaliha mwa mukulupilile hinge ku mwombatala.

²⁴ Ku balika ku shikati shiya namilimukile, mwengile bamafutufutu kuli Nyambi ya Ngula.

²⁵ “Nohobene na shulubalile na kukinka lupala hanci ku meho a Nyambi ya Ngula matena makumi anaa na zinciku za makumi anaa, ndaba nalimukile ngayi washumishile ngayi ukamilobesha.

²⁶ Kami nalombelele ngayi, ‘Obe Nyambi ya Ngula, mwene yami, hinga ulobesha bantu bobe, bantu aba walamwinine na kubafumisha ku Engepita na liboko lyobe lyalinene na ngovu zobe zazinene na nyala.

²⁷ Anuka bakamilimo bobe, ba Abulahama na Ishaki na Yakobo, kami hinga uyuvwilila wukalu wa mutima yabo kuku bipisha na kuluwa kwa naba bantu.

²⁸ Hamina Baengepita bakamba ngayi wakwangakale kukumisha bantu bobe mu litunga liya waba kulupishile. Bakamba kami ngayi watwalile bantu bobe mu libelelengwa mu kubapunwinamo, ndaba wabazimba.

²⁹ Shinenebene, aba bantu wahatile kwinga likona lyobe obemwine na kubafumisha ku Engepita na liboko lyobe lyalinene na ngovu zobe zazinene na nyala.’ ”