Ndayano 8 - Libuka Lya Kuyela

Litunga lyaliwahe elye likakomiwa

¹ “Ombatalenu ndayano nimwazo eze namilaya lelo, ngayi mwanga muyoye na kuhanya na kutambula litunga liya Nyambi ya Ngula alibezele ku bankakazenu.

² Anukenu Nyambi ya Ngula, Nyambi yenu, eshe amyendeshele ha mukala uya wawutali mu libelelengwa myaka eye makumi anaa yinamana na kumitumina byabikalu mu kumyezeka ngayi niye mwanga alimuke ebye mwafungile kutenda na ku mona ndi munakwombatala ndayano zendi.

³ Wamifwishile ku nzala, niho amipanine maana ngayi mulye, byakulya biya enu na bankakazenu kumwaka mwabulile kulya. Watendele eshe mu kumilongesha ngayi muntu ku fwanina kuyoya na linkende tuhu wufwako. Ngoboni ukayoya na mazu akufuma mu kanwa ka Nyambi ya Ngula.

⁴ Bivwalo byenu kaliha byacancokele, kami mawulu wenu kaliha azimbile ha mukala wa myaka makumi anaa.

⁵ Anukenu ngayi Nyambi ya Ngula, Nyambi yenu, ukumitengulula na kumishushula mu nzila yimo iya tata muntu akeyeshanga nayo bana bendi.

⁶ Nohobene, lamenu ndayano za Nyambi ya Ngula, endenu mu zinzila zendi na kumutina.

⁷ Nyambi ya Ngula, Nyambi yenu, ukamileta mu litunga lya wilo, mu litunga liya lili na mishinzi na tuheloke, kami tushinzi twa ku nceto ya limvu tukuheloka mu mikulo namu binkanda,

⁸ mu litunga likuyima loto na luku na mikolobozi ya shinyanca na nkuyu na manzenze na mitondo ya olive na wushi.

⁹ Kukayuvwa nzala hinge kushinga shuma mufwako. Mamanya wamo ali na byondo, kami mukatwesha kukaba mukuba ku binkanda byawo.

¹⁰ Mukalya na kwikuta, mukayemeza Nyambi ya Ngula, Nyambi yenu, ndaba ya litunga lya wilo anamipaniki.”

Kushuziwa kwa kuvulama Nyambi ya Ngula

¹¹ “Keyenu ngayi mubule kuvulama Nyambi ya Ngula, Nyambi yenu. Hinga mukwanga kwombatala ndayano, kufundiziza na mazu wendi nimwawo aya namitongweze lelo.

¹² Oho mwawanakale nimwabyo mukushinga kulya, kami munatende matala amawahe mwakwikala,

¹³ Oho zingombe zenu na bambelele benu bahemununakale, shiliva na ngolinde yavulakale na wuheti wenuwamina nimwawo wakavula,

¹⁴ monenu ngayi hinga mwinga bakakuliyemeza na kuvulama Nyambi ya Ngula, Nyambi yenu, ou wamilamwinine mu Engepita, omu mwengile bandungo.

¹⁵ Wamitwamininine na kumipitisha mu libelelengwa lyalinene lya kutinisha shikuma, omu bene mwekalile mayoka a wuhungu na tupilili, litunga lya nyuminine lya kubula mema, wamikukishilile mema ku limanya lya kuyuminina.

¹⁶ Mu libelelengwa wamipanine maana a kulya, byakulya biya byenga bankakazenu ku mwaka hinga batanga kubilya. Watumine wukalu kukwenu mu kumyezeka, ngayi ha kukotoka atweshe kumitandalisha na byuma byabiwahe.

¹⁷ Shangamenu haya, kutina muhanganika mu mitima yenu ngayi munahete na ngovu zenu hinge na nyala zenu.

¹⁸ Anukenu ngayi Nyambi ya Ngula, Nyambi yenu, niye wamipananga ngovu za kwinga bakakuheta. Watendele eshe ndaba na lelo ushili kwinga wakulunga kukulimama kuya alibezele na bankakazenu.

¹⁹ Hinga muvulama Nyambi ya Ngula, Nyambi yenu na kuyembulukila ku banyambi bashenge mu kulemesha na kubatendela milimo. Ndi mukutenda noho, mwa shikuma nikumishuza lelo na kumilobesha.

²⁰ Ndi kwombatala Nyambi ya Ngula mufwako, pe mukanongeshiwa ngonehe mishobo iya akalobesha oho muli na kuya na kulikaka.”