Ndayano 7 - Libuka Lya Kuyela

Bantu ba Nyambi ya Ngula

¹ “Nyambi ya Ngula, Nyambi yenu, ukamitwala mu litunga liya muli na kutambula, kami ukatandamo mikoka yayingi oho mu kuya na kulikaka, ukatanda mikoka mutanu na yibili yayinene na ngovu shikuma kumipitakana. Bengile Bahita na Bangilingashi na Baamoli na Bakenaani na Bapelizi na Bahivi na Bayembushi.

² Oho Nyambi ya Ngula, Nyambi yenu, akayaka aba bantu mu maboko wenu himu kubakoma, pe mukafwanina kubalobesha nimwabo. Hinga muliyuvwashana nabo hinge kubayuvwila nceshe.

³ Hinga muyekiwisha bana benu kukwabo, kami hinga mwitabilisha bana benu kuyeka bana babo.

⁴ Ndaba bakashanwisha bana benu kuli Nyambi ya Ngula na kulemesha banyambi bashenge. Ndi mukutenda noho, pe Nyambi ya Ngula ukamipilamina kumilobesha shawanguwangu.

⁵ Haya nyemunenu tuula twabo na kushandula zimpangwa zabo za mamanya ashizila. Ketolenu mishubwa ya nyambi yabo Ashela na kuhokesha tunankishi twabo.

⁶ Tendenu eshe ndaba munengi ba Nyambi ya Ngula, Nyambi yenu. Unamihata ku bantu nimwabo ba hanci ngayi mwinge bantu bendi babalemu.

⁷ “Nyambi ya Ngula kaliha wamihakile na kumi hata ndaba ngayi mwapitakanine bantu bamina kuwingi, ngoboni ndaba mwengile mukoka wawushe shikuma hano hanci.

⁸ Ngoboni Nyambi ya Ngula wamihakile na kulama shikulupisho shiya alibezele ku bankakazenu. Nisho shuma shiya ami kulizile na ngovu zendi zazinene pe wamishobolwele ku wulungo kuli Fwalo wa Engepita.

⁹ Anukenu ngayi Nyambi ya Ngula, Nyambi yenu, nengi Nyambi umo tuhu, kami wenga wakulunga. Ukalama kulimama kwendi na ku monesha shishemo shendi sha mwaya myaka ku bihemunwino likulukazi baya ba kumuhaka na kwombatala ndayano zendi,

¹⁰ ngoboni kucincazala ha kushushula baya ba kumuzimba wufwako.

¹¹ Nohobene, haya ombatalenu ndayano na mazu na kufundiziza kwendi nimwako kuya namipaniki lelo.

Mfuywezi zaha kwombatala

¹² “Ndi mu kuyuvwilila eze ndayano na kuzombatala na kulunga, pe Nyambi ya Ngula, Nyambi yenu, ukalama kulimama kwendi kukwenu na kuholola shishemo sha mwaya myaka kukwenu ngonehe alibezele ku bankakazenu.

¹³ Ukamihaka na kumipanika mfuywezi na kumivulisha shikuma na kwikala na bana babengi. Ukafuywela mu mafuba wenu ngayi mwanga mukekale na mbuto na waine na mazi a olive. Kami ukamifuywela na kumipanika zingombe zazingi na bambelele. Ukamipanika bitandalisho ebye nimwabyo mu litunga liya a kulupishile bankakazenu kubapanalyo.

¹⁴ Mukekala na mfuywezi mukati ka bantu nimwabo hano hanci. Kowa muntu hakati kenu ukabula kubeleka, kami kowa zingombe zenu zikabula kuhema.

¹⁵ Nyambi ya Ngula ukamilama ku malweli nimwawo. Kukaleta hahenu malweli aya a kufwana aya mwakolele mu Engepita wufwako, ngoboni ukawaleta nimwawo ha bamalamo benu.

¹⁶ Nongeshenu mushobo nimwawo uya Nyambi ya Ngula, Nyambi yenu, anapana mu maboko wenu, kami hinga mubayuvwila nceshe. Hinga mulemeesha banyambi babo, ndaba shikenga sha kufwana kukwenu.

¹⁷ “Hinga mulifulankana enu bamwine ngayi aba bantu banamipitakana ku wingi, kami ngayi kutwesha kubatanda mufwako.

¹⁸ Hinga mubatina, anukenu ebye atendele Nyambi ya Ngula, Nyambi yenu, kuli Fwalo na bantu nimwabo ba mu Engepita.

¹⁹ Anukenu binkezembwa bya kutinisha biya mwamonene na meho wenu na malele na bikomokesho na ngovu zazinene na nyala ziya Nyambi ya Ngula, Nyambi yenu, amilubwile nabyo. Ukanongesha bantu nimwabo baya mukutina, ngonehe anongeshele Baengepita.

²⁰ Ukatuma kampwe mukati kabo, ukalobesha baya ba kupanza na kuya na kuholama.

²¹ Nohobene hinga mutina aba bantu. Nyambi ya Ngula, Nyambi yenu, ulinanenu. Nyambi wenga wamunene, kami niye unafwanini kutiniwa.

²² Ukatanda matunga awa mu wushewushe oho mu kuya na kulikaka, ngoboni kukatwesha kubalobesha nimwabo shikati shimo mufwako. Ndaba, ndi mushitende noho, pe wingi wa batuyamana ba lishaka bakahanya pe shikenga malamo kukwenu.

²³ Nyambi ya Ngula ukayaka bamalamo mu maboko wenu na kubengiza mu kampwe kutwala ha kuloba kwabo.

²⁴ Ukayaka bamyene zabo mu maboko wenu, muka baziha, kami bakavulamiwa. Kowa muntu ukatwesha kumikanisha, mukalobesha bantu nimwabo.

²⁵ Mukahokeshe tunankishi twabo. Hinga mukalishoza shiliva hinge ngolinde biya bili kukwabo, kami hinga mubishimba ngayi binge byenu ndi mukutenda noho mukafwamo, ndaba bikuyingisha wunyengwe Nyambi ya Ngula.

²⁶ Hinga muleta tumo ku tunankishi otwe mu matala wenu, ndelewa shikuto shabo shiya shili hahabo shikekala hahenu. Mu ku fwanina ku zimba na kulimbulula tunankishi otwe, ndaba nito tuli mu shikuto sha Nyambi ya Ngula.”