Ndayano 6 - Libuka Lya Kuyela

Lundayano Lwalunene

¹ “Eze nizo ndayano, kufundiziza na mazu nimwawo aya andayile Nyambi ya Ngula, Nyambi yenu, ngayi nimilongeshe, zombatalenu mu litunga liya mu kuya na kulikoma.

² Ha shikati sha kuyoya kwenu, enu na bazukulyenu, yuvwilenu bowa Nyambi ya Ngula, Nyambi yenu na kwombatala ndayano zendi nimwazo ziya na kumipanika, ngayi mwanga muzike mu litunga liya shikati shashitali.

³ Ziyuvwililenu enu bantu ba Ishalela na kuzombatala, ngayi byuma nimwabyo bikenda shiwahe kukwenu, pe mukafutuka mukoka wangovu na kuzika mu litunga liya likukunkula mahwe na wushi, ngonehe a kulupishile Nyambi ya Ngula, Nyambi ya bankakazetu.

⁴ “Yuvwilila, Obe Ishalela, Nyambi ya Ngula, Nyambi yetu wenga umo pele.

⁵ Haka Nyambi ya Ngula, Nyambi yobe na mutima wobe nimwawo na moyo wobe nimwawo, kami na ngovu zobe nimwazo.

⁶ Pe ndayano eze nikwamba kukwenu lelo zikale mu mitima yenu.

⁷ Zilongeshenu ku bana benu na kutontazo oho muli ha munzi hinge muli kwashenge, hinge mu kukatala, hinge oho muli ku mulimo.

⁸ Zimangilenu ku maboko wenu na kuzivwala ha zimpala zenu kwinga shanukisho

⁹ Zitikitenu ha bikwiliti bya bihala bya matala wenu na ha mapangati wenu.”

Kushuza bamalimbwilizi

¹⁰ “Ngonehe Nyambi ya Ngula, Nyambi yenu alibezele na bankakazenu ba Abulahama na Ishaki na Yakobo, ngayi ukamipana litunga liya lili na minzi yayinene na wuwahe, iya mwabulile kutenda.

¹¹ Matala akenga akwinzala na byuma byabiwahe biya mwabulile kuyakamo na mashima aya mwabulile kukaba na mafuba a mikolobozi ya shinyanca na mafuba a mitondo ya olive aya mwabulile kutampika. Oho mukalyabyo mukekuta.

¹² Kami hinga mukavulama Nyambi ya Ngula, ou wamifumishile mu Engepita omu mwengile bandungo.

¹³ Panenu maleema tuhu Nyambi ya Ngula, Nyambi yenu, mulemeshenunga niye tuhu na kulibeza mu lizina lyendi.

¹⁴ Hinga mulemeesha banyambi bashenge, ku banyambi bamo ba bantu aba bamizinguluku.

¹⁵ Ndi mukalemeesha banyambi bamina wukali wa Nyambi ya Ngula ukeza na kumitukukila ngonehe mundilo pe mukaloba kulungu, ndaba Nyambi ya Ngula, Nyambi yenu, wenga Nyambi walihungu.

¹⁶ “Hinga mwezeka Nyambi ya Ngula, Nyambi yenu, ngonehe mwatendele ku Masha.

¹⁷ Monenu ngayi mukwombatala ndayano nimwazo za Nyambi ya Ngula, Nyambi yenu ziya amipanikile.

¹⁸ Tendenu ebye aku mona Nyambi ya Ngula ngayi byabiwahe na kwoloka, pe nimwabyo bikenda shiwahe kukwenu. Mukatwesha kukoma litunga lya wilo liya Nyambi ya Ngula alibezele ku bankakazenu.

¹⁹ Mukatanda bamalamo benu ngonehe Nyambi ya Ngula ambile.

²⁰ “Kubikati bikeza kumbili bana benu bakamipula ngayi, ‘Kati shumangani Nyambi ya Ngula, Nyambi yetu, atulayelele kwombatala eze ndayano, kufundiziza na mazu awa nimwawo?’

²¹ Pe muka batongweze ngayi, ‘Etu twengile bandungo kuli Fwalo wa Engepita, ngoboni Nyambi ya Ngula watufumishile na ngovu zendi zazinene.

²² Twamumonene etu bamwine na meho wetu hatenda bikomokesho na kutenda byuma bya kutinisha ku Baengepita na kuli Fwalo na babilolo bendi nimwabo.

²³ Watushobwelele ku Engepita kutuleta kuno ngayi mwanga atupane litunga elye alibezele ku bankakazetu ngayi ukabapanalyo.

²⁴ Niho Nyambi ya Ngula, Nyambi yetu, atulayile kwombatala eze ndayano nimwazo na kumutina. Ndi tukutenda noho ukawahilila shikati nimwasho na kulama wumi wetu.

²⁵ Shikenga kulunga kukwetu ndi tukulama shiwahe ndayano za Nyambi ya Ngula, ngonehe atulayile.’ ”