Ndayano 5 - Libuka Lya Kuyela

Ndayano likumi

¹ Moshesha wehanine bantu ba Ishalela nimwabo hamo, niho ambile kukwabo ngayi, “Enu bantu ba Ishalela, yuvwililenu ndayano na kufundiziza nimwako oku nili na kumitongweza lelo. Lilongeshenuko mu kuzombatala shiwahe.

² Nyambi ya Ngula, Nyambi yetu walimamine nanetu ku lipili lya Shinayi.

³ Kaliha ku bankakazetu tuhu kuya alimamine, ngoboni hamo nanetu nimwetu tuli na kuyoya kuno lelo.

⁴ Ha lipili niho ambililenga Nyambi ya Ngula nanenu meho na meho mu mundilo.

⁵ Nemanine mukati kenu na Nyambi ya Ngula ha shikati shiyo na kumitongweza ebye ambilenga, ndaba enu mwatininenga mundilo, kami kaliha mwatweshele kukandama ku lipili. Nyambi ya Ngula wambile ngayi,

⁶ ‘Ami Nyambi ya Ngula, Nyambi yenu, ou wamifumishile mu Engepita omu mwengile bandungo.

⁷ “‘Hinga mulemeesha nyambi washenge ndele tuhu ami.

⁸ “‘Hinga mukalitendela shifwekesha sha kubaza shinge shanahiti ku shuma shili muyilu, hinge shuma shili hano hanci, hinge shuma shili mu mema.

⁹ Hinga mukashungumana ku kanankishi hinge kukalemesha, ndaba ami Nyambi ya Ngula, Nyambi yenu nenga Nyambi walihungu. Nikaleta kashushwilo ha baya banzimba na ha bazukulyabo ku shihemunwino sha wuhatu na sha wunaa.

¹⁰ Ngoboni nikamonesha shishemo sha mwaya myaka ku bihemunwino makulukazi a baya ba ku haka na kulama ndayano zami.

¹¹ “‘Hinga mutendesha lizina lya Nyambi ya Ngula, Nyambi yenu mu nzila yayibi, ndaba Nyambi ukashushula bantu nimwabo aba ba Kubipisha lizina lyendi.

¹² “‘Lamenu Mutena Wakukatala na kuwu zilikila kwinga wa kuyela, ngonehe amilayelele Nyambi ya Ngula, Nyambi yenu.

¹³ Mukatenda milimo yenu nimwayo mu matena mutanu na umo,

¹⁴ ngoboni mutena wa mutanu na abili unengi mutena wakukatala, ou wafunguliwila kukwami. Ha mutena uyo kowa wakutenda milimo, hinge enu, hinge bana benu babalume, hinge banabenu ba bambuyama, hinge bandungo benu, hinge bimuna byenu, hinge mapukwenda aba bekala mu litunga lyenu. Bandungo benu ba ku fwanina kukatala ngonehe mukutenda enu.

¹⁵ Anukenu ngayi nanenu mwengile bandungo mu litunga lya Engepita, kami ngayi Nyambi ya Ngula, Nyambi yenu, wamilamwinine na ngovu zendi na nyala zazinene. Nisho shuma anamilaya ngayi mulame Mutena Wakukatala.

¹⁶ “‘Lemeeka tatiyobe na mandiyobe, ngonehe namilayile ami Nyambi ya Ngula, Nyambi yenu, ngayi nimwabyo byende shiwahe kukwenu kami enu mwanga muyoye matena amengi mu litunga liya nikumipanalyo.

¹⁷ “‘Hinga uziha.

¹⁸ “‘Hinga utenda wumambe.

¹⁹ “‘Hinga uyiba.

²⁰ “‘Hinga ubangila muntu mahalo.

²¹ “‘Hinga ulishoza mukaza minobe. Hinga ulishoza litala lyendi, hinge mfuba yendi, hinge bandungo bendi, hinge zingombe zendi, hinge bambongolo bendi, hinge shuma nimwasho shiya aheta.’

²² “Eze ndayano nimwazo nizo ambile Nyambi ya Ngula kukwenu nimwenu, oho mwakungulukilile ku lipili na lizu lya ngovu mu mundilo na mu makumbi amaliti. Kowa byamina kami anungileko, oho ambilenga niho atikitilezo ha matapa abili a mamanya na kuwapanika kukwami.”

Bantu bali na bowa

²³ “Oho lipili nimwalyo lya bangilenga na mundilo, mwayuvwile lizu mu mincimpwe, bakakutwaminina benu na babilolo ba mishobo yenu bezile ku kwami,

²⁴ pe wambile ngayi, ‘Nyambi ya Ngula, Nyambi yetu, wamoneshele wunene na wuwahe wendi oho twamuyuvwile hamba mu mundilo, haya lelo tunamono ngayi kati shinengi shashiboto ku muntu kwinga yoye, hinge ndi Nyambi unamba kukwendi.

²⁵ Haya shumangani tukufwila kami? Uya mundilo wakutinisha ukatulobesha. Mwa shikuma tukafwa, ndi tukuyuvwa Nyambi ya Ngula, Nyambi yetu, hamba kami.

²⁶ Kati kwekalile muntu yani uya wayuvwile Nyambi wakuyoya hamba mu mundilo, pe ha kutwalililaho kuyoya ndi?

²⁷ Obe Moshesha, boka na kuyuvwilila ku byuma nimwabyo biya akwamba Nyambi ya Ngula, Nyambi yetu, noho wize na kututongweza ebye akwamba kukwobe, pe tukayuvwilila na kwombatala.’

²⁸ “Oho Nyambi ya Ngula ayuvwile eshe, wambile kukwami ngayi, ‘Ami nayuvwu ebye banamba aba bantu kami banawahishi.

²⁹ Ndi ba kuliyuvwa nehe tuhu shikati nimwasho, ndi ba kundemeeka shikati nimwasho na kwombatala ndayano zami nimwazo, pe byuma nimwabyo bikenda shiwahe kukwabo naku bazukulyabo mwaya myaka.

³⁰ Yanga na kubatongweza baboke ku zintanda zabo.

³¹ Ngoboni, obe Moshesha, yikala kuno hamo na nami pe nika kupanika mazu, ndayano na kufundiziza nimwako. Uzilongeshe ku bantu ngayi bakazombatale mu litunga liya nili na kubapana.’

³² “Enu bantu ba Ishalela limukenu ngayi mukatenda byuma nimwabyo biya anamilaya Nyambi ya Ngula, Nyambi yenu. Hinga mulimbululako bimo kunebye amilayile.

³³ Ombatalenuzo nimwazo ngayi byuma nimwabyo bikende shiwahe kukwenu, kami mukehala kuzika mu litunga liya muli na kuya na kulikoma.”