Ndayano 4 - Libuka Lya Kuyela

Moshesha ukukandikiza Baishalela ngayi bombatale

¹ Niho Moshesha ambile ku bantu ngayi, “Ombatalenu mazu a Nyambi nimwawo awa nili na kumi longesha pe mukayoya, kami mukatambula litunga elye ali na kumipana Nyambi ya Ngula, Nyambi wa bankakazenu Baishalela.

² Hinga muyakilako ku mazu nikumilaya, hinge kufumishako shuma shimo. Ombatalenu ndayano za Nyambi ya Ngula, Nyambi yenu, ziya namipanine.

³ Enu bamwine mwamonene ebye atendele Nyambi ya Ngula ku lipili lya Peyola. Walobesheleleko bantu nimwabo aba balemeshelenga Mbaalu waku Peyola,

⁴ ngoboni enu mwengile bakulunga kuli Nyambi ya Ngula, Nyambi yenu, mushili kuyoya naku lelo.

⁵ “Monenu namilongeshele ndayano na kufundiziza kwa Nyambi nimwako, ngonehe Nyambi ya Ngula, Nyambi yami antongwezele ngayi nitende. Ombatalenuzo mu litunga liya mukuya na kutambula.

⁶ Lamenuzo na kuzikonkezeka, eshe nisho shikamonesha ngana zenu na kukeya kwenu ku bantu ba mikoka yashenge. Oho bakayuvwa ndayano za Nyambi nimwazo bakamba ngayi, ‘Ou mukoka wawunene, kami wakukeya na kanangatima.’

⁷ “Litunga ngani liliko lyalinene lili na banyambi hahepi, ngonehe Nyambi ya Ngula, Nyambi yetu ali hahepi nanetu, oho akumbulanga malombelo wetu?

⁸ Litunga ngani lilikolyalinene lili na ndayano na kufundiziza kwa kupwisha ngonehe mulao ou namilongeshe lelo?

⁹ Lilamenu oho mushili kuyoya ngayi mubule kuvulama ebye munamono na meho wenu. Kongenuzo mu mitima yenu matena akuyoya kwenu, ngayi mukatongweze na bana benu na bazukulyenu.

¹⁰ Anukenu mutena uyo mwemanine ku meho a Nyambi ya Ngula, Nyambi yenu, ku lipili lya Shinayi, oho ambilenga kukwami ngayi, ‘Kungula bantu ngayi bayuvwe ebye nikwamba, mwanga balilongeshe kunyombatala aha bashili kuyoya kami ngayi mwanga balongeshe bana babo sha kuntina.’

¹¹ “Niho mwezile kwakwipi na kwimana ku nceto ya lipili, elye lyalashekele mundilo wakukuma naku likumbi lyafwikiwile na kufwizima kwa wishe wa kushipa muyilu.

¹² Niho Nyambi ya Ngula ambile kukwenu mu mundilo, mwamuyuvwile hamba, ngoboni kumumona mushifwekesha shendi mufwako, ndele tuhu lizu.

¹³ Wamitongwezele ebye mu ku fwanina kutenda ngayi mulame kulimama okwe alimamine nanenu. Pe mu ku fwanina kwombatala ndayano likumi, eze atikitile ha matapa abili a mamanya.

¹⁴ Nyambi ya Ngula wandayile ngayi nimilongeshe ndayano na kufundiziza nimwako kuya mukwombatala mu litunga liyo mu kuya na kutambula.

Kushuza kwa kukanisha kulemesha tunankishi

¹⁵ “Oho Nyambi ya Ngula ambile kukwenu mu mundilo ku lipili lya Shinayi, kaliha mwamonene shifwekesha shendi. Haya ndi mukushinga kwikala shiwahe, munafwanini kulilama ngayi

¹⁶ mubule wubi wakulitendela kanankishi kakubaza mu shifwekesha sha mulume hinge sha mbuyama,

¹⁷ hinge sha kayamana hinge sha kayoni,

¹⁸ hinge sha kukalaba hinge sha nyinci.

¹⁹ Hinga mwezekiwa kulemesha hinge kutendela milimo ebye mu ku mona mu mbimbayilu, mutena hinge ngonda, hinge nyenye. Ebye, Nyambi ya Ngula, Nyambi yenu, unabipaniki ku bantu nimwabo hano hanci.

²⁰ Ngoboni enu, muli bantu aba alamwinine ku Engepita, kuyo mwekalile ngo muli mu ngaanze ya kulasheka. Wamifumishileko mu kumingisha bantu bendi, ngonehe eshe mwengakale lelo.

²¹ Nyambi ya Ngula, Nyambi yetu, wampilaminine ndaba yanenu, kami wabezele mbeza na kwamba ngayi kukazabuka mushinzi wa Yondana na kwingina mu litunga lya wilo elye ali na kumipana nifwako.

²² Nikufwila mu litunga lino, kukazabuka mushinzi nifwako, ngoboni enu wuluno muye na kuzabuka na kutambula liya litunga lya wilo.

²³ Monenu ngayi, hinga muvulama kulimama kuya Nyambi ya Ngula, Nyambi yenu alimamine nanenu. Hinga mu litendela enu bamwine kanankishi, hinge ka mushobo ngani.

²⁴ Ndaba Nyambi ya Ngula, Nyambi yenu, wenga mulangi wa mundilo wakulasheka, niye wenga Nyambi walihungu.

²⁵ “Hinge ndi oho mwekalakale mu litunga shikati shashitali na kubeleka bana na bazukulu, hinga mutenda wubi wakulitendela kanankishi, hinge kashifwekesha ngani. Ou unengi wubi ku meho a Nyambi ya Ngula, pe mukamupilamisha.

²⁶ Nikwihana liyilu na hanci mukwinga paki kukwenu lelo, ndi mu kubula kunyombatala mukazimina mu litunga. Kukehala mu litunga lya mu nciza ya Yondana liyo muli na kuya mu kutambula mufwako. Mukalobeshiwa nimwenu kulungu.

²⁷ Nyambi ya Ngula ukamipanzanishila mukati ka mishobo yamina, ndele tuhu babashe mukati kenu bakashalaho.

²⁸ Kuyo niko mukalemeshela banyambi ba kutendiwa na maboko a wuntu, banyambi ba shitondo na limanya, banyambi baya bakubula kutwesha ku mona, hinge kuyuvwa, hinge kulya, hinge kuyuvwa livumba.

²⁹ Kuyo niko mukashengezelela Nyambi ya Ngula, Nyambi yenu, kami ndi mukamufwatula na mitima yenu nimwayo mukamuwana.

³⁰ Oho muli mu makalikiza, pe byuma nimwabyo ebye hibikuholoka kukwenu ha kukotoka, mukatengulukile kuli Nyambi ya Ngula na kumwombatala,

³¹ ndaba Nyambi ya Ngula, Nyambi yenu wenga Nyambi wa shishemo shikuma. Kukamishiya hinge kumilobesha wufwako, kami kukavulama kulimama kuya alibezele niyemwine na bankakazenu wufwako.

³² “Shingishishenu bya kushikale ha shikati oho shilolo muhemuwe, kubalika kunyima ku shikati shiya Nyambi alengele muntu hano hanci. Shingishishenu bya hanci nimwaho. Kati kwekalile shuma shamina shakwinga ngo eshe shamonekele ku mwaka ndi? Kati kwekalile muntu ku mwaka wayuvwile shuma sha kufweka ngonehe eshe ndi?

³³ Kati kwekalile bantu ku mwaka bayuvwile Nyambi hambila mu mundilo, baya bashili kuyoya, ngonehe enu munamuyuvu ndi?

³⁴ Hinge ndi kuli nyambi ngani wakancile kuya na kufumisha bantu ku mukoka wamina na kubengisha bantu bendi, ngonehe amitendela Nyambi ya Ngula mu Engepita? Ku meho wenu bene watendeshele na ngovu na nyala zendi zazinene, kami waletele malwa na nzita, pe watendele malele na bikomokesho, kami watendeshele byuma bya kutinisha ngayi bimoneke.

³⁵ Nyambi ya Ngula unamimoneshe ebye, mwanga mulimuke ngayi niye tuhu ninkayendi, niye Nyambi, kami kowa wamina.

³⁶ Wetabilishile ngayi mwanga muyuvwe lizu lyendi muyilu, ngayi atweshe kumifundiziza. Kami hano hanci wetabilile ngayi mumone mundilo, pe wambile kukwenu mumwawo.

³⁷ Ndaba wahakile bankakazenu, wamihatile niho amifumishile niyemwine mu Engepita na ngovu zendi zazinene.

³⁸ Oho mwayilenga na kulikaka watandile mikoka yayinene ya ngovu za kumipitakana, ngayi atweshe kumi letamo na kumipanika litunga lyabo, litunga elye lishili kwinga likona lyenu na lelo.

³⁹ Mutena walelo hinga muvulama, limukenu ngayi, Nyambi ya Ngula nengi Nyambi wa muyilu na hanci. Kowa kami wamina.

⁴⁰ Ombatalenu ndayano zendi nimwazo eze namitongweze lelo, noho haya nimwabyo bikenda shiwahe kukwenu naku bazukulyenu. Mukazamina kuzika mu litunga liyo akumipanika Nyambi ya Ngula, Nyambi yenu, kwinga lyenu mwaya myaka.”

Minzi ya kwitukila yaku mushamuko wa Yondana

⁴¹ Niho Moshesha abengwile minzi yihatu ku mushamuko wa mushinzi wa Yondana,

⁴² oku muntu akutwesha kupanzila na kuyoyela, ndi unapununu minendi na mapuza ou wakubula nzimbo nendi. Ukutwesha kupanzila ku munzi umo waku minzi eye, pe wufwako kuzihiwa.

⁴³ Munzi wa Mbezela, mu litunga lya libelelengwa, wengile munzi wa mushobo wa Lubena, Lamoti mu litunga lya Ngiliyande, wengile wa mushobo wa Ngandi, munzi wa Ngolani mu litunga lya Mbashani wengile wa mushobo wa Manashe.

Kutontolola kwampanino ya Mulao wa Nyambi

⁴⁴ Moshesha wapanine mulao wa Nyambi ku bantu ba Ishalela.

⁴⁵ Owe niwo wupaki na ndayano na kufundiziza kuya Moshesha ambile ku bana ba Ishalela, oho bafuminenga ku Engepita,

⁴⁶ mu mukulo ku mushamuko wa mushinzi wa Yondana, wakuliyahikiza na munzi wa Mbeti Peyola, mu litunga lya mwene Shihoni wa Baamoli, ou walelele mu lukena lwa Heshimboni. Moshesha na bantu ba Ishalela bamukomene.

⁴⁷ Batambwile litunga lyendi na litunga lya mwene Ongi waku Mbashani, wengile mwene wamina wa Baamoli wazikile ku mushamuko wa Yondana.

⁴⁸ Litunga elye lyabalikilile ku munzi wa Aloya kukuma na kunkumo ya mushinzi wa Anoni, kutwala naku ncelele kukakuma na ku lipili lya Shiyoni liyo nilyo lipili lya Helimoni.

⁴⁹ Nilyo lyafungilile hamo Alamba na matunga nimwawo aku mushamuko wa mushinzi wa Yondana, kukakuma naku mabukubuku ku Liwate lya Mushele naku mushamuko ku nceto ya lipili lya Pishinga.