Ndayano 34 - Libuka Lya Kuyela

Lufu lwa Moshesha

¹ Moshesha wafumine ku zimbuwa za Mowambi na kukandama ku Lipili lya Nembo, ha Mutwe wa Lipili lya Pishinga ku mushamuko wa Yeliko. Pe kuyo niko amumoneshele litunga nimwalyo Nyambi ya Ngula, litunga lya Ngiliyande kutwala naku ncelele kukakuma ku munzi wa Ndani,

² na litunga nimwalyo lya Nafwitali na matunga a Efulemu na Manashe na litunga lya Yunda kutwala naku mponci ya Liwate,

³ ku Nengembu a Yunda na mbuwa yiya yikubalika ku Zowa kukuma ku Yeliko, lukena lwa mitondo ya minkomona.

⁴ Niho Nyambi ya Ngula ambile kuli Moshesha ngayi, “Elye nilyo litunga liya nalibezele kuli Abulahama na Ishaki na Yakobo ngayi nikalipanika ku bazukulyabo. Netabili tuhu ngayi ulimone, ngoboni kuketabila ngayi ukakumemo nifwako.”

⁵ Nohobene Moshesha mukamulimo wa Nyambi ya Ngula, wafwililile kuyo ku litunga lya Mowambi, ngonehe ambile Nyambi ya Ngula.

⁶ Nyambi ya Ngula wamufundile mu mukulo wa Mowambi, waliyahikiza na munzi wa Mbeti Peyola, ngoboni kowa muntu walimuka shiwahe mbalila ya naha afundiwa kuleta naku mutena walelo.

⁷ Moshesha wekalile na myaka 120 oho afwile, wengile wakushuma shikati nimwasho na meho wendi hi amona shiwahe.

⁸ Bantu ba Ishalela bamulilile kukuma ku matena makumi ahatu mu zimbuwa za Mowambi. Niho matena a zintande za kulila Moshesha amanine.

⁹ Yoshuwa mwana Nune wenzalile na ngana za moyo wa Nyambi ndaba Moshesha wakambikile maboko hahendi. Nohobene bantu ba Ishalela bombatalile Yoshuwa na kulama mazu a Nyambi ya Ngula apanikile kukwabo kupitila muli Moshesha.

¹⁰ Hinga kwatanga kwikala kami muluwe mu Ishalela wakufweka Moshesha, uya ambile Nyambi ya Ngula ku lupala na lupala.

¹¹ Kami shilolo kwikale muluwe wamina watendele malele na bikomokesho bya kufweka ngonehe Nyambi ya Ngula atumine Moshesha mu kubitenda, kulwisha mwene Fwalo na babilolo bendi na litunga nimwalyo lya Engepita.

¹² Kwabulile muluwe wamina watweshele kutenda byuma byabinene bya kutinisha biya atendele Moshesha ku meho a Ishalela nimwabo.