Ndayano 33 - Libuka Lya Kuyela

Moshesha ukufuywela mukoka wa Ishalela

¹ Eze nizo mfuywezi ziya Moshesha, muntu wa Nyambi, atoyelele bana ba Ishalela, oho shilolo afwe.

² Nyambi ya Ngula wafumine ku lipili lya Shinayi, watutikile ngo mutena ha Sheya, niho ashashumukilile ha bantu bendi ha lipili lya Palani. Wezile na mangeloyi makulukazi likumi, na mulangi wakulasheka ku liboko lyendi lya shilyo.

³ Nyambi ya Ngula uku haka bantu bendi, kami ukulama baya banengi bendi, Nohobene tukushungumana ku mawulu wendi, na kwombatala ndayano zendi.

⁴ Tukwombatala ndayano ziya atupanikile Moshesha, zenga wuheti wawunene wakongiwa ku shikungulukilo sha Yakobo.

⁵ Nyambi ya Ngula wengile mwene wa bantu ba Yeshulani, oho bakulwane ba bantu bakungulukile hamo, na mishobo nimwayo ya Ishalela yaliwanine.

⁶ “Mwanga mushobo wa Lubena ukabule kuloba, hinge ndi bantu bendi benga babashe.”

⁷ Bya ha mushobo wa Yunda wambile ngayi, “Obe Nyambi ya Ngula yuvwilila kulila kwabo kwakushinga kubayavwa, ubawanike kami na mishobo yamina. Obe nyambi ya Ngula, balwileko, na kubayavwa ku bamalamo babo.”

⁸ Bya ha mushobo wa Levi wambile ngayi, “Obe Nyambi ya Ngula, holola sha mutima wobe, ha Ulimu na Tumimi, muli bakamilimo bobe Balevi bakulunga. Wabezekele ku Masha, pe wabatoshele ngayi bakulunga ku mema a Melimba.

⁹ Wambile ha bya tatiyendi na mandiyendi, nifwako kubalumikila na kubula kwanuka bawushinda wendi, hinge bana bendi. Bombatalile mazu obe, kami bengile bakulunga ku kulimama kwobe.

¹⁰ Yakobo bakalongesha mazu obe, hamo na Ishalela ndayano wobe. Bakatupula incence kukwobe, bakakombelela zinkombela za kuhokesha zanzimba ha kaala kobe.

¹¹ Obe Nyambi ya Ngula, fwuywela byuma byabo wahilila na milimo ya maboko abo. Bamalamo babo nimwabo mwanga ubacancole, hinga ubaleha ngayi mwanga bakekaleko kami.”

¹² Bya ha mushobo wa Mbenjamani wambile ngayi, “Nyambi ya Ngula wahaka owe mushobo na ku wu lama, ukubalama mwapita mutena nimwawo, pe ukwikalilila mukati kabo.”

¹³ Bya ha mushobo wa Yoshefwa wambile ngayi, “Nyambi ya Ngula mwanga afuywele litunga lyabo, na bishemo bya kuhatiwa bya mvula, kami hamo na mema aku nceto ya limvu.

¹⁴ Mwanga litunga lyabo litandale na mikabo ya kuhoka na mutena, lihete na mikabo yayiwahe yaha shikati na shikati nimwasho.

¹⁵ Kami mapili a bashikale mwanga atantamane na mikabo yayiwahe shikuma, Kami byuma byabingibingi byabiwahe bya ku twina twamuyililila.

¹⁶ Litunga lyabo mwanga linzale na biya byabiwahe, balifuywele na byabiwahe bya Nyambi ya Ngula, ou wambile mu lipukumuna lya kubanga mundilo. Mwanga eze mfuywezi zize ku mushobo wa Yoshefwa, ndaba wengile mwana mwene mukati ka bayayizendi.

¹⁷ Uli na wuwahe ngonehe nyala za nkunzi wendi, mashengo wayo a nkunzi ya ngombe wa lishaka, anengi makulukazi a Efulemu, na likumi lya makulukazi lya Manashe. Na neze ncengo ukayahishazo bantu, kubanyakwila kunkumo ya hano hanci.”

¹⁸ Bya ha mishobo ya Zembuloni wambile ngayi, “Tangalala, obe Zembuloni, na nobe Ishaka oho mwakuya, mu zintanda.

¹⁹ Bakehanina bantu ku mapili wabo, kuya bakapana zinkombela za ku fwanina. Batambulanga wuheti wabo ku liwate, naku lihekelela lya ku shibumbo.”

²⁰ Bya ha mushobo wa Ngandi wambile ngayi, “Kuyemeziwe Nyambi, ou unaneneheshe litunga lya Ngandi! Ngandi ukubelamina ngonehe shimbwi, kutabula mukoko hinge shikonde sha ku mutwe.

²¹ Balishimbilileko litunga lyaliwahe nibo bamwine. Bapanikiwile shitapilo sha wukulwane wa wuntwamina. Bombatalile ndayano za Nyambi ya Ngula na mazu wendi, oho bakakutwaminina ba Ishalela bakungulukile hamo.”

²² Bya ha mushobo wa Ndani wambile ngayi, “Ndani unengi mwana shimbwi, uya ukukiluka kufuma mu Mbashani.”

²³ Bya ha mushobo wa Nafwitali wambile ngayi, “Nafwitali natambulu mfuywezi shikuma za kumuyakako Nyambi ya Ngula, litunga lyabo lya balikila ku Mponci lya kuma naku mabukubuku.”

²⁴ Bya ha mushobo wa Asha wambile ngayi, “Asha wenga wa mfuywezi shikuma kupitakana mishobo yamina. Mwanga enge wakuyamiziziwa ku bawushinda wendi. Litunga lyendi mazi a olive akenge akuyitayita.

²⁵ Mwanga minzi yendi yikalamiwe na mapangati a byondo, kami akekalenga shiwahe shikati nimwasho.”

²⁶ Kowa nyambi wakufweka ngonehe Nyambi yenu, enu bantu ba Yeshulani, ou ukwenda mu mbimbayilu. Ukukunkuluka na kupita mu makumbi kwiza mu kumiyavwa.

²⁷ Nyambi wa mwaya myaka unengi mwanya wenu wakwikala, ukumibumbatila na maboko wendi mwaya myaka. Watandile bamalamo benu oho mwayilenga na kulikaka, kami wamitongwezele kubalobesha nimwabo.

²⁸ Nohobene Baishalela bekale mu ku mwena, bekale shiwahe mu litunga, mwavulila mbuto na waine, kuyo mume wamu mbimbayilu wazabishanga hanci.

²⁹ Uli na mfuywezi, obe Ishalela, kowa muntu wakufweka nehe obe, obe mukoka wakupulwishiwa kuli Nyambi ya Ngula. Nyambi ya Ngula niyemwine nengi likebo lyobe, na mukwale wobe, kukulwila na kukupanika kukoma. Bamalamo bobe bakeza na kunyepa nceshe, kami muka balyatangila hanci.