Ndayano 32 - Libuka Lya Kuyela

¹ Yuvwililenu enu mayilu, kunebye nikwamba, na kaye kayuvwe mazu a mukanwa kami.

² Bilongesha byami biloke ngonehe mvula, mazu wami akuloka ngo mbundu, ngonehe mvula ha mwila wamulombelela, kami ngonehe mamata ha bya kumena.

³ Nikatumbalalisha lizina lya Nyambi ya Ngula, bantu bendi bakamba bya wunene wendi.

⁴ “Nyambi ya Ngula unengi limanya, mulimo wendi unengi wakwoloka, nengi wakulunga na kupwisha mu zinzila zendi nimwazo. Nyambi yenu unengi wakwoloka na kubula mulandu, zintendelo zendi za kupwisha na kwoloka.

⁵ Ngoboni enu muli bakubula kulunga, na kubula ku fwanina kwinga bana bendi, enu mukoka wawubi.

⁶ Kati nisho munafwanini kutenda kuli Nyambi ya Ngula, enu bakuyeba, bantu bakubula ngana? Kati kaliha nengi Tatiyenu, Shakalenga wenu, uya wamilengele na kumiyaka hano hanci?”

⁷ “Anukenu matena akunyima, hanganikenu myaka ya bihemwinino binapiti. Yipulenu bahemi benu ngayi mwanga bamitongweze byatendiwile, yipulenu bakulwane bamitongweze.

⁸ Oho Wakukangana apanikile likona ku bantu, niho atapile bantu nimwabo mu matunga. Niho abayakilile zinginza, kwezekesha na palo ya bana ba Ishalela.

⁹ Ngoboni Nyambi ya Ngula walihatililile bana ba Yakobo kwinga likona lyendi.”

¹⁰ “Wabawanine hibayebangila mu libelelengwa, mwaninkayabo, babulile bihanganiko mu libelelengwa. Waba kulizile na kubalama, ngonehe alilamanga niyemwine.

¹¹ Ngonehe ngonga ukulama bana bendi shiwahe, ukutandubula shiwahe mbando zabo, ukubakatula shiwahe ku mbando, Nyambi ya Ngula nisho alamine Baishalela.

¹² Nyambi ya Ngula ninkayendi watwamininine bantu bendi, kwakubula kumuyavwa banyambi bashenge.

¹³ Ukabengisha batulela matunga a hayilu, bakalya bya kumena mu mafuba. Bakalya wushi wa mu mamanya, na mazi a olive ku mitondo yikutemuna mu mamanya.

¹⁴ Balile lukaki na mahwe aku zingombe babo na bampongo, na mazi aku zingombe na bambelele, bekalile na bambelele babawahe ba ku Mbashani na bampongo na zingombe, loto lwa lu wahe na waine.”

¹⁵ “Yeshulani bahetele shikuma pe bahandwile Nyambi ya Ngula, bashuwile na byakulya bya shimbombo. Bafutaminine Nyambi uya wabalengele, na kukana Limanya lya kupulukila kwabo.”

¹⁶ Bayuvwishile Nyambi ya Ngula lihungu na tunankishi twabo, wapilamine ndaba ya wubi wabo.

¹⁷ Bakombelelele ku mayimbwe, kaliha kuli Nyambi, ku banyambi baya babulile kulimuka, banyambi bashenge bawuluno, banyambi baya babulile kutina batatizenu.

¹⁸ Bavulamine Nyambi yabo, Limanya lya balelele, ou unengi mukakubapanika wumi.

¹⁹ “Oho Nyambi ya Ngula amonene eshe, wapilamine niho akanine bantu bendi.

²⁰ Wambile ngayi, ‘Nikaholeka lupala lwami kukwabo, tukamona ndi shumangani shikatendiwa kukwabo. Bantu babakalu mitima na kubula kwoloka.

²¹ Napilama ndaba ya tunankishi twabo, nili na lihungu ndaba ya banyambi babo. Kami nikaliyavwisha litunga lya bantu bakubula ngana, mwanga bakapilamishe bantu bami.

²² Wukali wami ukabanga ngo mundilo, na kuhokesha byuma nimwabyo hano hanci. Ukakuma na mu nceto ya kaye, na kuyoha mipishi ya mapili.

²³ Nikaleta wukalu wakubula kumana hahabo, nikamiyaha ngonehe mivwi.

²⁴ Bakafwa ku nzala, bakafwa ku ntukumina ya kuhokesha, na kufwa ku malweli amakalu. Nikabatumina batunzama na kubalwisha, na mayoka a wuhungu akabahuma.

²⁵ Nzita yikaleta lufu mu mikwakwa, mutentu ukabezilila ha minkanda yabo. Bandumbana na bakazana bakafwa, kowa ukashalaho kubalika bambututu kutwala ku bankembele.

²⁶ Nambile ngayi, nikabalobesha nimwabo, ngayi kukabule wakubanuka kami.

²⁷ Ngoboni kwitabilisha bakankole babo kutina baliyemeze ngayi, Tunakomo Baishalela na nyala zetu, kaliha na ngovu za Nyambi ya Ngula.’ ”

²⁸ “Baishalela banengi litunga lya kubula bihanganiko, bafwazo ngana nihani.

²⁹ Shinga ngayi bengile ba kukeya, shinga bayuvwishishile eshe, na kulehasho ha ku mona osho akekala.

³⁰ Bishini bantu likulukazi abakomene muntu umo, kami bantu makulukazi likumi hiba kutina bantu babili? Ndaba Nyambi ya Ngula Limanya lyabo unabashiyi, unabapaniki mu maboko wabo.

³¹ Bakankole babo hibalimuka ngayi banyambi babo ba kupopa, kulyezeka na Limanya lya Ishalela bafwako.

³² Bakankole babo banengi ngonehe Shondoma na Ngomola, milimo yabo yinengi ngo mikabo ya shinyanca yayilulu na mahozozo a wuhungu,

³³ waine yabo yinengi wuhungu wa mayoka, wuhungu wakuziha ngonehe wa mpili.”

³⁴ “Eshe banatende bakankole babo, Nyambi ya Ngula ukutatilila shikati sha kubashushula.

³⁵ Nyambi ya Ngula uka bweshela milandu na kubashushula, shikati sha kuwa kwabo shikeza, mutena wa ku loba kwabo uli hahepi.”

³⁶ Nyambi ya Ngula ukapulwisha bantu bendi, oho akamona ngayi ngovu zabo zinamana. Ukayuvwila nceshe baya baka kumutendela milimo, oho akamona ngayi namaninakale ngovu.

³⁷ Niho Nyambi ya Ngula akayipula bantu ngayi, “Balikuti banyambi babo, limanya muya batininine mu kuholama?

³⁸ Mwabalishile mazi a zinkombela zenu, kami mwabapanikile waine ngayi banwe. Haya beze bamiyavwe tumone, haya beze bamipulwishe.”

³⁹ Ami tuhu, Ami ninkayami Nili Nyambi, kowa nyambi wamina kumbalila yami. Nazihanga na kuyoyesha, nalemekanga na kupolesha, kami kowa muntu ukutwesha kubafumisha mu liboko lyami.

⁴⁰ Nohobene nikakatula liboko lyami kuyilu, na kulibeza ngayi, Mwa shikuma ngonehe nenga Nyambi wakuyoya,

⁴¹ nika kumba mukwale wami wakubesha, liboko lyami likawukwata na kuyata. Nikabweshela wubi ku wubi ha bamalamo bami, na kushushula baya ba kunzimba.

⁴² Mivwi yami yikalambakana na mukeza wabo, kami mukwale wami ukaziha nimwabo baya ba kunkanangana. Kowa muntu nika lehelela kubaya ba kundwisha, hinge bakakulemana na ba ku mangiwa mu nzita bakafwa.

⁴³ “Enu liyilu yemezenu Nyambi ya Ngula, enu banyambi yemezenu Nyambi ya Ngula, ukushushula nimwabo baya ba kubaziha. Ukubweshela wubi ku wubi ha bamalamo bendi, kami ukuyatila wubi wa bantu bendi, na kuyelesha litunga lya bantu bendi.”

⁴⁴ Moshesha na Yoshuwa mwana Nune bambile lwimbo olwe ku bantu ba Ishalela hibabayuvwilila.

Kufundiziza kwa Moshesha kwamamaninino

⁴⁵ Oho Moshesha amanishile kwamba awa mazu a Nyambi ku Baishalela,

⁴⁶ wambile ngayi, “Lamenu shiwahe awa mazu nimwawo namipaniki lelo. Pitulukenumo ku bana benu ngayi mwanga bombatale na kutenda nimwabyo byatikitiwa mu Libuka lya ndayano.

⁴⁷ Ndayano eze kaliha zinengi zowa kukwenu, ngoboni zinengi wumi wenu. Ombatalenuzo pe mukayoya myaka yayingi mu litunga liyo lya mu nciza ya Yondana, liya muli na kushinga kutambula.”

⁴⁸ Ha mutena bene uyo Nyambi ya Ngula wambile kuli Moshesha ngayi,

⁴⁹ “Kandama ha lipili lya Ambalimu na lipili lya Nembo aya ali mu litunga lya Mowambi, aliyahikiza na munzi wa Yeliko, utilamine litunga lya Kenaani liya ninakupanika ku bantu ba Ishalela.

⁵⁰ Ukafwila ha lipili unakandama ngonehe yayiyobe Aloni wafwililile ha lipili lya Hola, pe ukaliwana hamo na bankakazabo.

⁵¹ Ndaba wubili wenu mwabulile shikulupisho kukwami mukati ka bantu ba Ishalela, oho mwekalile ku mema aku Melimba, kwakwipi na munzi wa Zini, ndaba mwabulile kunkulupila na kubula kulimukisha kuyela kwami ku meho a bantu ba Ishalela.

⁵² Ukalipenzela hahatali, ngoboni kukengina mu liya litunga nili na kupanika bantu ba Ishalela wufwako.”