Ndayano 31 - Libuka Lya Kuyela

Yoshuwa ukushwana Moshesha

¹ Moshesha wambilenga ku bantu ba Ishalela,

² watwalileho ngayi, “Ami haya nili na myaka ya 120 kami kutwesha kwinga mukakumitwaminina nifwako. Shinene Nyambi ya Ngula unantongweze ngayi, ‘Hinga ukazabuka Yondana.’

³ Nyambi ya Ngula, Nyambi yenu, ukaya kumbili yenu niye mwine na kulobesha matunga awa, ngayi mukatweshe kutambula likona lyabo, pe Yoshuwa ukenga mukakumitwaminina ngonehe ambile Nyambi ya Ngula.

⁴ Kami Nyambi ya Ngula ukalobesha aba bantu, ngonehe akomene Shihoni na Ongi, bamyene ba Baamoli na kulobesha litunga lyabo.

⁵ Nyambi ya Ngula ukamipanikabo ngayi mubakome, kami muka batende kwezekesha ngonehe namitongwezele.

⁶ Likwatishenu na ku shuma mitima. Hinga mubatina boha. Nyambi yenu niyemwine, Nyambi ya Ngula ukekala nanenu. Kukamikwanga hinge kumishiya wufwako.”

⁷ Moshesha wehanine Yoshuwa, pe wambile kukwendi ku meho a bantu ba Ishalela nimwabo ngayi, “Likwatishe na ku shuma mutima. Obe uli muntu ou ukatwaminina bantu aba ngayi batambule litunga liya alibezele Nyambi ya Ngula ku bankakazabo kubapanalyo.

⁸ Nyambi ya Ngula niyemwine ukakutwaminina na kwikala hamo na nobe, kukakushiya hinge kukufutamina afwako, nohobene hinga upopa hinge kutina.”

Ndayano zikalabiwanga oho kwapitakale myaka mutanu na yibili

⁹ Nohobene Moshesha watikitile ndayano za Nyambi na kuzipanika kuli bakankombela ba balevi, aba bashimbilenga Likwati lya Kulimama lya Nyambi ya Ngula na kubakakutwaminina Baishalela.

¹⁰ Moshesha wabalayile ngayi, “Ku mamaninino a myaka mutanu na yibili, oho kukeza mwaka wakulehela mikuli, mukalabe eshe na kubilika ku Shimbo sha Minkungwa.

¹¹ Labilalyo ku bantu ba Ishalela oho bakwiza mu kulemesha Nyambi ya Ngula, Nyambi yenu, ku mwanya umo uya akahata.

¹² Yihana balume na bambuyama na batwanuke nimwabo hamo na mapukwenda bekala mu minzi yenu, ngayi bantu nimwabo mwanga bayuvwezo na kulilongesha kulemeeka Nyambi ya Ngula, Nyambi yenu na kwombatala na kulama ndayano zendi.

¹³ Mu nzila eye bazukulyenu aba babulile kuyuvwa mazu a Nyambi ya Ngula, Nyambi yenu, bakawayuvwe. Pe haya, bakalilongesha kumwombatala shikati nimwasho bakazika ku litunga liya muli na kushinga kutambula mu nciza ya Yondana.”

Kufundiziza kwa Nyambi ya Ngula kwamamaninino kuli Moshesha

¹⁴ Niho Nyambi ya Ngula ambile kuli Moshesha ngayi, “Shikati shobe sha kufwa shili hahepi. Yihana Yoshuwa na kumuleta ku Ntanda ya shikungulukilo ngayi mwanga nimushwanishe.” Moshesha na Yoshuwa bayile na kulimonekesha mu Ntanda ya shikungulukilo,

¹⁵ niho Nyambi ya Ngula aliholwele kukwabo mukati ka likumbi lya ku shesha hanci liya lyemanine ku shipana sha Ntanda ya shikungulukilo.

¹⁶ Nyambi ya Ngula wambile kuli Moshesha ngayi, “Shikati shobe shilihahepi sha kuya mu kuliwana na bankakazobe, pe oho wafwakale bantu bakenga bakubula kwoloka kukwami na kubula kulama kulimama kuya nalimamine nabo. Bakamfutamina na kulemesha banyambi bowa ba bakalitunga elye bakwingina.

¹⁷ Haya wukali wakulasheka kwami ukabahokesha ha mutena uyo, nikabashiya na kuholeka lupala lwami kukwabo pe bakalobeshiwa. Malwa amanene amakalu akeza hahabo, pe haya bakalimuka ngayi byuma ebye binakumu kukwabo ndaba yanami Nyambi yabo, kaliha nishili hamo nabo.

¹⁸ Haya, nikaholeka lupala lwami, ndaba banabipishi ha kulemesha banyambi bashenge.

¹⁹ “Haya tikita olwe lwimbo na kululongesha bantu ba Ishalela ngayi lwinge wupaki kukwabo lwa kubalwisha.

²⁰ Nikabatwala mu litunga likukunkula mahwe na wushi, ngonehe nalibezele ku bankakazabo. Bakekala na byakulya nimwabyo ebye bakushinga, kami bakekala shiwahewahe. Ngoboni bakafutuka na kulemesha banyambi bashenge. Bakankenda na ku shandula kulimama kwami,

²¹ kami malwa amanene amakalu akeza hahabo. Ngoboni lwimbo olwe batwanuke ba kuluyimbilanga nilwo lukemanina kwinga ngonehe wupaki mu kubalwisha, ndaba nilwo lukekala na kwimbiliwa ku bazukulyabo. Hinge noho, oho shilolokale nibatwale mu litunga liya nalibezele kubapanikalyo, Nalimuku eshe bali na kuhanganika.”

²² Ha mutena bene uyo Moshesha watikitile lwimbo pe walulongeshele bantu ba Ishalela.

²³ Niho Nyambi ya Ngula atongwezele Yoshuwa mwana Nune wa mulume ngayi, “Likwatishe na ku shuma mutima. Ukatwaminina bantu ba Ishalela mu litunga liya nalibezele kubapanika, kami nikekala hamo nanobe.”

²⁴ Oho Moshesha amanishile kutikita ndayano za Nyambi mu libuka, kufuma kumabalikilo kutwala ku mamaninino,

²⁵ Moshesha watongwezele bakankombela ba balevi, aba bashimbilenga Likwati lya Kulimama kwa Nyambi ya Ngula ngayi,

²⁶ “Shimbenu libuka elye lya ndayano za Nyambi, mukaliyake kunkumo ya Likwati lya Kulimama kwa Nyambi ya Ngula, Nyambi yenu ngayi nilyo mwanga likekalenga kuyo kwinga paki mu kulwisha bantu bendi.

²⁷ Hinilimuka eshe bakaluha mitima na mafutufutu. Nibo bafutukililemo Nyambi ya Ngula ha shikati sha kuyoya kwami, kami bakamufutulukila munyima ya kufwa kwami.

²⁸ Kungula bakakutwaminina bobe ba mishobo nimwayo hamo na babilolo ku meho wami ngayi nitweshe kubatongweza byuma ebye, shinga liyilu na hanci byayuvwangako, shinga bikutwesha kwinga bapaki bami hahabo.

²⁹ Nikulimuka ngayi munyima ya kufwa kwami, bantu bakenga bakuluwa na kufuma kubilongesha ebye nabalongeshele. Kami ku shikati shikeza bakamona malwa, ndaba bakapilamisha Nyambi ya Ngula ha kutenda ebye akanishile.”

Lwimbo lwa Moshesha

³⁰ Moshesha watendele lwimbo, oho bantu nimwabo ba Ishalela hibamuyuvwilila.