Ndayano 30 - Libuka Lya Kuyela

Kubokela kuli Nyambi ya Ngula na mfuywezi

¹ “Ami Namipanakale haya kulihatila mukati ka mfuywezi na shikuto. Oho byuma ebye nimwabyo bikaholoka kukwenu, pe mukazika mukati ka matunga kuya anamipanzanishili Nyambi ya Ngula, Nyambi yenu, mukanuka kulihatila kuya namitoyelele.

² Ndi enu na bazukulyenu mukatengulukila kuli Nyambi ya Ngula na mitima yenu na myoyo yenu nimwayo, hi mukwombatala mazu wendi awa anakumipanika lelo.

³ Niho Nyambi ya Ngula, Nyambi yenu, ukekala na nceshe hahenu. Ukamibwesha na kumifumisha ku matunga oku amipanzanishilile, pe ukamitangamisha kami.

⁴ Hinge ndi mwapanzaninine kwakutali hano hanci, Nyambi ya Ngula, Nyambi yenu, ukamikungulula hamo na kumibwesha,

⁵ na kumi leta mu litunga muya mwekalile bankakazenu mwaka. Kami ukamitangamisha na kumivulisha shikuma kupitakana eshe bekalilenga bankakazenu.

⁶ Nyambi ya Ngula, Nyambi yenu ukatwala mitima yenu naya bazukulyenu ku mukanda na kumyombatalisha, ngayi mutweshe kumuhaka na mitima yenu nimwayo na myoyo yenu nimwayo, pe mukekala mu litunga liyo, ngayi mwanga mukayoye.

⁷ Nyambi ya Ngula ukayaka bikuto ebye nimwabyo kwinga bya kulwisha bamalamo benu, aba bamizimbile na kumiyandisha,

⁸ kami mukamwombatala na kulama mazu wendi nimwawo awa na kumipanika lelo.

⁹ Nyambi ya Ngula ukamitweshesha mu byuma nimwabyo biya mu kutenda. Enu mukekala na bana babengi na bimuna babengi, kami mafuba wenu akatutwisha byakulya byabingi. Nyambi ya Ngula ukawahilila ha kumitweshesha ngonehe shiya atwesheshele bankakazenu.

¹⁰ Ndi mukamwombatalanga Nyambi ya Ngula na kulama mazu wendi aya anatikitiwi mu libuka elye lya bilongesha byendi, pe mu ku fwanina kutengulukila kukwendi na mitima yenu nimwayo na myoyo yenu nimwayo.

¹¹ “Mazu awa nikumipanika lelo kaliha amakalu shikuma, kami kaliha muli kwakutali nawo.

¹² Niwo kaliha ali mumbimbayilu. Kukepula mufwako ngayi, ‘Kati yani ukaya muyilu na kutupatwilao hanci ngayi tutweshe ku yuvwao na kwombatala?’

¹³ Hinge ndi ali mu nciza ya liwate. Kukepula mufwako ngayi, ‘Kati yani ukazabukila mu nciza ya liwate na kutuletelao ngayi mwanga tuwayuvwe na kuombatala?’

¹⁴ Ngoboni Lizu lya Nyambi lili hahepi na nobe, lili mu kanwa kobe na mu mutima wobe. Himuwalimuka, mu kutwesha ku wa toyanga, haya ombatalenu.

¹⁵ “Lelo na kumipanika kulihatila mukati ka byabiwahe na byabibi, mukati ka wumi na lufu.

¹⁶ Ndi enu mukwombatala mazu a Nyambi ya Ngula, Nyambi yenu, awa nikumipana lelo, ndi mu kumuhaka, ombatalenu na kulama ndayano zendi nimwazo na kukonka mazu wendi nimwawo, niho mukatumpuka na kuvula kwinga litunga lya bantu babengi. Nyambi ya Ngula, Nyambi yenu, ukamifuywela mu litunga liya munakuya mukushinga kutambula.

¹⁷ Ngoboni ndi mu kulimbulula na kukana kuyuvwilila na ku shanuka kulemesha banyambi bashenge,

¹⁸ nikumishiwulula na kumitongweza kuno lelo ngayi mukalobeshiwa. Mukabula kwikala shikati mu litunga liyo lya mu nciza ya Yondana liya mukushinga kuya mu kutambula.

¹⁹ Haya nili na kupanika kulihatila lelo mukati ka wumi na lufu, mukati ka mfuywezi na shikuto, shinga liyilu na hanci byayuvwangako bikutwesha kuyuvwa kulihatila oku munatende. Nohobene hatenu wumi.

²⁰ Hakenu Nyambi ya Ngula, Nyambi yenu, mwombatalenu kami mwinge bakulunga kukwendi, ngayi enu na bazukulyenu mwikale shikati shashitali mu litunga liya alibezele kupanika bankakazenu, ba Abulahama na Ishaki na Yakobo.”