Ndayano 3 - Libuka Lya Kuyela

Baishalela ba kukoma mwene Ongi waku Mbashani

¹ “Niho twabokele na kuya ku ncelele ya litunga lya Mbashani pe mwene Ongi wezile na bantu bendi nimwabo mu kutulwisha ku munzi wa Endileyi.

² Ngoboni Nyambi ya Ngula wambile kukwami ngayi, ‘Hinga mumutina, ndaba ninamipanikiye mu maboko wenu, hamo na bantu bendi na litunga lyendi, ngayi mumutende ngonehe mwatendele Shihoni mwene wa Baamoli, ou wekalilenga mu Heshimboni.’

³ “Nohobene Nyambi ya Ngula wayakile mwene Ongi waku Mbashani na bantu bendi mu maboko wetu, niho twabazihile nimwabo.

⁴ Ha shikati bene shiyo twapukwile minzi yendi nimwayo, kowa hinge munzi umo ou twabulile kupukula. Minzi nimwayo twapukwile yengile makumi mutanu na umo yamu litunga nimwalyo lya Alangobu muyo alelelenga mwene Ongi, mu Mbashani.

⁵ Minzi nimwayo eye yazikiwile na twimbi twatutali na mapangati na tupatisho twa kupatisha mapangati, pe kwekalile kami minzi yayingi ya kubula twimbi.

⁶ Twalobeshele minzi nimwayo, twazihile balume na bakazi na batwanuke ngonehe twatendele ku minzi yiya yengile ya mwene Shihoni wamu Heshimboni.

⁷ Twashimbile bimuna na kupukula minzi.

⁸ “Nohobene ha shikati shiyo twatambwile litunga kufuma mu maboko a bamyene babili ba Baamoli, lya ku mushamuko wa mushinzi wa Yondana na kufuma ku mushinzi wa Anoni, kuleta na ku lipili lya Helimoni.

⁹ (Lipili lya Helimoni, Bashindoni ba kulitumba ngayi Shiliyoni. Baamoli balitoyanga ngayi Sheniya.)

¹⁰ Twatambwile litunga nimwalyo lya mwene Ongi waku Mbashani, zinkena zazikiwile ha limvu lya kukankama na litunga nimwalyo lya Ngiliyande na Mbashani, kukakuma naku mushamuko wa Shaleka na Endileyi.”

¹¹ (Mwene Ongi waku Mbashani wengile wakukumininako ku Balefwayima. Likwati, lya kumufunda nalyo lyengile lya kutenda ha wutale mamita anaa mu wutali na mamita abili muwipi. Ou wulili niko ushili mu munzi wa baamoni mu Lamba.)

Mishobo yiya yazikile ku mushamuko wa Yondana

¹² “Oho twatambwile litunga ha shikati shiyo napanine ku mishobo ya Lubena na Ngandi litunga lili ku ncelele ya munzi wa Aloya kwakwipi na mushinzi wa Anoni na mbalila ya litunga lya binkanda lya Ngiliyande hamo na minzi yalyo.

¹³ Ku shitika sha mushobo wa Manashe nabapanine litunga nimwalyo lyashalileko lya Ngiliyande nanelye lya Mbashani nimwalyo, liya alelelenga mwene Ongi, liya linengi litunga lya Alangobu bene.” (Mbashani nimwayo yalimukiwile kwinga litunga lya Balefwayima.

¹⁴ Yayila, waku mushobo wa Manashe watambwile litunga lya nzimba lya Alangobu, liya linengi Mbashani, kukakuma naku nginza ya Ngeshula na Maaka. Watumbile minzi kwezekesha na lizina lyendi niyemwine, Havotiyayila kuleta na shikati shino.)

¹⁵ “Napanine Ngiliyande kuli Makiya wa mushobo wa Manashe.

¹⁶ Kami ku mushobo wa Lubena na Ngandi napanine litunga lya kubalika ku Ngiliyande kukuma ku mushinzi wa Anoni. Mukati ka mushinzi nimo mwengile mu nginza yabo yaku mabukubuku na nginza yabo yaku ncelele wengile mushinzi wa Yamboki, eye niyo yengile nginza na Baamoni.

¹⁷ Ku mponci litunga lyabo lyakakumine naku mushinzi wa Yondana mu Alamba, nilyo linabalikili ku Liwate lya Ngalileya ku ncelele, kukuma naku Liwate lya Mushele ku mabukubuku, kukakuma na ku nceto ya lipili lya Pishinga ku mushamuko.

¹⁸ “Ha shikati shiyo namifundizizile nehe ngayi, ‘Nyambi ya Ngula, Nyambi yetu, unamipaniki ngayi mutambule litunga elye lya ku mushamuko wa Yondana. Haya panenu bilwisho ku bakanzita benu, mubatume bazabuke Yondana hambili ya mishobo yamina ya Ishalela.

¹⁹ Mukashiya tuhu bakazenu na bana benu na bimuna benu (nikulimuka ngayi muli na bimuna babengi) kuno ku minzi eye namipaniki.

²⁰ Yavwenu bawushindawenu Baishalela kutwala ha kutambula litunga liya akubapanika Nyambi ya Ngula ku mponci ya Yondana, kami ndele Nyambi ya Ngula unabekalishi shiwahe mu ku mwena, ngonehe anatende kukwenu. Nihoboni mukabokenga ku litunga liyo elye namipanine.

²¹ “Niho nambilile Yoshuwa ngayi, ‘Munamono nimwabyo biya Nyambi ya Ngula, Nyambi yenu, atendele kunaba bamyene babili, ba Shihoni na Ongi, kami ukatenda shuma shimo ku bamina nimwabo aba mukalwisha litunga lyabo.

²² Hinga mubatina ndaba Nyambi ya Ngula, Nyambi yenu ukamilwila.’”

Moshesha afwako kwitabilishiwa kwingina mu Kenaani

²³ “Ha shikati shiyo nalambilile shikuma ku shinga kuyamiziziwa ngayi,

²⁴ ‘Obe Nyambi ya Ngula, nikulimuka ngayi unamoneshe tuhu mabalikilo a byuma byabinene na liboko lyobe lya ngovu. Kowa nyambi wamina muyilu hinge hano hanci ou ukutwesha kutenda ebye unatende, obe Nyambi ya Ngula.

²⁵ Nyintabilishe obe Nyambi ya Ngula, nizabuke mushinzi wa Yondana na ku mona litunga lya wilo lili mu nciza muyo, linengi litunga lyaliwahe lya binkanda na Mapili a Lembanoni.’

²⁶ “Ngoboni Nyambi ya Ngula wampilaminine ndaba yanenu, pe wabulile kunyuvwilila. Wambile kukwami ngayi, ‘Kumina ha nosho unamba, hinga ubokela kami ku shamba kukwami.

²⁷ Yanga ha mutwe wa lipili lya Pishinga pe utilamine ku ncelele naku mabukubuku naku mushamuko naku mponci. Penzeshesha shiwahewahe ebye uku mona, kami kukazabukila mu nciza ya Yondana wufwako.

²⁸ Fundiziza Yoshuwa, mukwatishe na kumushumisha mutima, ndaba niye ukatwaminina bantu kubazabwisha mushinzi na kutambula litunga liya uku mona.’

²⁹ “Nohobene twekalile mu mukulo, kuliyahikiza na munzi wa Mbeti Peyola.”