Ndayano 29 - Libuka Lya Kuyela

Kulimama kwa Nyambi ya Ngula na Ishalela mu litunga lya Mowambi

¹ Awa anengi mazu a kulimama kuya Nyambi ya Ngula alayile Moshesha a kulimama hamo na bantu ba Ishalela mu litunga lya Mowambi. Okwe kwengile kuhangulula kukulimama kuya Nyambi ya Ngula alimamine nabo ku lipili lya Shinayi.

² Moshesha wehanine bantu ba Ishalela nimwabo hamo pe wambile kukwabo ngayi, “Mwamonene enu bamwine ebye Nyambi ya Ngula atendele kuli Fwalo mu litunga lya Engepita nakubabilolo bendi naku litunga lyendi nimwalyo.

³ Mwamonene malwa amanene na bimonekesho na bikomokesho byabinene biya Nyambi ya Ngula atendele.

⁴ Ngoboni kukuma na mutena walelo Nyambi ya Ngula kaliha unamipaniki ngana za ku yuvwishisha na meho akumoneshesha na matu akuyuvwa.

⁵ Ha myaka makumi anaa yiya namitwamininine mu libelelengwa, bivwalo byenu na ncangwa zenu byabulile kufwa.

⁶ Kaliha mwalile mankende, hinge kunwa waine hinge mukuku, mwanga mulimuke ngayi Nyambi ya Ngula unengi Nyambi yenu.

⁷ Kami oho twezile ku mwanya uno, mwene Shihoni waku Heshimboni na mwene Ongi waku Mbashani bezile mu kutulwisha. Ngoboni etu twabakomene,

⁸ niho twashimbile litunga lyabo na kulitapishila mukati ka mishobo ya Lubena na Ngandi naku shitika sha mushobo wa Manashe.

⁹ Ombatalenu na kulama mazu nimwawo a kulimama okwe ngayi mwanga mutangame mu byuma nimwabyo mu kutenda.

¹⁰ “Muli na kwimana nimwenu lelo ku meho a Nyambi ya Ngula, Nyambi yenu, hamo na bakulwane ba mishobo na bakakutwaminina benu na babilolo benu na balume ba Ishalela,

¹¹ na bambuyama na batwanuke na mapukwenda aba bekala mukati kenu na kumicabila nkuni na kumitekwila mema,

¹² ngayi mwanga mwingine mu kulimama kuno ali na kulimama Nyambi ya Ngula, Nyambi yenu hamo nanenu na kuliyuvwashana.

¹³ Nohobene ngayi Nyambi ya Ngula mwanga amitende kwinga bantu bendi, kami enge Nyambi yenu, ngonehe amikulupishile na kulibeza kuya atendele ku bankakazenu, ba Abulahama na Ishaki na Yakobo.

¹⁴ Kaliha enu tuhu ali na kulimama nenu Nyambi ya Ngula, hamo na kuliyuvwashana,

¹⁵ uli na kulimama nanetu nimwetu tunemana ku meho wendi lelo, pe kami hamo na bazukulyetu aba bashili kuhemuwa.

¹⁶ “Himwanuka eshe mwayoyelenga mu Engepita naneshe mwendelenga mukati ka matunga a mikoka yamina.

¹⁷ Mwamonene tunankishi twabo twa wunyengwe twa kubaza ha bitondo na ha mamanya na ha shiliva na ngolinde.

¹⁸ Monenu ngayi enu munemana kuno lelo, hinga kukekala mulume, hinge mbuyama, hinge ku lupashi, hinge mushobo wakufutamina Nyambi ya Ngula, Nyambi yetu na kulemesha banyambi ba mikoka yamina. Eshe shikwinga ngonehe ntombola yiya yikukula kwinga mupishi wawululu hamo na wuhungu.

¹⁹ Monenu ngayi hinga kwikala muntu umo kuno lelo, ou ukuyuvwa nkuwa ya kulibeza, pe ha kuwisha mutima niye mwine ngayi nimwabyo bikenda shiwahe kukwendi hinge ndi ukukaluhisha mutima na kwenda mu nzila yendi. Shiya shikalobesha nimwenumwenu babawahe naba bababi shuma shimo.

²⁰ Nyambi ya Ngula kukayatila muntu wa nehe wufwako, ngoboni wukali wawunene wa Nyambi ya Ngula ukalasheka hahendi, kami bikuto nimwabyo byatikitiwa mu libuka elye bikawila hahendi na kufumisha lizina lyendi mu nceto ya liyilu.

²¹ Nyambi ya Ngula ukatenda shihembwilizo hahendi ku mishobo nimwayo ya Ishalela, kami ukaleta makando hahendi na mikuto nimwayo yatoyiwa mu kulimama kuya kunatikitiwi mu libuka elye lya ndayano za Nyambi ya Ngula.

²² “Mu mikoka ya kumbili bazukulyenu na mapukwenda ba ku matunga ahahatali bakamona makalikiza aya analete Nyambi ya Ngula ha litunga lyenu. Namakolano awa Nyambi ya Ngula anayaka ha litunga.

²³ Mafuba akenga mapembe, akufwikiwa muhenga na mushele, kowa shuma sha kukunamo, kami hinge nyawe kukamenamo yifwako. Litunga lyenu likenga ngonehe zinkena za Shondoma na Ngomola za Andima na Zemboyima, ziya alobeshele Nyambi ya Ngula oho apilamine shikuma.

²⁴ Niho matunga nimwao akepula ngayi, ‘Shumangani kati Nyambi ya Ngula anatendele eshe mu litunga lyabo? Bishini ebye binamupilamishi?’

²⁵ Haya bantu bakakumbula nehe ngayi, ‘Shinengi nehe ndaba bantu bakilukile kulimama kwa Nyambi ya Ngula, Nyambi ya bankakazabo kuya alimamine nabo oho abafumishile mu Engepita.

²⁶ Batendelele milimo banyambi bashenge, baya babulilenga kulimuka hinge kulemesha, baya abakanishile Nyambi ya Ngula, baya abulile kwimika.

²⁷ Nohobene wukali wa Nyambi ya Ngula walashekelele ha bantu ba litunga elye, wabaletelele bikuto nimwabyo byatikitiwa mu libuka elye.

²⁸ Nyambi ya Ngula wakalihile shikuma, ndaba ya wukali wendi wawunene wabazulile ku litunga lyabo na kubayumbila mu litunga lya kubula kulimuka, kami kuyo niko bashili na lelo.’

²⁹ “Kuli byuma bimo biya alimba Nyambi ya Ngula, Nyambi yetu, kubiholola. Ngoboni unahololo mazu wendi, pe etu na bazukulyetu tuwombatale mwaya myaka.